Parley kei Thankful Pratt

Rau a dauteitei mai Ohio o Parley Pratt kei Thankful Pratt. Dua na siga, a vakila o Parley na Yalotabu ni tukuna vua me biuta na nona vale me vakavulici ira na tamata me baleta na iVolatabu.

Yalododonu, 1:92

Rau volitaka o Parley kei Thankful na nodrau iteitei. Erau sega ni kila na vanua erau na lako kina, ia erau nuitaka ni na vakalougatataki rau na Kalou ena nodrau qaravi Koya.

Yalododonu, 1:92

Rau taura o Parley kei Thankful eso na isulu kei na ilavo ka vodo ena dua na waqa. Ni rau lako voli e Niu Ioka, a tukuna na Yalotabu vei Parley me rau sobu mai waqa. A kerea o Parley me vodo tiko ga ena waqa o Thankful ia ena sobu o koya. A yalataka me na lesu tale mai vua ena dua na gauna lekaleka mai oqo. E vakila ni tiko e dua na ka e vinakata na Kalou me cakava mai Niu Ioka.

Yalododonu, 1:92

A taubale vakabalavu o Parley. Sa qai yaco yani ki na nona vale e dua na dauvunau. A tukuna na dauvunau vei Parley e dua na ivola matalia a solia vua e dua. E lako mai na peleti koula ka a volai ena dua na gauna makawa. A vakatokai me iVola i Momani. A vakadewataka e dua na cauravou mai Niu Ioka ena kaukauwa ni Kalou.

Yalododonu, 1:92

E dau lomatarotaro o Parley. A vakaraitaka vei Parley na dauvunau na ivola. Marautaka, a dolava o Parley ka tekivu wiliwili. Sa oti e vica na auwa, ia a sega ni cegu rawa ni wiliwili, sega mada ga ni kana se moce. A tukuna vua na Yalo ni Turaga ni dina.

Yalododonu, 1:92–93

E taleitaka vakalevu o Parley na iVola i Momani, ka vinakata me kunea na turaga ka a vakadewataka. A taubale yani ki na iteitei ni matavuvale na Smith, ka sotavi Hyrum kina, na taci Josefa. Erau a veivosaki ena bogi taucoko. A tukuna o Hyrum vei Parley ni dina na iVola i Momani. A solia vei Parley na nona ilavelave ni ivola.

Yalododonu, 1:93

Ni wiliwili tiko ga, a kila o Parley ni a sikovi ira na tamata mai Amerika o Jisu Karisito ena dua na gauna makawa. E rawa ni raica o Parley ni iVola i Momani e yaga vakalevu cake mai na iyau kecega e vuravura. A sega ni waraka me lesu tale kivei Thankful ka wasea vua na veika sa vulica.

Yalododonu, 1:93; 3 Nifai 11:1–12

A tukuna o Parley ki vei Thankful kei ira tale eso na lewe ni nona matavuvale me baleta na iVola i Momani. A tukuna vei ira na ka e vakavulica me baleti Jisu Karisito. E marau o Thankful ni a muria o Parley na Yalotabu ka kunea na cakacaka e vinakata na Kalou me cakava. Me vakataki Parley, o Thankful a vulica vakataki koya ni dina na iVola i Momani.

Yalododonu,, 1:98-99