’Ua ha’amo’ahia te hiero nō Kirtland

I muri a’e fātata e toru matahiti i te ’ohipa itoitora’a, ’ua oti roa te hiero nō Kirtland. ’Ua ani manihini te peropheta Iosepha i te feiā mo’a i te hō’ē rurura’a ta’a ’ē nō te ha’amo’a i te hiero. E fa’ahiti ’oia i te hō’ē pure ta’a ’ē ’e e pūpū i te hiero i te Fatu. E riro mai te reira ’ei fare mo’a nō te Fatu.

Te Feiā Mo’a, 1:235

I te po’ipo’i roa o te rurura’a, e rave rahi hānere feiā mo’a tei putuputu mai i roto i te hiero. I te ’īra’a te mau pārahira’a ato’a, ’ua ti’a noa te ta’ata i te ’ūputa ’e i rāpae, ma te hi’o mai nā roto i te mau ha’amāramarama. E ’oa’oa rahi tō te mau ta’ata ato’a ’ia ’ite i te hiero ’ia ha’amo’ahia.

Te Feiā Mo’a, 1:235–36

’Ua tai’o Iosepha i te hō’ē pure nō te ha’amo’a i te hiero. ’Ua parau ’oia i te Fatu ē, ’ua ha’apa’o te feiā mo’a i tāna fa’auera’a. ’Ua ani ’oia i te Fatu ’ia fa’ari’i i te hiero ’ei fare Nōna.

Te Ha’api’ira’a Tumu ’e te mau Fafaura’a 109:1–5

’Ua pure Iosepha ’ia fa’ari’i te mau ta’ata ato’a ’o tē haere mai i te hiero ’ia putapū i te mana o te Fatu, ’e ’ia ’ite ē ’o Tōna fare teie.

Te Ha’api’ira’a Tumu ’e te mau Fafaura’a 109:13

’Ua pure ato’a Iosepha ē, ’ia hara ana’e te feiā mo’a, e ti’a ia rātou ’ia tātarahapa ’oi’oi. ’Ua ani ’oia i te Fatu ’ia hōro’a ia rātou i te mana nō te fa’a’ite i tāna ’evanelia nā te ao ato’a nei. I muri a’e i te pure, ’ua hīmene te hō’ē pupu hīmene i te hō’ē hīmene ’āpī tei pi’ihia « ’Auē te Vārua o te Atua ». ’Ua ’ī te mau ta’ata i te ’oa’oa. ’Ua ti’a rātou i ni’a ’e ’ua ’ārue i te Fatu.

Te Ha’api’ira’a Tumu ’e te mau Fafaura’a 109:21–32 ; Te mau Hīmene, N° 2 ; Te Feiā Mo’a, 1:237

E rave rahi ta’ata tei ’ite i te mau melahi i roto i te hiero i taua mahana ra. ’Ua ’ite rātou i te hō’ē māramarama ’ana’ana i te poura’a mai nā ni’a mai i te ra’i i ni’a i te hiero. Tē parau ra vetahi e au ra te reira mai te hō’ē ata ; te tahi atu ’ua parau e au ra te reira mai te auahi. ’Ua putapū te tā’āto’ara’a o rātou ē e vāhi mo’a te hiero. ’O te fare mau te reira o te Fatu i teienei.

Te Feiā Mo’a, 1:237