iVakadinadina Raica na Peleti ni iVola i Momani

Eratou a vakadewataka tikoga o Josefa, Emma, kei Oliver na peleti koula ena vale nei Simici mai Pennsylvania. Ia era vinakata na lewenivanua ena nodra taoni mera tarovi ira. E dua na nona itokani o Oliver na yacana o David Whitmer ka vakaitikotiko mai Niu Ioka. A kerei David o Oliver kevaka e rawa ni rau toki vata kei na matavuvale na Whitmer me vakacavara na vakadewa.

Yalododonu, 1:68

Eratou vakadonuya o David kei na nona vuvale. Erau kidavaki Josefa, Emma, kei Oliver ki na nodratou vale. Sa rawa ni ra cakacakataka na vakadewa ena vakacegu. E levu era vakaitikotiko ena vale ni Whitmer. Sa kena ibalebale oqori ni levu sara na cakacaka me caka, vakabibi vei Mary na tinai David.

Yalododonu, 1:68–70

Dua na siga, ni cakacaka tiko o Mary, a sikovi koya na agilosi o Moronai. E kaya ni kila ni sa oca tiko na ikuri ni cakacaka. E vinakata me vaqaqacotaka na nona vakabauta. A dolava e dua na kato ka dreta mai na peleti koula. A vukica na tabana ka vakaraitaka vei Mary na volavola. A yalataka vei Mary ni na vakalougatataki o koya.

Ira na Yalododonu, 1:70–71

Eso era sega ni vakabauta ni dina na peleti. A talairawarawa o Josefa ki na ivakaro ni Turaga me kakua ni vakaraitaka na peleti vua e dua. E kaya na Turaga ni na laiva me ratou raica e tolu tale na ivakadinadina na peleti. Eratou a kerea o David Whitmer, Martini Harris, kei Oliver Cowdery kevaka e rawa ni ratou ivakadinadina. E kaya na Turaga ni rawa.

Vunau kei na Veiyalayalati 5:11–12; 17; Yalododonu, 1:73

Eratou a lako ki veikau o Josefa, Martini, Oliver, kei David. Eratou tekiduru ka veivukevuke ka taroga vua na Kalou ke rawa ni ratou raica na peleti, ia e sega ni dua na ka e yaco.

Yalododonu, 1:73

E vakila o Martini Harris ni o koya na vuna e sega ni saumi kina na nodratou masu. A biubiu o Martini, ka ra masu tikoga na kena vo.

Yalododonu, 1:73

Sa qai rairai mai e dua na agilosi ena dua na rarama ramase. A vakaraitaka vei Oliver kei David na peleti koula kei na veika e volai tu kina. Era rogoca na domo ni Kalou ni kaya ni a vakadewataka o Josefa na peleti ena kaukauwa ni Kalou ka dina na vakadewa. E kaya talega na Kalou ni dodonu me ra tukuna vei ira na tamata kecega na veika era sa raica ka rogoca.

“Nodratou iVakadinadina e Lewe Tolu na iVakadinadina”; Yalododonu, 1:73–74

A lako o Josefa me laki kunei Martini. E se masu tiko ga. A masu vata kei koya o Josefa. Sa qai rairai mai na agilosi ka vakaraitaka na peleti vei Matini, me vaka ga a cakava vei Oliver kei David.

Yalododonu, 1:74

Tarava, a lako o Josefa me lai vaqarai rau na nona itubutubu, rau a sikovi Mary Whitmer. A tukuna vei ira na nona marau ni ra sa raica na peleti eso tale. Ia oqo sa rawa vei ira na ivakadinadina me ra tukuna vei ira na tamata ni tukuna tiko na ka dina o Josefa. A tukuna vei ira na tamata o Martini na nona marau ni vakatara na Kalou me dua vei ira na ivakadinadina.

Yalododonu, 1:74–75

Ni oti e vica na siga, a kaya na Turaga vei Josefa me vakaraitaka na peleti koula vei iratou e walu tale na tamata—o tamana, e rua vei iratou na tuakana, e va vei iratou na taci David, kei na vugoi David. Me ra taura na peleti ka vukica na tabana. Era kila ni dina na peleti.

”Nodratou iVakadinadina e Lewe Walu na iVakadinadina”; Yalododonu, 1:75

Sa oti oqo na vakadewa ni iVola i Momani. A solia lesu o Josefa na peleti koula vua na agilosi o Moronai. Sa kena gauna oqo me da tabaka na ilavelave ni ivola me rawa ni ra wilika na tamata kecega ka vulica eso tale na ka me baleti Jisu Karisito.

Yalododonu, 1:75–76

E sau levu na ilavo me tabaki kina na iVola i Momani. A solia o Martini Harris e dua na tiki ni nona iteitei me sauma kina. A cakava oqo baleta ni kila ni dina na iVola i Momani. Na ilavelave kece ni ivola e tiko kina na nodra ivakadinadina o Martin kei ira na ivakadinadina tale eso me ra wilika kece. Era sega ni cakitaka na ivakadinadina na nodra ivakadinadina.

Vunau kei na Veiyalayalati 19:26–27, 34–35; Yalododonu, 1:76–78