Vulica o Josefa kei Sidini na ka vaka Lomalagi

Ena dua na siga erau a wilika tiko o Josefa Simici kei Sidini Rikitoni na iVola Tabu. Erau wilika na ka ena yaco vei ira na tamata ni ra sa mate. Rau vakasamataka o Josefa kei Sidini na veika erau wilika, ka rau vinakata me rau vulica eso tale na ka.

Vunau kei na Veiyalayalati 76:11–18

A solia vei rau na Turaga e dua na raivotu vakasakiti. E rau raica na Tamada Vakalomalagi kei Jisu Karisito nira vakavolivoliti rau tu na agilosi. E rau rogoca e dua na domo ni kaya nio Jisu na Luve ni Kalou. E kaya na domo ni a mate o Jisu ena vukuda ka qai tucake tale—A bula tale mai o Koya. Baleta ni a vakayacora o Koya, eda na tucake tale talega.

Vunau kei na Veiyalayalati 76:19–24, 39–43

Erau vulica o Josefa kei Sidini ni oti na noda tucake tale, eda na bula ena dua vei iratou na tolu na vanua mai lomalagi, ka vakatokai na matanitu. O ira era sega ni ciqoma na kosipeli i Jisu Karisito era na lako ki na matanitu vakatilesitieli. A vakatauvatana na Turaga na matanitu oqo kina rarama ni kalokalo.

Vunau kei na Veiyalayalati 76:81–86

Erau vulica tale ga o Josefa kei Sidini e dua na matanitu e vakatokai na matanitu vakateresitieli. Na matanitu oqo e baleti ira na tamata era bulataka na bula vinaka ia era sega ni talairawarawa taucoko kina kosipeli i Jisu Karisito. Era sega ni kaukauwa ena nodra vakabauti Koya. A vakatauvatana na Turaga na matanitu oqo kina rarama ni vula.

Vunau kei na Veiyalayalati 76:71–80

Na matanitu cecere duadua sai koya na matanitu vakasilesitieli. Era a cakava na veiyalayalati, se yalayala, vua na Kalou na tamata ena matanitu oqo ka maroroya na nodra veiyalayalati. Era veivutuni ka muri Jisu Karisito. Era bula vata kei na Tamada Vakalomalagi kei Jisu me tawamudu ka yaco me vakataki Rau. A vakatauvatana na Turaga na matanitu oqo kina rarama ni matanisiga.

Vunau kei na Veiyalayalati 76:50–70

A kaya na Turaga vei Josefa kei Sidini me rau kakua ni wasea na veika kece erau a raica ena nodrau raivotu. E vinakata o Koya me rau vola eso ka wasea vei ira tale eso. E vuqa na lewe ni Lotu era a marautaka mera tukuna vei ira na tamata na raivotu oqo.

Vunau kei na Veiyalayalati 76:113–119, Yalododonu, 1:149–50

Ia eso na tamata era a sega ni taleitaka na raivotu. E duidui mai na ka era vakabauta. Ia e vuqa vei ira na Yalododonu era vakavinavinakataka na nodra kila na ivakatakila oqo. E vakaraitaka vei ira ni lomani ira na Luvena na Tamada Vakalomalagi ka cakava e dua na sala mera lesu tale Vua.

Yalododonu, 1:149–50