Mau ’ā’amu o te pāpa’ira’a mo’a
’Ua fa’anahohia te ’Ēkālesia a Iesu Mesia

« ’Ua fa’anahohia te ’Ēkālesia a Iesu Mesia », Te mau ’ā’amu o te Ha’api’ira’a Tumu ’e te mau Fafaura’a (2024)

« ’Ua fa’anahohia te ’Ēkālesia a Iesu Mesia », Te mau ’ā’amu o te Ha’api’ira’a Tumu ’e te mau Fafaura’a

’Ēperēra 1830

’Ua fa’anahohia te ’Ēkālesia a Iesu Mesia

E rurura’a ’oa’oa a te ’Ēkālesia

Iosepha Semita e fa’ari’i ra i te mau ta’ata i te fare o Whitmer mā nō te rurura’a mātāmua a te ’Ēkālesia.

I teienei, ’ua nene’ihia te Buka a Moromona, ’e tei ni’a fa’ahou i te fenua nei te mana autahu’ara’a a te Atua. ’Ua parau te Fatu ia Iosepha Semita ’ua tae te taime nō te fa’anaho i te ’Ēkālesia a Iesu Mesia.

Saints, 1:84

Tē ’āfa’i nei te mau ta’ata i tō rātou rima i ni’a nō te pāturu ia Iosepha ’e ia Oliver ’ei feiā fa’atere nō te ’Ēkālesia.

I te 6 nō ’Ēperēra 1830, fātata e 40 vahine ’e tāne tei haere mai i te fare Whitmer mā nō te fa’anaho i te ’Ēkālesia. ’Ua pi’i te Fatu ia Iosepha ’e ia Oliver nō te fa’atere i tāna ’Ēkālesia. ’Ua ani Iosepha ’e Oliver i te mau ta’ata ’ia ’āfa’i i tō rāua rima i ni’a nō te fa’a’ite ē, tē pāturu nei rātou ia rāua ’ei feiā fa’atere nō rātou.

Te Ha’api’ira’a Tumu ’e te mau Fafaura’a 20:1–3 ; Saints, 1:84

Te mau melo ’āpī o te ’Ēkālesia tei ’oa’oa i te ravera’a i te ’ōro’a mo’a.

I muri iho, ’ua ha’amaita’i Iosepha ’e Oliver i te ’ōro’a mo’a. ’Ua ’ōpere rātou i te reira i te mau ta’ata, nō te tauturu ia rātou ’ia ha’amana’o ia Iesu Mesia. I muri iho, ’ua tu’u Iosepha ’e ’o Oliver i tō rāua rima i ni’a i te upo’o o te mau ta’ata tei bāpetizohia. ’Ua ha’amau rāua ia rātou ’ei melo nō te ’Ēkālesia, ’e ’ua hōro’a ia rātou i te hōro’a nō te Vārua Maita’i.

Te Ha’api’ira’a Tumu ’e te mau Fafaura’a 20:75–79 ; Saints, 1:85

Iosepha e ha’api’i ra i te mau melo ’āpī o te ’Ēkālesia.

’Ua hōro’a te Fatu ia Iosepha i te hō’ē poro’i nō te ’Ēkālesia ’āpī. ’Ua parau ’oia ia rātou ’ia pāpa’i i te mea i tupu i roto i te ’Ēkālesia. ’Ua parau ’oia ē, ’o Iosepha Semita tāna peropheta. ’Ua parau fafau ’oia i te mau melo o te ’Ēkālesia ē, mai te mea e pe’e rātou i te mau fa’auera’a tāna i hōro’a ia Iosepha ra, e ha’amaita’i ’oia ia rātou. ’Aita atu ra tā te diabolo e mana i ni’a ia rātou.

Te Ha’api’ira’a Tumu ’e te mau Fafaura’a 21:1–6 ; Saints, 1:85

Iosepha Semita ’e tōna metua tāne, tē tauahi ra ia rāu.

’Ua ’oa’oa roa te mau ta’ata tē vai ra te ’Ēkālesia a Iesu Mesia ! I muri mai i te rurura’a, e rave rahi atu ā ta’ata tei bāpetizohia, mai te metua vahine ’e te metua tāne o Iosepha. I te haerera’a mai tōna metua tāne i rāpae i te pape, ’ua tauahi maoro Iosepha iāna. « ’Ua ora vau nō te hi’o i tō’u metua tāne i te bāpetizora’ahia i roto i te ’ēkālesia mau a Iesu Mesia ! », tāna i parau.

Saints, 1:86

E mana’o māuruuru mau tō Iosepha i te tauturura’a i te fa’aho’i fa’ahou mai i te ’Ēkālesia.

I taua pō ra, ’ua haere atu Iosepha i roto i te uru rā’au ’o ’ōna ana’e. ’Ua ’ī tōna ’ā’au i te ’oa’oa. 10 matahiti tei ma’iri mai tōna ’ite-mātāmua-ra’a i te Metua i te ao ra ’e Iesu Mesia. E rave rahi roa ho’i ’ohipa tei tupu na. ’Ua māuruuru roa Iosepha e ti’a iāna ’ia tauturu i te fa’aho’i fa’ahou mai i te ’Ēkālesia a Iesu Mesia !

Saints, 1:86