iTalanoa ni iVolanikalou
Sa Tauyavutaki Na Lotu i Jisu Karisito

“Sa Tauyavutaki na Lotu i Jisu Karisito,” iTalanoa ni Vunau kei na Veiyalayalati (2024)

“Sa Tauyavutaki na Lotu i Jisu Karisito,” iTalanoa ni Vunau kei na Veiyalayalati

Epereli 1830

2:37

Sa Tauyavutaki Na Lotu i Jisu Karisito

Dua na soqoni rekitaki ni Lotu

A kidavaki ira na tamata o Josefa Simici ki na vale nei Whitmer ena imatai ni soqoni ni Lotu.

Sa tabaki oqo na iVola i Momani, ka sa tu tale e vuravura na kaukauwa ni matabete ni Kalou. A kaya na Turaga vei Josefa Simici ni sa kena gauna me tauyavutaki na Lotu i Jisu Karisito.

Yalododonu, 1:84

Era laveta cake na ligadra na tamata me ra tokoni Josefa kei Oliver me ra iliuliu ni Lotu.

Ena ika 6 ni Epereli, 1830, era a lako mai e rauta ni 40 na yalewa kei na tagane ki na nodratou vale na matavuvale na Whitmer me ra tauyavutaka na Lotu. A kacivi Josefa kei Oliver na Turaga me rau liutaka na Nona Lotu. Rau a kerei ira na tamata o Josefa kei Oliver me ra laveta na ligadratou me vakaraitaka ni ratou tokoni rau me rau nodratou iliuliu.

Vunau kei na Veiyalayalati 20:1–3; Yalododonu, 1:84

Era marautaka na lewe ni Lotu vou na nodra dau kania na sakaramede.

Tarava, rau a vakalougatataka na sakaramede o Josefa kei Oliver. Erau solia vei ira na tamata me vukei ira mera nanumi Jisu Karisito. Rau sa qai tabaka na uludra na tamata era sa papitaiso o Josefa kei Oliver. Erau vakadeitaki ira me ra lewe ni Lotu ka solia vei ira na isolisoli ni Yalo Tabu.

Vunau kei na Veiyalayalati 20:75–79; Yalododonu, 1:85

Vakavulici ira na lewe ni Lotu vou o Josefa.

A solia na Turaga vei Josefa e dua na itukutuku me baleta na Lotu vou. A tukuna vei ira me ra vola na veika a yaco ena Lotu. A kaya ni o Josefa Simici na Nona parofita. A yalataka vei ira na lewe ni Lotu ni kevaka era muria na ivakaro a solia vei Josefa o Koya, ena vakalougatataki ira o Koya. Ena sega ni rawai ira na tevoro.

Vunau kei na Veiyalayalati 21:1–6; Yalododonu, 1:85

Rau veimokomoko tiko o Josefa Simici kei tamana.

Era marautaka vakalevu na tamata na kena tiko na Lotu i Jisu Karisito! Ni oti na soqoni, era a papitaiso e vuqa na tamata, oka kina na tinai Josefa kei na tamai Josefa. Ni sa lako mai wai o tamana, a mokoti koya vakalevu o Josefa. “Au a bula meu raici tamaqu ni papitaiso ki na lotu dina i Jisu Karisito!” a kaya.

Yalododonu, 1:86

A vakavinavinaka vakalevu o Josefa me vukea na kena vakalesui mai na Lotu.

Ena bogi oya, a lako o Josefa ki na veikau me laki tiko duadua. E vakasinaiti na lomana ena reki. Sa oti e 10 na yabaki mai na imatai ni gauna a raici Tamada Vakalomalagi kei Jisu Karisito kina. Sa levu sara na ka e yaco me tekivu mai na gauna oya. A vakavinavinaka vakalevu o Josefa ni rawa ni veivuke ena kena vakalesui mai, se kauta lesu mai, na Lotu i Jisu Karisito!

Yalododonu, 1:86