Biuti Nauvu ka Gole ki na Ra

A sa mai mate oti o Josefa Simici. Ena gauna oqo eratou a liutaka tiko na Lotu o Brigham Young kei iratou na iApositolo tale eso. A kila tu o Brigham ni ra sa na sega tale ni qai taqomaki vinaka na Yalododonu e Nauvu. E dodonu me ra sa na biubiu. Ia taumada, a vinakata na Turaga me ra vakacavara na tara ni valetabu. A vinakata o Koya me ra caka veiyalayalati vata kei Koya ka vauci vakamatavuvale.

Yalododonu, 1:571, 579–80

Ni oti e vica na vula, sa vakarau tu na valetabu vei ira na tamata me ra cakava kina na veiyalayalati. E udolu vakaudolu na Yalododonu era a lako mai ki na valetabu. A tiko voli ena valetabu o Brigham me yacova sara na bogilevu me vukei ira ena nodra cakava na veiyalayalati kei na Turaga. Kena itinitini, sa qai tukuna o Brigham vei ira kece ni sa gadrevi me ra biuti Nauvu.

Yalododonu, 1:582

Ni yadra mai o Brigham ena mataka ka tarava, era sa wawa tu ena valetabu e vuqa tale na Yalododonu. A tukuna vei ira o Brigham ni ra sega ni taqomaki vinaka ke ra tiko ga e Nauvu. Era gadreva me ra kunea e dua na itikotiko vou ki na Ra. A yalataka ni ra na rawa ni tara e dua na valetabu vou ni ra sa yaco yani ki kea.

Yalododonu, 1:582–83; 2:13–14

Ia era a sega ni biubiu na Yalododonu. Era a vinakata me ra caka veiyalayalati rawa kei na Turaga ni bera ni ra tekivuna nodra ilakolako ki na dua na itikotiko vou.

Yalododonu, 1:583

A raica na matadra o Brigham ka veisautaka na nona vakasama. A vakayagataka na vo ni siga oya kei na siga ka tarava me vukei ira na Yalododonu me ra caka veiyalayalati ena valetabu.

Yalododonu, 1:583

Oqo ni ra sa cakava oti na Yalododonu na veiyalayalati kei na Turaga, sa kena gauna me ra biuti Nauvu. A kila tu o Brigham ni sa vakarautaka tu na Turaga e dua na tikina me nodra. A sa raica oti o koya ena dua na raivotu. Era a tekivuna na nodra ilakolako. A batabata na draki, ka soso na dela ni qele. Era a tauvimate na tamata. A tekivu oti mai na kakana.

Yalododonu, 2:16–18, 20–21

Se balavu sara na sala me ra lakova. A vakataroga o Brigham se rawa vakacava me ra lakova e dua na ilakolako balavu ka dredre vakaoqo. A masuta o koya na veivuke ni Kalou.

Yalododonu, 2:46

A solia na Turaga vei Brigham e dua na ivakatakila. A vakavulici Brigham ena ivakarau me liutaki ira kina na Yalododonu. A kaya o Koya ni dodonu me ra veivukei ena nodra qaravi na dravudravua.

Vunau kei na Veiyalayalati 136:1–8

A kaya na Turaga ni dodonu me ra nanuma tiko na Yalododonu na veiyalayalati era a cakava vata kei Koya. Kevaka era cakava oqori, ena vakalougatataki ira o Koya ka vukei ira ena nodra ilakolako.

Vunau kei na Veiyalayalati 136:4, 11, 42; Yalododonu, 2:47

A se dredre vakalevu tikoga na ilakolako. Eso na tamata era a mate. Ia ena vuku ni nodra veiyalayalati ena valetabu, era a kila tu kina na Yalododonu ni ra na raici ira tale nodra lewe ni matavuvale.

Ni oti e vica na vula, era a yaco yani na isevu ni Yalododonu ki na Bucabuca e Salt Lake ena 1847. Ni raica o Brigham Young na buca, a kaya, “Oqo na vanua donu.” Sa ikoya na vanua vata ga a raica ena raivotu. Oqo na vanua era na taqomaki kina na Yalododonu. Eke e rawa ni ra qarava kina na Turaga ka cakava na Nona cakacaka ena vakacegu.

Yalododonu, 2:17, 64–67

Ni toso tiko na veiyabaki, a levu cake tikoga na Yalododonu era yaco mai. Era a tara e vuqa tale na valetabu, me ra caka veiyalayalati kina na tamata kei na Turaga. Era a vakauti ira yani na daukaulotu ki vuravura raraba me vakavulica na kosipeli i Jisu Karisito. A toso tikoga na tubu ni Lotu ni iVakabula, ka vakalougatataki ira tiko na luvena na Tamada Vakalomalagi e veivanua kecega.