Te pūhapara’a o ’Īsera’ela

’Ua hina’aro te feiā mo’a tei ora na i Independence, Missouri, i te tauturu. ’Ua ha’a itoito rātou nō te patu ia Ziona mai tā te Atua i ani. ’Aita rā te tahi atu mau ta’ata i roto i te ’oire i hina’aro ia rātou i reira. ’Ua fa’ahepo rātou i te feiā mo’a ’ia fa’aru’e i tō rātou mau fare.

Te Feiā Mo’a, 1:221

Tē ora ra Iosepha Semita i Kirtland. ’Ua fa’aro’o ’oia i te ’ohipa i tupu nō te feiā mo’a i Missouri, ’e ’ua ’oto ’oia. ’Ua pure ’oia nō te ’ite e aha te ’ohipa e rave. ’Ua parau te Fatu ia Iosepha ’ia ’imi mai i te mau ta’ata nō te haere nā muri iāna i Missouri. ’Ua ti’aturi rātou e tauturu mai te fa’aterera’a hau i te feiā mo’a ’ia fa’aho’ihia mai i tō rātou fare.

Te Ha’api’ira’a Tumu ’e te mau Fafaura’a 103:1–2, 11–20, 30–34 ; Te Feiā Mo’a, 1:195–96

Fātata e 100 ta’ata ’ā’au tae tei ’āmui atu iāna. ’Ua pi’i te peropheta i teie pupu te pūhapara’a o ’Īserā’ela. ’Ua ’ana’anatae roa rātou i te haere atu e tauturu i te feiā mo’a i Missouri.

Te Feiā Mo’a, 1:197–99

Tei roto Brigham Young ’e tōna hoa ’o Heber Kimball i te pupu. ’Ua haere mai te hō’ē taure’are’a ’o Wilford Woodruff te i’oa, nā New York mai nō te tauturu.

Te Feiā Mo’a, 1:197–98

’Ua ’āmui ato’a mai te tahi atu mau ta’ata i roto i te pūhapara’a. ’Ua haere ’āvae rātou i te roara’a e hō’ē ’āva’e tā’āto’a ’e ’ua nā roto rātou i te hō’ē ’ānāvai ’ā’ano i Missouri. ’Ua rohirohi roa ’e ’ua māuiui haere rātou. ’Ua ha’afifi ato’a te haere-’āvae-ra’a roa i te tahi mau ta’ata. Tē toe ra ia rātou hō’ē fa’ahou ’ē’a roa nō te haere, e tāpae atu ai i te ’oire nō Independence.

Te Feiā Mo’a, 1:200–201

’A haere noa ai rātou, ’ua tuō mai te hō’ē vahine ia rātou. ’Ua parau ’oia ē, tē haere mai ra te tahi mau ta’ata nō te taparahi pohe ia rātou.

Te Feiā Mo’a, 1:203

’Ua fa’aea te pūhapara’a o ’Īserā’ela nō te pō i ni’a i te hō’ē ’āivi i ni’a a’e i te hō’ē ’ānāvai. ’A ha’amau ai rātou i tō rātou pūhapara’a, tae mai nei e pae ta’ata nā ni’a i te mau pua’arehenua. ’Ua fa’atietie a’era ia rātou ē, tē haere mai ra e 300 atu mau ta’ata nō te ’aro i te pūhapara’a. E rave rahi mau melo nō te pūhapara’a o ’Īserā’ela tei pe’ape’a. ’Ua parau Iosepha ia rātou ’ia tāpe’a te fa’aro’o ē, e tauturu mai te Atua ia rātou.

Te Feiā Mo’a, 1:203

’Aita i maoro roa, ’ua ’ī te ra’i i te mau ata rehu. ’Ua ha’amata te ua pūai i te topa. ’Ua hōhonu roa atu te ’ānāvai. ’Ua tāpūpū haere te mata’i i te mau tumu rā’au. ’Ua pura haere te uira i roto i te ra’i. ’Ua ’itehia mai ia Iosepha ’e vetahi mau ta’ata te hō’ē fare purera’a na’ina’i, i reira rātou e pāruruhia ai. ’Ua hīmene rātou i te mau hīmene purera’a i te roara’a o te pō. « Tei roto te Atua i teie vero ! » ’Ua parau Iosepha.

Te Feiā Mo’a, 1:203–4

’Ua tāpe’a te vero i te feiā tei hina’aro e ’aro mai ia rātou. ’Ua pāruruhia te pūhapara’a. ’Ua parau rā te fa’aterera’a hau ē, e’ita rātou e tauturu i te feiā mo’a. ’Ua parau te Fatu ia Iosepha ē, e nehenehe te pūhapara’a o ’Īserā’ela e ho’i i te fare. E ti’a i te feiā mo’a e patu ia Ziona ma te ha’apa’ora’a i te mau fa’auera’a a te Atua. ’Ua parau fafau ’oia [Te Atua] ē, e « ’aro ’oia i te mau ’arora’a a Ziona ».

Te Ha’api’ira’a Tumu ’e te mau Fafaura’a 105:1–19 ; Te Feiā Mo’a, 1:204–5

’Ua ti’arepu roa vetahi mau melo o te pūhapara’a i tō rātou fa’aro’ora’a i te reira. ’Ua ’oto rātou i te ’orera’a e haere e ’aro atu nō Ziona. ’Ua mana’o vetahi ē ’ua manuia ’ore te pūhapara’a o ’Īserā’ela. Vetahi rā ’ua māuruuru ïa, mai ia Brigham Young, Heber ’e Wilford, i te fāna’ora’a ’ia pārahi i pīha’i iho i te peropheta Iosepha ’e ’ia ha’api’i nā roto mai iāna.

Te Feiā Mo’a, 1:205–6

I muri a’e, ’ua parau te Fatu ia Iosepha Semita ’ia pi’i i te Tino ’Ahuru ma Piti ’āpōsetolo, nō te tauturu i te arata’i i tāna ’Ēkālesia. E riro te mau ’āpōsetolo ’ei mau ’ite ta’a ’ē nō te i’oa o te Mesia nā te ao ato’a nei. E va’u ’o nā ’Ahuru ma Piti ’āpōsetolo tei haere ’āvae i roto i te pūhapara’a o ’Īserā’ela. Te tāvinira’a ’e ’o Iosepha ’ua tauturu ia rātou ’ia fa’aineine nō teie pi’ira’a faufa’a rahi.

Te Ha’api’ira’a Tumu ’e te mau Fafaura’a 18:26–27 ; 107:23 ; Te Feiā Mo’a, 1:214–17