Susa Young Gates kei Joseph F. Smith

O Susa Young Gates na luvei Brigham Young yalewa. A sucu o koya e Utah ka tubucake ga e kea. A dau taleitaka na volavola, ka taleitaka na veiqaravi ena Lotu ni Turaga.

Yalododonu, 3:9–10, 64

Ni sa uabula mai o Susa, a tauvimate bibi sara. A kerea o koya na veivakalougatataki ni matabete. Ena veivakalougatataki, a kaya kina na Turaga vei Susa ni vinakata vua me cakava na cakacaka ni valetabu.

Yalododonu, 3:193–94

Ni oti na veivakalougatataki oya, a bula vinaka mai o Susa. A vakayagataka na nona gauna me vulica kina na veika me baleta na nona tuva kawa. Ni raici ira na lewe ni matavuvale era sa mate ka ra se bera ni papitaiso, a gole ki na valetabu me papitaiso ena vukudra. A dau taleitaka me tukuna vei ira na tamata na cakacaka ni tuva kawa. E ka ni rarawa, ni levu na tamata era a sega ni taleitaka.

Yalododonu, 3:194–95, 206

Ena dua na siga, a sikova o Susa na nona itokani o Joseph F. Smith, na Peresitedi ni Lotu. A tauvimate tu o Peresitedi Smith me vica vata na macawa. A kila tu o Susa ni rarawa talega vakalevu o koya baleta ni sa mate na luvena tagane. E rarawataka talega na veika tale eso e yaco tiko e vuravura, me vaka na ivalu kei na tauvimate.

Yalododonu, 3:197–99, 205–6

A marautaka o Peresitedi Smith ni dabe vata kei koya o Susa ka vosa vua. A tukuna vei Susa o koya ni sa solia vua na Kalou e dua na raivotu digitaki. E a baleta na vuravura ni yalo, na vanua era lako kina na tamata ni ra sa mate. A volai tu na nona raivotu ena dua na pepa. A solia yani o Peresitedi Smith vei Susa ka kerei koya me wilika.

Yalododonu, 3:206–7

A wilika sara o Susa na pepa. E tukuni kina ni a sikova na vuravura ni yalo o Jisu Karisito. A talai Atama, Ivi, kei ira tale eso na turaga kei na marama yalodina me ra vakavulici ira na yalo era a sega ni ciqoma na kosipeli ni ra se bula tiko. Era a vukei ira tiko na yalo oqo me ra vakavakarau me rawa ni ra papitaiso ena vukudra na tamata ena valetabu.

Vunau kei na Veiyalayalati 138:11–19, 29–48; Yalododonu, 3:206–7

A kurabui o Susa ni wilika na raivotu nei Peresitedi Smith. A matadredredre vua o Peresitedi Smith. “Susa,” a kaya, “o sa cakava tiko e dua na cakacaka cecere.” A tukuna vua ni lomani koya ena vuku ni nona vakabauta na Turaga.

Yalododonu, 3:206

A vola o Susa na ivakatakila oqo ena nona ivolaniveisiga. “Oi, sa dua dina na vakacegu vei au!” a kaya o koya. A sega ni rawa ni waraka me talanoataka vei ira na nona itokani kei ira tale eso na lewe ni Lotu. A kila o koya ni raivotu nei Peresitedi Smith ena vukei ira na Yalododonu me ra marautaka me ra cakava na cakacaka ni valetabu me baleti ira na tamata ena vuravura ni yalo.

Yalododonu, 3:207