Soqoni ki Ohio

Na vakabauta nei Lucy Smith kei na dua na cakamana

Eratou vakavakarau tiko o Lucy Smith kei ira na lewe ni matavuvale me ratou toki ki Ohio.

Mai Ohio, era sa lewena tiko na Lotu e lewe vuqa na tamata. A kaya na Turaga vei Josefa Simici ni o ira na Yalododonu era vakaitikotiko ena veivanua tale eso e dodonu me ra soqoni vata mai Ohio. Ena dua na ilakolako balavu. Ia a yalataka na Turaga ni oti na nodra soqoni vata, ena vakavulica o Koya vei ira na Yalododonu na Nona lawa ka vakalougatataki ira ena kaukauwa me ra cakava na Nona cakacaka.

Vunau kei na Veiyalayalati 37; 38:32; Yalododonu, 1:109–110

Eratou vodo waqa o Lucy kei ira tale eso ki Ohio.

O Lucy, na tinai Josefa, kei na dua na ilawalawa e rauta ni 80 na lewe ni Lotu era biuta na nodra itikotiko mai New York ka toki ki Ohio. Era vodo ena dua na waqa ka na kauti ira ena dua na iwase ni ilakolako. Ni oti e vica na siga na nodra lako tiko, me sa na kele na waqa. E tarova na nodra ilakolako na vavaku ni waicevata e wai.

Yalododonu, 1:121–22

Me ra na waraka na Yalododonu me kavoro na waicevata. Era sa oca, viakana, suasua, ka batabata.

Yalododonu, 1:86

Eso na Yalododonu era sa sega ni vosota rawa ka tekivu veiba.

Dredre na wawa. Eso na Yalododonu era sa tekivu veiba vakai ira.

Yalododonu, 1:86

Tukuna vei ira na Yalododonu o Lucy me ra masuta na Kalou me voroka na waicevata ena toba.

A sega ni taleitaka o Lucy me rogoci ira na Yalododonu ni ra veiba. E kila ni dodonu me tukuna e dua na ka. “Evei na nomuni vakabauta?” a taroga. A kaya o Lucy vei ira na Yalododonu ni kevaka mera masu vua na Kalou, ena voroka o Koya na waicevata me rawa nira tomana na nodra ilakolako.

Yalododonu, 1:122–23

Vakasauri ga, era rogoca e dua na rorogo me vaka na kurukuru ni sa kavoro na waicevata. A tadola e dua na sala ena waicevata, rauta vinaka na kena raba me rawa ni lako kina nodratou waqa.

Yalododonu, 1:123

Era soqoni vata mai na Yalododonu me ra vakavinavinaka vua na Tamada Vakalomalagi.

Era kurabui ka vakavinavinaka na Yalododonu. Era soqoni vata mai me ra masu ka vakavinavinaka vua na Tamada Vakalomalagi. A soko yani vakavinaka ki Ohio na nodra waqa.

Yalododonu, 1:123

Nira yaco yani ki Ohio na Yalododonu, era a kidavaki ira na lewe ni Lotu mai kea ka vukei ira mera kunea na vanua mera vakaitikotiko kina. A maroroya na Turaga na Nona yalayala me vakavulica vei ira na Nona lawa ka solia vei ira na kaukauwa mera cakava na Nona cakacaka.

Vunau kei na Veiyalayalati 42; Yalododonu, 1:126