“Era Kaulotu na iApositolo ki Peritania,” iTalanoa ni Vunau kei na Veiyalayalati (2024)
“Era Kaulotu na iApositolo ki Peritania,” iTalanoa ni Vunau kei na Veiyalayalati
Julai 1838–Julai 1841
Era Kaulotu na Apositolo ki Peritania
Vakararavi tiko kina yalayala ni Turaga
Ena dua na ivakatakila vei Josefa Simici, a kacivi ira kina na Apositolo na Turaga ena dua na kaulotu me takosovi na wasawasa ki Peritania. E dina ga ni a dredre vei Josefa me ra gole vakayawa sara na Apositolo, a vakararavi ga vua na Turaga. A dredre talega vei iratou na Apositolo me ratou biuta na nodra matavuvale. Ia a yalataka na Turaga ni na vakalougatataki ira.
Vunau kei na Veiyalayalati 118
A se gone na nodrau matavuvale o Heber C. Kimball kei na watina, o Vilate. E dua na luvedrau e se qai vula dua ga. E levu na lewe ni nodratou matavuvale era a tauvimate bibi sara.
Yalododonu, 1:405
A tauvimate talega o Brigham Young, ka dravudravua na nona matavuvale. Ia na wati Brigham, o Mary Ann, a kaya vua “Mo lako ka qarava na nomu ilesilesi, ka na vakalougatataki iko na Turaga.”
Yalododonu, 1:404–5
Sa tekivu me lako o Brigham, ia ni yaco yani kina vale nei Heber, sa malumalumu sara ka sega ni lako rawa. A laki tiko vata kei na matavuvale nei Heber me vica na siga.
Yalododonu, 1:405
A lako mai o Mary Ann me qaravi Brigham me yacova ni rau sa bula vinaka tale vata kei Heber ka rawa me rau sa biubiu. Erau a malumalumu sara, ia erau a vinakata me rau vunautaka na kosipeli.
Yalododonu, 1:405
Rau a vakamoce o Heber kei Brigham vei rau na watidrau ka vodo yani e muri ni qiqidreti. Rau a rarawa ni rau sa biuta na nodrau matavuvale era tauvimate bibi ka tiko dravudravua. Ni sa gole yani na qiqidreti, a kaya o Heber vei Brigham, “Sa dredre sara qo.” A vinakata me vukea na nodrau matavuvale mera yaloqaqa. A kerea o Heber vei draiva ni qiqidreti me kele.
Yalododonu, 1:405–6
Mai loma ni vale, a rogoca o Vilate e dua na rorogo. A lako mai ki na katuba, a tucake tu kina o Mary Ann. Rau a raici Heber kei Brigham ni rau tucake tu e muri ena qiqidreti, ka yalovaka tiko yani na nodrau isala ka kailavaka, “Hurrah! Hurrah! Hurrah vei Ira na Isireli!” Erau sauma na marama, “Moce! Me vakalougatataki kemudrau na Kalou.”
Yalododonu, 1:406
Ni oti edua na ilakolako balavu e kosova na wasawasa, rau a yaco yani i Peritania o Heber kei Brigham. Rau vakavulica vata kei ira na Apositolo tale eso, e vuqa na tamata me baleti Jisu Karisito kei na Nona kosipeli. E udolu na tamata era a papitaiso ka lewena na Lotu ni iVakabula.
Yalododonu, 1:408–11
E vuqa vei ira na tamata era a papitaiso mai Peritania era a toki ki Nauvoo mera veivuke ena kena tara na siti kei na valetabu. A maroroya na Turaga na Nona yalayala me qarava na matavuvale nei Heber kei Brigham ena gauna erau qaravi Koya tiko kina vakadaukaulotu.
Yalododonu, 1:437–39