Te fa’aipoipora’a mure ’ore ’e te mau ’utuāfare

I te fa’aipoipora’ahia Emma ’e Iosepha, ’ua ti’aturi noa na rāua ē, e hope tō rāua fa’aipoipora’a i te taime pohera’a. Mai te reira ato’a te mau fa’aipoipora’a ato’a. I muri iho rā, ’ua parau te Fatu ia Iosepha, e nehenehe te mau fa’aipoipora’a ’e te mau ’utuāfare e vai ē a muri noa atu.

Saints [Te Feiā Mo’a], 1:413

’Ua ha’api’i te Fatu ia Iosepha nō ni’a i te fa’aipoipora’a mure ’ore. Nā roto i te mana o te autahu’ara’a, e nehenehe te hō’ē tāne ’e te hō’ē vahine e rave i te hō’ē fafaura’a e te Fatu. Mai te mea e ha’apa’o rātou i tā rātou fafaura’a, e fafau mai te Fatu ē, e vai noa tō rātou fa’aipoipora’a ē a muri noa atu. E parauhia te reira te tā’atira’a. ’Aita i maoro roa, ’ua tā’atihia Iosepha ’e ’o Emma nō te tau mure ’ore.

Te Ha’api’ira’a Tumu ’e te mau Fafaura’a 132:7, 19–24 ; Saints [Te Feiā Mo’a], 1:413, 432–33, 481–82, 492, 502–3

’Ua ha’api’i ato’a mai Iosepha ē, ’ia tā’ati-ana’e-hia te hō’ē tāne ’e te hō’ē vahine, e tā’atihia tā rāua mau tamari’i ia rāua. Maoti te mana ’o Iesu Mesia, e nehenehe tō rātou ’utuāfare e vai ē a muri noa atu. I tō Iosepha paraura’a i te Feiā mo’a nō ni’a i teie ha’amaita’ira’a, ’ua ’oa’oa roa rātou ! ’Aita i nehenehe ia rātou ’ia tīa’i ’ia tā’ati-’āmui-hia rātou.

Te Ha’api’ira’a Tumu ’e te mau Fafaura’a 131:2 ; 132:6–7 ; Saints [Te Feiā Mo’a], 1:492–93, 580

I muri a’e, ’ua ha’api’i mai te Fatu, e ravehia te mau tā’atira’a i roto i te hiero. ’Ua ha’a itoito te Feiā mo’a nō te fa’aoti i te hiero i Navu ’ia ti’a ia rātou ’ia tā’atihia. I te taime ’ua ineine te hiero, e rave rahi ’utuāfare i tā’atihia. ’Ua tā’ati-ato’a-hia rātou i te mau melo o te ’utuāfare tei pohe. ’Ua māuruuru rātou nō teie ha’amaita’ira’a !

Saints [Te Feiā Mo’a], 1:579–80