“Na Mataniciva Talei,” iTalanoa ni Vunau kei na Veiyalayalati (2024)
“Na Mataniciva Talei,” iTalanoa ni Vunau kei na Veiyalayalati
Julai 1835–Maji 1842
Na Mataniciva Talei
iKuri ni ivolanikalou mai vua na Turaga
Dua na siga, a lako mai Katiladi e dua na turaga kei na matakau mai Ijipita. E tiko vata kei na matakau eso na ivolavivigi, se dua na iwiliwili ni pepa makawa sara. E volai tu vaka-Ijipita na ivolavivigi. A vakaraitaka na turaga oqo vua na Parofita o Josefa Simici. A taleitaka sara ga o Josefa na volavola.
Yalododonu, 1:219–20
Eso na itokani era vukei Josefa me volia na matakau kei na ivolavivigi. Ni vulica o Josefa na volavola, a vakatakila vua na Turaga na volavola makawa mai vei Eparaama, e dua na parofita ena iVolatabu. Ena nodra veivuke na itokani me vakataki Oliver Cowdery, a vola kina o Josefa na veika a vakavulica vua na Turaga me baleta na ivakavuvuli nei Eparaama.
Yalododonu, 1:220
A raica o Eparaama e dua na raivotu ni noda bula vata kei na Tamada Vakalomalagi ni bera ni da sucu. A raica ni a digitaki o Jisu me noda iVakabula. E vulica tale ga o Eparama na buli ni vuravura. Era sa nanamaki na Yalododonu me ra rawata na ivakavuvuli oqo mai vei Eparaama. Era marautaka ni vinakata na Turaga me vakavulici ira vakalevu cake.
Eparaama 2:6–11; 3–5; Yalododonu, 1:220
Na volavola nei Eparaama a yaco me tiki ni dua na ivola ni ivolanikalou ka vakatokai na Mataniciva Talei. E tiko tale ga ena ivola oqo na volavola nei Mosese, e dua tale na parofita ena iVolatabu. E vakavulica na ka dina e yali tiko mai na iVolatabu. E vinakata na Turaga me ra kila na tamata na dina oqo, ka qai wasea kina vei Josefa Simici.
Na Mataniciva Talei e tiko talega kina na ivakadinadina nei Josefa Simici kei na 13 na Yavu ni Vakabauta. A vola o Josefa Simici na veika oqo me tukuna ki vuravura na veika era vakabauta na Yalododonu Edaidai. Na Mataniciva Talei e ivola lailai, me vaka na mataniciva na kena lailai, ia e talei sara.