“Valeniveivesu e Lipati,” iTalanoa ni Vunau kei na Veiyalayalati (2024)
“Valeniveivesu e Lipati,” iTalanoa ni Vunau kei na Veiyalayalati
Okotova 1838–Maji 1839
Valeniveivesu e Lipati
Kunei ni Turaga ena gauna dredre
E vuqa na tamata era vakaitikotiko e Misuri era a sega ni taleitaki ira na Yalododonu. A talai ira na sotia na kovana me vakasavi ira. Era vakasavi ira tani na Yalododonu mai na nodra veivale na sotia, butakoca na iyaya mai na nodra vale, ka vakararawataka e vuqa vei ira.
Yalododonu, 1:355–56, 362, 364
Era a vesuka na Parofita o Josefa Simici kei ira tale eso na iliuliu ni Lotu na sotia.
Yalododonu, 1:357–58
A kerea o Josefa ke rawa ni tiko duadua mada kei iratou na nona matavuvale. Era a kaya na sotia ni sega. Era a kauti Josefa yani kei ira na vo ni kaivesu.
Yalododonu, 1:366
Ena dua na bogi, a rogoca o Josefa kei ira na vo ni kaivesu na nodra veidredrevaki na sotia me baleta na veika ca era a cakava vei ira na Yalododonu. A sega ni qai vosota rawa tale o Josefa me rogoca. A tucake ka kailavaka yani, “Vakanomodi!” A vosa o koya ena kaukauwa ni Kalou. Era a rere na yadra. Era a kere vosoti ka sega ni qai veivosaki tale.
Yalododonu, 1:367–68
E muri, eratou a qai bala ki valeniveivesu o Josefa kei iratou na nona itokani ena dua na taoni ka vakatokai o Lipati. A batabata sara na valeniveivesu, lailai, ka butobuto. A tu ga kina eso na co duka me ratou moce kina. A lailai ga na kakana, ka vakavuna me ratou tauvimate.
Yalododonu, 1:369–70, 374, 384–85
A vakasamataki ira vakalevu na Yalododonu o Josefa. A lomani ira o koya. A lomaleqataki ira. Ia a sega ni rawa ni cakava e dua na ka me vukei ira kina.
Yalododonu, 1:385–86
A masu vakalevu o Josefa. A taroga vua na Kalou se evei o Koya kei na vuna a sega ni vukei ira tiko kina na Yalododonu. Sa guilecavi koya beka na Kalou kei na Lotu?
Vunau kei na Veiyalayalati 121:1–6
A sauma mai na Kalou na masu nei Josefa. A kaya o Koya, “Ia na luvequ, me vakacegu na yalomu.” A tukuna vei Josefa ni na sega ni tawamudu na nona bolebole, ka ra na vinaka vua. A vakananuma vei Josefa na Kalou ni sa sotava oti o Jisu Karisito na veika dredre sara. A yalataka ni na tiko vata kei Josefa “me sega ni mudu ka sega ni mudu.”