Te fa’aru’era’a ia Nauvoo ’e te haerera’a i te pae tō’o’a o te rā

’Ua pohe Iosepha Semita. I teienei nā Brigham Young ’e te tahi atu mau ’āpōsetolo e arata’i i te ’Ēkālesia. ’Ua ’ite Brigham ē e’ita te feiā mo’a e pāruru-fa’ahou-hia i Nauvoo. E ti’a ia rātou ’ia haere ’ē atu. Nā mua rā, ’ua hina’aro te Fatu ’ia fa’aoti rātou i te patura’a o te hiero. ’Ua hina’aro ’oia ’ia rave rātou i te mau fafaura’a ’e ’ōna ’e ’ia tā’atihia ’ei ’utuāfare.

Te Feiā Mo’a, 1:571, 579–80

Tau ’āva’e i muri mai, ’ua ineine te hiero nō te fa’ari’i i te mau ta’ata ’ia rave i te mau fafaura’a i reira. E rave rahi tauatini feiā mo’a tei haere mai i te hiero. ’Ua fa’aea Brigham i roto i te hiero i te maorora’a pō, nō te tauturu ia rātou ’ia rave i te mau fafaura’a ’e te Fatu. I te pae hope’a, ’ua parau Brigham i te mau ta’ata ato’a e ti’a ia rātou ’ia fa’aru’e ia Nauvoo.

Te Feiā Mo’a, 1:582

I te arara’a mai Brigham i te po’ipo’i a’e, tē tīa’i ra vetahi atu feiā mo’a i te hiero. ’Ua parau Brigham ia rātou e mea fifi roa ’ia fa’aea noa i Nauvoo. E ti’a ia rātou ’ia ’ite mai i te hō’ē nohora’a ’āpī i te pae tō’o’a o te rā. ’Ua parau fafau ’oia ē, e nehenehe rātou e patu i te hō’ē hiero ’āpī ’ia tae ana’e rātou i reira.

Te Feiā Mo’a, 1:582–83 ; 2:13–14

’Aita rā te feiā mo’a i haere ’ē atu. ’Ua hina’aro rātou e rave i te mau fafaura’a ’e te Fatu hou rātou ’a ha’amata ai i tō rātou tere nō te hō’ē nohora’a ’āpī.

Te Feiā Mo’a, 1:583

’Ua ’ite Brigham i tō rātou hōho’a mata ’e ’ua taui i tōna mana’o. ’Ua fa’aea ’oia i te toe’a o te mahana ’e i te mahana i muri mai nō te tauturu i te feiā mo’a ’ia rave i te mau fafaura’a i roto i te hiero.

Te Feiā Mo’a, 1:583

I teienei ’ua oti te feiā mo’a i te rave i te mau fafaura’a ’e te Fatu, ’ua tae te taime nō te fa’aru’e ia Nauvoo. ’Ua ’ite Brigham e vāhi tā te Fatu i fa’aineine nō rātou. ’Ua ’ite ’oia i te reira i roto i te hō’ē ’ōrama. ’Ua ha’amata rātou i tō rātou tere. E mea to’eto’e te reva, ’e e mea vari te repo. ’Ua ro’ohia te ta’ata i te ma’i. ’Ua ha’amata a’ena tā rātou mā’a i te pau.

Te Feiā Mo’a, 2:16–18, 20–21

E mea ātea roa te ’ē’a tā te feiā mo’a e haere. ’Ua uiui Brigham nāhea e ti’a ai ia rātou ’ia rave i te hō’ē tere roa ’e te fifi ho’i. ’Ua pure ’oia nō te tauturu a te Atua.

Te Feiā Mo’a, 2:46

’Ua hōro’a te Fatu i te hō’ē heheura’a ia Brigham. ’Ua ha’api’i ’oia ia Brigham nāhea ’ia arata’i i te feiā mo’a. ’Ua parau ’oia e ti’a ia rātou e tauturu i te tahi ’e te tahi nō te aupuru i te feiā veve.

Te Ha’api’ira’a Tumu ’e te mau Fafaura’a 136:1–8

’Ua parau te Fatu e ti’a i te feiā mo’a ’ia ha’amana’o i te mau fafaura’a tā rātou i rave ’e ’ōna. Mai te mea e nā reira rātou, e ha’amaita’i ’oia ia rātou ’e e tauturu ia rātou i roto i tō rātou tere.

Te Ha’api’ira’a Tumu ’e te mau Fafaura’a 136:4, 11, 42 ; Te Feiā Mo’a, 2:47

E mea fifi roa te tere. ’Ua pohe vetahi mau ta’ata. Maoti tā rātou mau fafaura’a o te hiero, ’ua ’ite te feiā mo’a e ’ite fa’ahou rātou i te mau melo o tō rātou ’utuāfare.

Tau ’āva’e i muri mai, ’ua tāpae mai te feiā mo’a mātāmua i roto i te ’āfa’a nō Roto Miti i te matahiti 1847. I tō Brigham Young ’itera’a atu i te ’āfa’a, ’ua nā ’ō ’oia, « ’o teie te vāhi ti’a ». ’O te hō’ē ā vāhi ’o tāna i ’ite i roto i te hō’ē ’ōrama. Teie te vāhi e pāruruhia ai te feiā mo’a. I’ō nei rātou e nehenehe ai e ha’amori i te Fatu ’e e rave ai i tāna ’ohipa ma te hau.

Te Feiā Mo’a, 2:17, 64–67

I te roara’a o te mau matahiti, e rave rahi atu ā feiā mo’a tei tāpae mai. ’Ua patu rātou e rave rahi hiero, i reira te ta’ata e nehenehe ai e rave i te mau fafaura’a ’e te Fatu. ’Ua tono rātou i te mau misiōnare nā te ao ato’a nei nō te ha’api’i i te ’evanelia ’a Iesu Mesia. ’Ua tāmau noa te ’Ēkālesia a te Fa’aora i te tupu i te rahi, ma te ha’amaita’i i te mau tamari’i a te Metua i te ao ra i te mau vāhi ato’a.