Ai Vakatakila vei Emma

Sa veisau vakatotolo sara na bula vei Emma kei Josefa. A kaya vei Josefa na Turaga ni dodonu me kakua ni vakanamata ki na teitei. Ia, sa dodonu vei Josefa me vakayagataka na nona gauna ena nona vakavulici ira na tamata me baleti Jisu Karisito ka vukea na tubu ni Lotu ni Turaga.

Vunau kei na Veiyalayalati 24:7–9; Yalododonu, 1:96

E levu na taro nei Emma me baleta na veisau oqo. E sega ni kila o koya na ka me cakava ni qarava tiko na Turaga o Josefa. Ena vukea talega beka na Turaga kei na Nona Lotu?

Yalododonu, 1:96

A vosa na Turaga vei Emma ena dua na ivakatakila a soli vei Josefa. A vakatokai koya me “Emma Smith, na luvequ yalewa.” A tukuna vei Emma ni a digitaki koya ka kacivi koya me cakava na Nona cakacaka. O koya e dua na marama digitaki, ka tiko Vua na veika cecere me cakava.

Vunau kei na Veiyalayalati 25:1-3

A kerei Emma na Turaga me lako vata kei Josefa. E kaya na Turaga ni na vakamacalataka o Emma na ivolanikalou ka vakavulici ira na lewe ni Lotu. A tukuna vei Emma me vakaliuci Koya ena nona bula ka maroroya na nona veiyalayalati. A yalataka vei Emma ni na tiko vua na Yalona. E vinakata o Koya me vuli, tubu, ka ciqoma na Nona veivakalougatataki.

Vunau kei na Veiyalayalati 25:2, 6–10, 15

A tukuna talega na Turaga vei Emma ni dau taleitaka me rogoca na nodra lagasere na Luvena. E kaya o Koya ni nodra sere na Nona Yalododonu era vaka e dua na masu Vua. A kerei Emma me cakava e dua na ivola ni serenilotu me rawa ni ra lagata vata mai na Yalododonu. A kunea o Emma e vuqa na sere totoka me baleta na Turaga kei na Nona kosipeli ka biuta ki na dua na ivola ni serenilotu.

Vunau kei na Veiyalayalati 25:11–12; Yalododonu, 1:221–22

A tomana tikoga na veisau ni bula nei Emma kei Josefa, ia e kila o Emma ni lomani koya na Turaga ka tiko na nona inaki me baleti koya. A qarava na Turaga kei ira na tamata era tu wavoliti koya. A veivuke o koya me tubu na Lotu i Jisu.

Vunau kei na Veiyalayalati 25:13–15; Yalododonu, 1:221–23