“Ciqoma o Josefa kei Oliva na iDola ni Matabete,” iTalanoa ni Vunau kei na Veiyalayalati (2024)
“Ciqoma o Josefa kei Oliva na iDola ni Matabete,” iTalanoa ni Vunau kei na Veiyalayalati
Epereli 1836
Ciqoma o Josefa kei Oliva na iDola ni Matabete
Sikova na Valetabu e Katiladi o Jisu Karisito kei ira na agilosi
Ni oti e dua na macawa mai na kena vakatabui na Valetabu e Katiladi, era a soqoni vata e dua na udolu na Yalododonu ena valetabu me ra qarava na iVakabula. E a Sigatabu ni Siganimate. Eratou a solia na sakaramede vei ira na Yalododonu o Josefa Simici, Oliva Kaudari, kei iratou na iApositolo Le Tinikarua.
Vunau kei na Veiyalayalati 110, ulutaga ni iwasewase; Yalododonu, 1:239
Ni oti na sakaramede, erau a raica yani o Josefa kei Oliva e dua na vanua vakanomodi ena valetabu, ena daku ni ilati, me rau masu kina.
Vunau kei na Veiyalayalati 110, ulutaga ni iwasewase; Yalododonu, 1:239
Ni rau sa masu oti, erau a rai cake. A tucake tu e matadrau o Jisu Karisito! E kila o Koya ni ra a cakacaka vakaukauwa na Yalododonu me ra tara na valetabu. “Au sa ciqoma na vale oqo,” a kaya o Koya. A tukuna o Jisu vei Josefa kei Oliva ni veivakalougatataki ni valetabu ena kauta mai na reki levu vei ira e vuqa na tamata.
Vunau kei na Veiyalayalati 110:1–10
Ni sa biubiu o Jisu, a rairai vei Josefa kei Oliva o Mosese na parofita ni Veiyalayalati Makawa. A solia vei rau na idola ni matabete ni nodra vakasoqoni vata na Isireli. Sa kena ibalebale oqo ni sa rawa ni rau liutaka na cakacaka ni kena wasei na kosipeli. Sa rawa ni rau vakauti ira na daukaulotu ki vuravura taucoko me kauti ira mai na tamata ki na Lotu ni iVakabula.
Vunau kei na Veiyalayalati 110:11
Tarava, a rairai mai na parofita o Ilaisa. A solia o koya vei Josefa kei Oliva na idola me vakalesui mai kina na veiyalayalati vaka-Eparaama. Sa kena ibalebale oqo ni sa rawa vei ira na Yalododonu mera ciqoma mai vua na Turaga na veiyalayalati vata ga a ciqoma o Eparaama. Ena tu vei ira na kaukauwa mera kauta mai na kosipeli kei na veivakalougatataki ni Kalou kivei ira na tamata ena veivanua kecega ena vuqa na yabaki mai muri.
Vunau kei na Veiyalayalati 110:12
Kena itinitini, sa qai rairai mai na parofita o Ilaija. A solia o koya vei Josefa kei Oliva na idola ni matabete me vauci, se vakaduavatataki kina na matavuvale ki na veigauna tawamudu. Na cakacaka era cakava na Yalododonu ena valetabu ena ciqomi mai lomalagi. Sa tu oqo ena Lotu na kaukauwa me cakava na cakacaka ni iVakabula ka vakavakarau ki na Nona lako tale mai ki vuravura.