Mary kei Caroline Rollins

A yabaki 12 o Mary Rollins ena imatai ni gauna era a sikovi Kirtland, Ohio kina na daukaulotu. A rogoci rau ni rau vosa me baleta na iVola i Momani. Ena gauna oya, a dua ga na ilavelave ni ivola mai Katiladi, ka a nona e dua na iliuliu ni Lotu na yacana o Isaac Morley.

A lako kina vale nei Baraca Morley o Mary ka kerea me raica na ivola. A vakatara o Baraca Morley me taura. A kerea o Mary me kauta i vale.

A sega ni vinakata o Baraca Morley me solia vei Mary na nona ilavelave ni ivola. E se bera ni wilika kina e levu na ka. A vakamasuti Baraca Morley o Mary me vakatara me kauta mada.

A vakadonuya o Baraca Morley. E kaya o koya ni rawa ni kauta i vale o Mary na ivola kevaka me na kauta lesu mai ena mataka lailai ka tarava. E vakamareqeta o Mary me vaka ga e dua na iyau talei. E yadra tu vakabalavu ena bogi ena nona wiliwili.

Ni solia lesu o Mary na ivola, a kurabuitaka o Baraca Morley na levu ni ka e wilika. “Na gone,“ e kaya o koya, “kauta na ivola oqo ivale ka wilika vakaoti. Au rawa ni wawa.”

O Mary e imatai ni tamata mai Katiladi me wilika taucoko na iVola i Momani. Ni oti ga nona wilika, a sotavi Parofita Josefa Simici. Ni sa kila o koya na levu ni nona taleitaka o Mary na iVola i Momani, a kaya ni rawa ni nona na ilavelave nei Baraca Morley. Ena solia vei Baraca Morley e dua tale.

E mua ni yabaki oya, eratou a toki i Inidipenideni i Misuri o Mary kei na nona matavuvale. A marautaka o koya me sarava na nodra tekivu biuta vata na iliuliu ni Lotu e dua na ivola vou ka vakatokai na iVola ni iVakaro. Na ivola oqo e tu kina e vuqa na ivakavuvuli a solia o Jisu Karisito vei Josefa Simici.

Vunau kei na Veiyalayalati 67; 70:1–4; Yalododonu, 1:178

Ia eso na tamata e Inidipenideni era a sega ni taleitaka na Lotu. Era vinakata mera lako tani na Yalododonu. Dua na siga, eso na tagane era a basuka na vale ka tabaki tiko kina na iVola ni iVakaro. Era kolotaka ituba na misini ni tabaivola mai na katubaleka, era ceburaka na draunipepa i gaunisala.

Yalododonu, 1:177–78

Erau sarasara toka mai na daku ni dua na bai o Mary kei tacina, o Caroline. E tukuna o Mary vei Caroline ni vinakata me maroroya na draunipepa ni bera nira vakacacani. A rerevaki ira na tagane yaloca o Caroline. “Era na vakamatei kedaru,” e kaya o koya. Ia erau kila o Mary kei Caroline ni tiko veidraunipepa oqori na vosa ni Kalou.

Yalododonu, 1:178

Erau wawa toka na veitacini marama me yacova ni ratou sa sega ni rai tiko mai na tagane. Erau a cici yani na veitacini ki gaunisala ka kauta mai na levu ga ni draunipepa erau kumuna rawa. Eso na tagane era a raici rau ni rau sa vakusakusa yani ka ra kailavaka mai me rau tu vakadua. Rau a qumia matua na draunipepa o Mary kei Caroline ka cici yani ki na dua na loga ni sila voleka.

Yalododonu, 1:178–79

Rau a vakasavi rau na veitacini ki na loganisila e rua na turaga. Era babalavu sara na sila, erau sega ni raica rawa o Mary kei Caroline na vanua erau lako tiko kina. Rau a davo ena qele o Mary kei Caroline ka rau bika na draunipepa. Erau a vakarorogo vakamalua ni rau lako voli na tagane e rua ena loma ni sila ka vakasaqarai rau.

Yalododonu, 1:179

Sega ni dede erau sa soro na tagane. Erau sa drobula o Mary kei Caroline. Erau sa maroroya na tabana ni ivakatakila ni Turaga me baleta na iVola ni iVakaro. E daidai era sa tabaki tu na veivakatakila oqori ena Vunau kei na Veiyalayalati.

Yalododonu, 1:179