Elijah Able

’Ua pi’i te Fatu i te hō’ē ta’ata tōna i’oa o Elijah Able ’ia riro ’ei misiōnare. ’Ua ha’api’i Elijah ia Eunice ’e ia Charles Franklin nō ni’a i te ’evanelia a Iesu Mesia. ’Ua parau ’oia ia rātou nō ni’a i te Buka a Moromona ’e te peropheta Joseph Smith. ’Ua ti’aturi Eunice ’e ’o Charles i te mea tāna i ha’api’i ’e ’ua hina’aro atu ra e tomo mai i roto i te ’Ēkālesia. ’Ua bāpetizo Elijah ia rāua.

Saints, 1:316

’Ua reva Elijah nō te fa’a’ite i te ’evanelia i te tahi atu ’oire. I te hō’ē pō, ma’a ’āva’e i muri mai, ’ua moemoeāhia ’oia nō ni’a i tōna hoa ’o Eunice. I roto i te moemoeā, ’aita ’o Eunice e pāpū fa’ahou ra, e parau mau ānei te Buka a Moromona ’aore rā te peropheta Iosepha Semita. I tō Elijah ti’ara’a mai i ni’a, i reira ra tōna ho’ira’a e hi’o ia Eunice.

Te Ha’api’ira’a Tumu ’e te mau Fafaura’a 75:27 ; Saints, 1:315–16

’Ua māere roa Eunice i te ’itera’a ia Elijah i tōna ’ūputa ! ’Ua tano te moemoeā a Elijah : ’Aita ’o Eunice i ti’aturi fa’ahou i te Buka a Moromona ’aore rā ia Iosepha Semita.

Saints, 1:317

’Ua ani Elijah ia Eunice ’ia haere mai e fa’aro’o i tāna porora’a i te hō’ē fare ha’api’ira’a. ’A fa’aro’o ai ’oia i te mau parau a Elijah, ’ua putapū fa’ahou ’oia i te Vārua Maita’i. ’Ite ihora ’oia e parau mau te ’evanelia !

Saints, 1:317

’Ua parau fafau Elijah ia Eunice ē, e ho’i fa’ahou mai ’oia i roto e piti hepetoma nō te poro fa’ahou. ’Aita rā vetahi mau ta’ata o te ’oire i hina’aro iāna ’ia ho’i mai. I muri a’e i tō Elijah revara’a, ’ua ha’amata rātou i te parau i te mau ta’ata ato’a ē, ’ua taparahi pohe Elijah i te ta’ata. ’Ua tu’u rātou i te hō’ē utu’a ha’amāuruurura’a nō te ta’ata e ’ite mai iāna.

Saints, 1:318

’Ua ’ite Eunice ē, tē ha’avare ra te mau ta’ata nō ni’a ia Elijah. ’Aita ’oia i taparahi pohe i te hō’ē ta’ata. E ta’ata maita’i ’oia ’e e tāvini ’oia nā te Atua. ’Ua ’ite ’oia e’ita tā rātou mau ha’avare e tāpe’a ia Elijah ’ia haere mai i tō rātou ’oire nō te poro. ’Ua parau Eunice i te mau ta’ata ē, e ho’i fa’ahou mai Elijah. « E pāruru te Atua iāna », tāna ïa parau.

Saints, 1:318

’E ’ua ho’i mai Elijah. ’Ua haere mai ’oia i terā iho fare ha’api’ira’a tāna i poro nā mua atu. ’Ua apiapi roa te fare ha’api’ira’a i te ta’ata tei hina’aro e haru mai iāna. ’Ua ti’a Elijah i mua i terā mau ta’ata. ’E ’ua parau atu ē, mai te mea ’ua hina’aro rātou e haru iāna, ’ia nā reira rātou i teienei, hou ’oia ’a ha’amata ai i te ha’api’i. ’Aita ana’e, e vaiiho ïa iāna ’ia ha’api’i.

Saints, 1:318

’Aita te ta’ata i ha’uti a’e. ’Ua tīa’i ’o Elijah, ’ua pārahi māmū noa rā te mau ta’ata. ’Ua hīmene Elijah i te hō’ē hīmene, ’ua pure ’e ’ua ha’api’i i te ’evanelia a Iesu Mesia. Tei iāna ra te mana o te Atua. I muri a’e i tāna ha’api’ira’a, ’ua paraparau ’oia i tōna nā hoa ia Eunice ’e ia Charles ’e ’ua tāmau i tāna misiōni ma te hau.

Saints, 1:319