Te fare tāvirira’a mā’a a Hawn

E 11 matahiti tō Willard Smith. Tē ora ra tōna ’utuāfare i roto i te fare tāvirira’a mā’a a Hawn i Missouri, ’e te tahi atu feiā mo’a. ’Ua hina’aro rātou e putuputu ’oi’oi atu ’e te feiā mo’a i Far West.

Te Ha’api’ira’a Tumu ’e te mau Fafaura’a 115:7–8 ; Te Feiā Mo’a, 1:347–48

I te hō’ē mahana, tei reira Willard ’e tōna metua tāne ’e tōna mau taea’e, ’o Sardius ’e ’o Alama. I reira iho, ’ua fa’aro’o rātou i te mau pa’a’ina ’ōfa’i pūpuhi ’e te mau tuōra’a. ’Ua haere mai te mau ta’ata e ’aro i te feiā mo’a.

Te Feiā Mo’a, 1:348–49

’Ua horo haere te mau ta’ata ato’a e ’imi i te vāhi pārurura’a. E rave rahi tāne ’e te mau tamari’i tei tāpuni i roto i te fare tūpa’ira’a ’āuri. ’Ua tomo ato’a atu te metua tāne ’e te mau taea’e o Willard, ’ua ta’a ’ē atu rā ’o Willard ia rātou. ’Ua tāpuni atu ’oia i muri i te hō’ē ha’apu’era’a rā’au. ’Ua fa’aro’o ’oia i te mau pa’a’ina ’ōfa’i pūpuhi ’ati a’e iāna.

Te Feiā Mo’a, 1:349, 353

’Ua horo Willard mai terā vāhi ’e terā vāhi nō te tāpuni. I te pae hope’a, ’ua fa’aea te mau pa’a’ina ’ōfa’i pūpuhi. ’Ua fa’aru’e mai te feiā ’aro i te fare tāvirira’a mā’a a Hawn.

Te Feiā Mo’a, 1:353

’Ua haere atu Willard i te fare tūpa’ira’a ’āuri nō te ’imi i tōna ’utuāfare. ’Ua taparahi-pohe-hia tōna metua tāne ’e ’o Sardius. Terā rā, tē ora noa ra te teina o Willard ’o Alama.

Te Feiā Mo’a, 1:353

’Ua pēpē Alama i tōna tau’upu i te ’ōfa’i pūpuhi. ’Ua pēpē ’ino roa ’oia. ’Ua rave Willard ia Alama ’e ’ua ’āfa’i atu iāna i te fare ’ie o tō rātou ’utuāfare.

Te Feiā Mo’a, 1:353–54

’Aita te metua vahine o Willard, ’o Amanda, i ’ite nāhea i te rāpa’au i te tau’upu o Alama. ’Ua ’ite rā ’oia ē ’ua ’ite te Atua i te rave. ’Ua pure ’oia, ’e ’ua fa’aro’o ’oia i te hō’ē reo i te parau-pāpū-ra’a iāna e aha te mea e rave.

Te Feiā Mo’a, 1:354

’Ua horoi Amanda i te pēpē o Alama i te rehu. I muri iho ’ua fa’ahu’ahu’a ’oia i te a’a o te tumu rā’au ’e ’ua tāpiri atu i te reira i ni’a i tōna [Alama] pēpē. ’Ua pū’ohu Amanda i tōna [Alama] tau’upu i te ’ahu. « ’A tārava noa mai te reira, ’e ’eiaha e ha’uti », ’ua parau Amanda, « ’e e hāmani te Fatu i te tahi atu tau’upu nō ’oe ».

Te Feiā Mo’a, 1:354–55

I muri iho, ’ua parau te tāvana hau nō Missouri ē, e ti’a i te feiā mo’a ’ia fa’aru’e i te tuha’a fenua ’aore rā e taparahi-pohe-hia rātou. ’Aita ho’i te tau’upu o Alama i maita’i roa mai. ’Ua pure Amanda ’e ’ua ani i te tauturu i te Fatu. ’Ua parau mai te hō’ē reo iāna ē, e’ita roa Iesu e fa’aru’e i tōna ’utuāfare. ’Ua putapū Amanda ē e’ita roa te hō’ē mea e nehenehe e ha’ape’ape’a iāna.

Te Ha’api’ira’a Tumu ’e te mau Fafaura’a 88:83 ; Te Feiā Mo’a, 1:372, 378–79

I muri a’e i tōna purera’a, ’ua fa’aro’o Amanda i tāna mau tamari’i i te tuōra’a. ’Ua horo atu ’oia e ’imi ia rātou, ’e i tōna taera’a atu, tē horohora noa ra Alama. « Mea maita’i au e māmā, mea maita’i au ! » ’ua parau Alama. ’Ua ora tōna tau’upu ! E temeio teie nō ’ō mai i te Fatu ra. ’Ua fa’aru’e Amanda ’e tāna mau tamari’i ia Missouri, nō te ’ite mai i te hō’ē vāhi pārurura’a ’e te toe’a o te feiā mo’a.

Te Feiā Mo’a, 1:379