Kerea o Parley na Veivosoti

Ni sa gauna me rau vakaluveni kina o Thankful kei Parley Pratt, erau a lesu mai vale mai na nodrau kaulotu mai Kenada. E dua na luvedrau gonetagane bulabula me vaka ga a yalataka na Turaga ni na vakakina.

Yalododonu, 1:270

E ka ni rarawa ni a mate o Thankful ni oti e vica na auwa mai na gauna a sucu kina na gonelailai. E kila o Parley ni na sega ni rawa ni qarava na gone ni sega o koya. A kerea e dua na marama mai Kirtland me qarava na gonelailai ni lesu tale ki Kenada me laki vakacavara na nona kaulotu.

Yalododonu, 1:270

Mai Kirtland, a tekivuna o Josefa Simici e dua na baqe me kumuna na ilavo me baleta na cakacaka ni Kalou. A kerei ira na tamata me ra vakatara na baqe me vakayagataka na nodra ilavo me rawa ni ra dinau kina eso tale. Ia, ena vuqa na vuna, a sega ni veirauti na ilavo ni baqe ka sa mai sogo kina. Era sa lusi tale tikoga na baqe tale eso e Amerika.

Yalododonu, 1:260–61, 264–68

Sa yaco me dredre na bula vei ira na Yalododonu. Eso sa sega na nodra cakacaka ka sa sega ni veirauti na nodra ilavo me voli kina na kakana se isulu. Eso era cudruvi Josefa, eso mada ga na nona itokani voleka. Era nanuma ni sega ni parofita dina o Josefa baleta ni sa lusi na baqe.

Yalododonu, 1:264–68, 272–275

Ni yaco tiko oqo, a lesu mai vale o Parley mai na nona kaulotu. Na leqa ni baqe e vakadredretaka tale ga na bula nei Parley. Ena sega ni veirauti na nona ilavo me sauma kina na nona vale, ka na sega ni dua na nona vanua me vakaitikotiko kina.

Yalododonu, 1:270–71

Ia oqo sa cudruvi Josefa tale ga o Parley. A vola e dua na ivola vei Josefa. A tukuna vei Josefa ni se vakabauta tikoga na iVola i Momani. Ia a tukuna talega na veika ca me baleta na Parofita. A tukuna vei Josefa ni cala nona tekivutaka na baqe ena imatai ni gauna.

Yalododonu, 1:271

E muri, era a lako mai ki Kirtland eso na itokani nei Parley mai Kenada. A vakatavulica vei ira o Parley na kosipeli, ka ra marautaka ni ra raici koya tale.

Yalododonu, 1:279–80

Ia era kurabui talega ni sa yali na nodra vakabauta o Parley kei na vuqa tale ni o Josefa Simici e parofita.

Yalododonu, 1:279–80

E dua vei ira na itokani nei Parley mai Kenada o John Taylor. Ni raici koya o Parley, a tukuna vei John na nona cudruvi Josefa Simici. A tukuna vei John me kakua tale ni muri Josefa.

Yalododonu, 1:280

A vakananuma o John vei Parley ni gauna rau tiko kina mai Kenada, a wasea o Parley na nona ivakadinadina ni o Josefa Simici e parofita dina. “Sa tu vei au na ivakadinadina vata ga oqo,” a kaya o John. “Kevaka a dina na cakacaka ena ono na vula sa oti, e dina e daidai. Kevaka a parofita o Josefa Simici ena gauna o ya, sa parofita tiko oqo.”

Yalododonu, 1:280

E kila o Parley ni dina na nona itokani o John. E rarawataka na nona ivola ni cudru vei Josefa. E kila o koya ni sa solia tiko o Josefa na nona vinaka taucoko me cakava na cakacaka ni Turaga. Na leqa ni baqe e sega ni kena ibalebale ni sega ni parofita dina i Jisu Karisito o Josefa.

Yalododonu, 1:283

A lako o Parley kina vale nei Josefa. A tukuna vei Josefa me vosota na veika ca a tukuna. A vosoti Parley o Josefa, masulaki koya, ka vakalougatataki koya. A kaulotu vakalevu cake o Parley ka tukuna vei ira na tamata e vuravura taucoko nio Josefa Simici e parofita ni Turaga.

Vunau kei na Veiyalayalati 64:7–11, Yalododonu, 1:283