Elijah Able

A kaciva na Turaga e dua na turaga na yacana o Elijah Able me daukaulotu. A vakavulici Eunice kei Charles Franklin o Elijah me baleta na kosipeli i Jisu Karisito. E tukuna vei rau me baleta na Vola i Momani kei na Parofita o Josefa Simici. Erau vakabauta o Eunice kei Charles na veika e vakavulica ka vinakata me rau lewena na Lotu. A papitaisotaki rau o Elijah.

Yalododonu, 1:316

A biubiu o Elijah me wasea na kosipeli ena dua tale na tauni. Dua na bogi, ni oti e vica na vula, a tadra me baleti Eunice na nona itokani. Ena tadra, sa sega tale ni vakadeitaka o Eunice ni dina na iVola i Momani se ni parofita o Josefa Simici. Ni yadra mai o Elijah, a lesu sara vakatotolo me raici Eunice.

Vunau kei na Veiyalayalati75:27; Yalododonu, 1:315–16

A kurabui o Eunice ni raici Elijah ena nona katuba! E dina na tadra nei Elijah: Sa sega tale ni vakabauta o Eunice na iVola i Momani se o Josefa Simici.

Yalododonu, 1:317

A kerei Eunice o Elijah me lako mai me rogoci koya ni vunau ena dua na koronivuli. Ni rogoca na vosa nei Elijah, a vakila tale na Yalo Tabu. E kila ni dina na kosipeli!

Yalododonu, 1:317

A yalataka o Elijah vei Eunice ni na lesu tale mai ena rua na macawa me vunau tale. Ia eso na tamata ena tauni era sega ni vinakata me lesu mai. Ni sa biubiu o Elijah, era sa tekivu tukuna vei ira kece ni a vakamate tamata o Elijah. Era na sauma kevaka e dua ena kunei koya.

Yalododonu, 1:318

E kila o Eunice ni ra lasu tiko na tamata me baleti Elijah. E sega ni vakamatea e dua. E tamata vinaka o koya ka tamata ni Kalou. E kila ni na sega ni tarova na lako mai nei Elijah me mai vunau ena nodra tauni na nodra lasu. A tukuna o Eunice vei ira na tamata ni na lesu tale mai o Elijah. “Ena taqomaki koya na Kalou,” a kaya.

Yalododonu, 1:318

A lesu tale mai o Elijah. A lako mai ki na koronivuli vata ga a vunau kina e liu. Era oso na tamata era vinakata me vesu. A tucake o Elijah e matadra na lewevuqa. E kaya o koya kevaka era vinakata me ra vesuki koya, e dodonu me ra cakava ena gauna oqo, ni bera ni tekivu veivakavulici. Kevaka e sega, me ra vakatara me veivakavulici.

Yalododonu, 1:318

Sega ni dua e yavala. A wawa o Elijah, ia era dabe galugalu na lewevuqa. A lagata o Elijah e dua na serenilotu, masu, ka vakavulica na kosipeli i Jisu Karisito. E sa tiko vata kei koya na kaukauwa ni Kalou. Ni sa oti na nona veivakavulici, a vosa vei rau na nona itokani o Eunice kei Charles ka tomana na nona ilesilesi ena vakacegu.

Yalododonu, 1:319