Na Matavuvale na Martins

A draiva tiko yani ki vale o Helvécio Martins mai na vanua ni cakacaka e Rio de Janeiro, Brazil. A sinai tu na gaunisala ena motoka ka sega ni dua vei ira e toso rawa. A vakasamataka sara o Helvécio na nona bula. A dua tu na nona cakacaka vinaka. A lomana o koya na watina, o Rudá, kei rau na luvena, o Marcus kei Marisa. Ia a vakila o koya ni dua na ka e yali tiko.

Yalododonu, 4:229–30

A sobu mai na motoka o Helvécio ka tekivu masu. “Noqu Kalou,” a kaya, “Au kila ni o tiko oqori ena dua na vanua, ia au sega ni kila e vei.” A tukuna vua na Tamada Vakalomalagi ni ratou vakasaqara tiko e dua na ka na nona matavuvale, ka ratou gadreva na Nona veivuke. A qai vodo tale o Helvécio ena nona motoka ka draiva yani ki vale.

Yalododonu, 4:230

E muri, a talai ira na daukaulotu mai Amerika na Turaga. Erau a sikova na matavuvale na Martins. A raica o Helvécio ni rau kauta mai e dua na yalo vakacegu ki na nona vale. A kila o koya ni, ena gauna oya, era dau sega ni qaravi vinaka e Amerika o ira na tamata yago loaloa. A taroga o koya, “E dau qaravi ira vakacava na tamata loaloa na nomu lotu?”

Yalododonu, 4:230–31

Erau a vakamacalataka na daukaulotu ni rawa ni ra papitaiso kece na luve ni Kalou. Ia ena gauna o ya, o ira na tamata loaloa ka tubudra mai Aferika era sega ni rawa ni taura na matabete se ciqoma e vuqa na veivakalougatataki ni valetabu. A levu tale na taro nei Helvécio kei Rudá. Rau a saga nodrau vinaka duadua na daukaulotu me sauma.

Yalododonu, 4:231

Ena vuqa na yabaki, era a masulaka na parofita me ra kila na gauna e rawa ni soli kina na matabete kei na veivakalougatataki ni valetabu vei ira na tamata kecega.

Yalododonu, 4:71

Rau a nanuma o Helvécio kei Rudá me rau tovolea me ratou lako i lotu. O ira na Yalododonu e kea era a dau loloma ka yalovinaka sara. Eratou a taleitaka na matavuvale na Martins na veika eratou vulica ena lotu.

Yalododonu, 4:231–32

Ena dua na siga, ni ratou lesu tiko i vale mai na lotu, a tukuna o Marcus vei iratou na nona matavuvale ni raica ni vaka eratou sa marau vakalevu cake. “Au kila na cava e vakavuna tiko,” a kaya o Marcus. “Na kosipeli i Jisu Karisito.” Eratou a kila na vo ni matavuvale ni dina o Marcus. Eratou sa nanuma me ratou sa papitaiso ka vakadeitaki.

Yalododonu, 4:232

Ena vica na yabaki e muri, era a osooso na Yalododonu e Brazil ena tara ni dua na valetabu. Eratou a marautaka na matavuvale na Martins, ia eratou a rarawa talega. Eratou na sega ni rawa ni curuma na valetabu ni sa na vakatabui oti. “Kua ni leqa,” a kaya o Helvécio vei Rudá. “E kila tu na Turaga na ka kecega.”

Yalododonu, 4:293–94

A sega ni rawarawa me ratou yalodina tikoga. Era a veiwalitaki iratou na Martins na tamata. O ira sara mada ga na nodratou itokani era sega ni kila na vuna eratou tikoga kina ena Lotu. Ia eratou a kila tu o Helvécio kei na nona matavuvale ni o ya na Lotu i Jisu Karisito.

Yalododonu, 4:251–52

Ena dua na siga, ni lesu ki vale o Helvécio mai na cakacaka, a kaya mai o Rudá, “E tiko vei au na itukutuku, a itukutuku veivakurabuitaki!” Ni oti e vuqa na lolo kei na masumasu, a ciqoma kina na parofita, o Peresitedi Spencer W. Kimball, e dua na ivakatakila. A tukuna vua na Kalou ni dua ga na tamata, se cava ga na roka ni kuli ni yagodra, e rawa ni ciqoma na veivakalougatataki kece sara ni matabete kei na valetabu.

iTukutuku Vakadonui 2; Yalododonu, 4:318–19

Eratou a wawa tu mai vakabalavu na matavuvale na Martins kei na vuqa tale. Oqo sa mai oti na wawa! Rau a ciqoma o Helvécio kei Marcus na matabete. Eratou a vauci vakamatavuvale ena valetabu o Helvécio, Rudá, kei rau na luvedrau. Sa rawa oqo ni ratou ciqoma na veivakalougatataki kece sara ni kosipeli.

Yalododonu, 4:319–21