Na Keba ni Isireli

Vulica mo nuitaka na Turaga

O ira na Yalododonu e Misuri era vakaitikotiko ena valelaca.

Era a gadreva tu na veivuke na Yalododonu ka ra a vakaitikotiko e Inidipenideni, Misuri. Era a cakacaka vakaukauwa me ra tarai Saioni cake me vaka a kerea na Kalou. Ia eso tale na tamata ena tauni era a sega ni vinakata me ra tiko kina. Era a vakasaurarataki ira na Yalododonu me ra biuta na nodra itikotiko.

Yalododonu, 1:195

Ni mai kila o Josefa Simici na nodra dredre na Yalododonu e Misuri.

A vakaitikotiko e Katiladi o Josefa Simici. A rogoca o koya na ka a yaco vei ira na Yalododonu e Misuri, ka rarawa sara kina. A masulaka me kila na ka me cakava. A tukuna na Turaga vei Josefa me vakasaqarai ira na tamata me lako vata kei koya ki Misuri. Era a nuitaka ni na vukei ira na Yalododonu na matanitu me vakalesui mai na nodra vale.

Vunau kei na Veiyalayalati 103:1–2, 11–20, 30–34; Yalododonu, 1:195–96

Na Keba ni Isireli era vakavakarau tiko me ra vukei ira na Yalododonu e Misuri.

E rauta ni 100 na tamata era a bole me ra tomani koya. A vakatoka na ilawalawa oqo na Parofita me Keba ni Isireli. Era a marautaka me ra laki vukei ira na Yalododonu e Misuri.

Yalododonu, 1:197–99

Kidavaki Brigham Young, Heber Kimball, kei Wilford Woodruf o Josefa

Rau a tiki ni ilawalawa oqo o Brigham Young kei na nona itokani o Heber Kimball. E dua na cauravou na yacana o Wilford Woodruff a lako sara mai Niu Ioka me mai veivuke.

Yalododonu, 1:197–98

Era vakacegu tiko na lewe ni Keba ni Isireli.

E levu tale na tamata era a curu ki na keba. Era a tayabe me dua taucoko na vula ka takosova e dua na uciwai rabailevu ki Misuri. Era a oca ka mosi. Na tayabe balavu oqo a veivakacudrui talega kivei ira eso na tamata. Se yawa sara na nodra sala me ra yaco kina ki na siti o Inidipenideni.

Yalododonu, 1:200–201

E dua na marama e tukuna vei Josefa ni dua na ilawalawa tagane era vakasaqara voli na Keba ni Isireli.

Ni ra tayabe tiko, a kacivi ira mai e dua na marama. A kaya mai ni so na tagane era lako tiko mai mera vakamatei ira.

Yalododonu, 1:203

Lima na tagane vodo ose tiko ka vakarerei Josefa kei na Keba ni Isireli.

Era a cegu vakabogi na Keba i Isireli ena dua na delana ena dela ni dua na uciwai. Ni ra tara keba tiko, eratou a vodo ose yani e lima na tagane. Eratou a boletaka ni 300 tale na tagane era lako tiko mai me kaba na keba. Era a lomaleqa kina e vuqa na lewe ni Keba ni Isireli. A tukuna vei ira o Josefa me ra vakabauta ga ni na vukei ira na Kalou.

Yalododonu, 1:203

Vakaruru tiko o Josefa kei na so tale ena loma ni dua na valenilotu.

Sega ni dede sa vakaturubuto mai na lomalagi ena o loaloa. A tekivu tau bi mai na uca. A dave mai na uciwai. A vakabalea na vei vunikau na cagi. A lidi mai ni yaseyase e lomalagi. Eratou a kunea o Josefa kei na so tale e dua na valenilotu lailai me ratou taqomaki kina. Era a lagasere tu ni lotu ena bogi taucoko oya. “Sa tiko na Kalou ena cava oqo!” A kaya o Josefa.

Yalododonu, 1:203–4

Tukuna tiko o Josefa vei ira na lewe ni Keba ni Isireli ni sa rawa me ra lesu ki vale.

Na cava oya a tarovi ira na tamata era a via kabai ira mai. A taqomaki kina na keba. Ia a kaya na matanitu ni na sega ni vukei ira na Yalododonu. A tukuna na Turaga vei Josefa ni sa rawa me ra lesu ki vale na Keba ni Isireli. Sa dodonu vei ira na Yalododonu me ra tarai Saioni ga ena nodra maroroya na ivakaro ni Kalou. A yalataka o Koya ni na “vala ena ivalu kei Saioni.”

Vunau kei na Veiyalayalati 105:1–19; Yalododonu, 1:204–5

Era veivosaki tiko vakai ira na lewe ni Keba i Isireli.

Eso na lewe ni keba era a rarawa ni ra rogoca oqo. Era rarawataka ni ra a sega ni vala ena vukui Saioni. Eso era nanuma ni sa sega ni rawa na inaki ni Keba ni Isireli. Ia eso tale, me vakataki Brigham Young, Heber, kei Wilford, era a vakavinavinakataka na madigi me ratou tiko vata kina kei na Parofita o Josefa ka vuli mai Vua.

Yalododonu, 1:205–6

Sa vakatikori o Brigham Young me dua na iApositolo i Jisu Karisito.

E muri, a qai tukuna na Turaga vei Josefa Simici me kaciva na iApositolo Le Tinikarua me veivuke ena liutaki ni Nona Lotu. O iratou na iApositolo Le Tinikarua eratou ivakadinadina digitaki ni yaca i Jisu Karisito e vuravura raraba. E walu vei iratou na iApositolo Le Tinikarua eratou a tayabe ena Keba ni Isireli. Na nodratou veiqaravi vata kei Josefa a vukea na nodratou vakarautaki ki na veikacivi bibi oqo.

Vunau kei na Veiyalayalati 18:26–27; 107:23; Yalododonu, 1:214–17