Vakamau kei na Matavuvale Tawamudu

Ni rau sa vakamau o Emma kei Josefa, rau vakabauta ni na oti na nodrau vakamau ni rau sa mate. Oqo na ivakarau ni bula vakawati kece ena gauna o ya. Ia sa qai tukuna na Turaga vei Josefa ni na rawa ni tawamudu na vakamau kei na matavuvale.

Yalododonu, 1:413

A vakavulici Josefa na Turaga me baleta na vakamau tawamudu. Mai na kaukauwa ni matabete, sa rawa vua e dua na tagane kei na dua na yalewa me rau cakava e dua na veiyalayalati kei na Turaga. Kevaka era maroroya na nodra veiyalayalati, sa yalataka na Turaga ni na tawamudu na nodra vakamau. Oqo e vakatokai na veivauci. Sega ni dede, rau sa vauci o Josefa kei Emma me tawamudu.

Vunau kei na Veiyalayalati 132:7, 19–24; Yalododonu, 1:413, 432–33, 481–82, 492, 502–3

A vulica talega o Josefa ni gauna rau vauci kina e dua na tagane kei na yalewa, era na vauci vei rau na luvedrau. Ena vuku ni kaukauwa i Jisu Karisito, ena rawa ni tawamudu na nodra matavuvale. Ni sa tukuna o Josefa vei ira na Yalododonu na veivakalougatataki oqo, era sa marau vakalevu! Erau sa sega ni waraka me rau vauci vata.

Vunau kei na Veiyalayalati 131:2; 132:6–7; Yalododonu, 1:492–93, 580

E muri qai vakavulica na Turaga ni dodonu me vakayacori na veivauci ena valetabu. Era cakacaka vakaukauwa na Yalododonu mera tara vakaoti na valetabu mai Nauvoo me rawa nira vauci vata. Ni sa vakarau tu na valetabu, era sa vauci e vuqa na matavuvale. Era vauci sara ga vei ira na lewe ni matavuvale era sa mate. Era sa qai vakavinavinakataka na veivakalougatataki oqo!

Yalododonu, 1:579–80