Te moemoeā a Desideria

Tē ora nei Desideria Yáñez i Nopala, Mēhiko. I te hō’ē pō, ’ua fa’ari’i Desideria i te hō’ē moemoeā nō te hō’ē buka iti tei hāmanihia i te ’oire nō Mēhiko. ’Ua pi’ihia te reira Voz de amonestación, ’aore rā Voice of Warning [Te reo fa’aara]. I tō Desideria arara’a mai, ’ua ’ite ’oia e ti’a iāna ’ia ’ite mai i teie buka.

Te Feiā Mo’a, 2:477

E mea ātea roa rā te ’oire nō Mēhiko, ’e e mea pa’ari roa Desideria nō te rave i te hō’ē tere roa mau. ’Ua putapū ’oia ē tē hina’aro nei te Fatu ’ia noa’a iāna teie buka. Nō reira, ’ua fa’ati’a ’oia i tāna tamaiti, ia José, i te moemoeā. ’Ua ti’aturi ato’a José e mea faufa’a roa te buka. ’Ua parau ’oia i tōna metua vahine e ’ite mai ’oia i te reira nōna.

Te Feiā Mo’a, 2:478

I te taera’a atu José i te ’oire nō Mēhiko, tē vai ra te mau ’ohipara’a rau nā roto i te mau aroā, te māniania, ’e ’ua ’ī i te ta’ata. Nāhea ’oia e nehenehe ai e ’ite mai i teie buka i roto i te hō’ē vāhi tei ’ī i te ta’ata ?

Te Feiā Mo’a, 2:478

Tau mahana i muri mai, ’ua fārerei atu José i te hō’ē misiōnare ’o James Stewart te i’oa. ’Ua parau James ē, tē ’ohipa nei ’oia nō te nene’ira’a i te hō’ē buka tei pi’ihia Voz de amonestación.

Te Feiā Mo’a, 2:478

E ’oa’oa rahi tō José ! ’Ua fa’ati’a atu ’oia ia James i te moemoeā a tōna metua vahine. ’Ua fa’ata’a atu James ē, tē fa’a’ohipa nei te mau misiōnare te Voz de amonestación nō te ha’api’i i te ta’ata nō ni’a ia Iesu Mesia ’e te hō’ē buka pāpa’ira’a mo’a ’āpī, te Buka a Moromona.

Te Feiā Mo’a, 2:478

’Aita ā te Voz de amonestación i ’oti atu ra, ’e ’aita te Buka a Moromona i ’īritihia nā roto i te reo pāniora. ’Ua hōro’a atu rā James i te tahi atu mau buka ’e te tahi atu mau ’api parau nō te tauturu iāna ’e tōna metua vahine, ’ia ha’api’i mai nō ni’a ia Iesu Mesia, te Buka a Moromona ’e te ’Ēkālesia tei fa’aho’i-fa’ahou-hia mai.

Te Ha’api’ira’a Tumu ’e te mau Fafaura’a 90:11 ; Te Feiā Mo’a, 2:478–79

’Ua ho’i vitiviti atu José i te fare o tōna metua vahine. ’Ua ha’api’i ’āmui māite rāua i te ’evanelia, ’e ’ua ’ite rāua e parau mau te reira. ’Ua ani Desideria i te mau misiōnare ’ia haere mai e bāpetizo iāna.

Te Feiā Mo’a, 2:479

’O Desideria te hō’ē o te mau vahine mātāmua tei bāpetizohia i Mēhiko. ’Ua bāpetizo-ato’a-hia ’o José ’e tāna tamāhine.

Te Feiā Mo’a, 2:479

I te otira’a te Voz de amonestación, ’ua fa’ari’i José 10 buka nā tōna metua vahine, nō te fa’a’ite atu i te tahi atu mau ta’ata nō Nopala. E rave rahi matahiti i muri mai, i te otira’a te Buka a Moromona i te nene’ihia nā roto i te reo pāniora, ’o Desideria te ta’ata mātāmua i Mēhiko tei fa’ari’i i te hō’ē buka. ’Ua ’ite Desideria ’ua arata’i te Fatu iāna i tāna ’Ēkālesia tei fa’aho’i-fa’ahou-hia mai.

Te Ha’api’ira’a Tumu ’e te mau Fafaura’a 88:81, Te Feiā Mo’a, 2:479