Era Soqoni ki Saioni na Knights kei na So Tale

Rau a vakaitikotiko vata kei na nodrau matavuvale o Polly kei Joseph Knight mai New York. Erau kila vinaka na Parofita o Josefa. Ni oti na nodrau vulica na kosipeli, erau sa digitaka me rau lewena na Lotu. Ni sa kerei ira na Yalododonu na Turaga me ra toki ki Ohio, erau talairawarawa na Knight.

Vunau kei na Veiyalayalati 37; Yalododonu, 1:33, 94, 109–110

Erau marau na Knight ni rau yaco yani i Ohio. E dua na lewe ni Lotu o Leman Copley, e kaya ni so na Yalododonu e rawa ni ra vakaitikotiko ena nona qele. E veirauti na vanua mera teivaka ka tara vale. Erau cakacaka vakaukauwa o Joseph Knight kei iratou na luvena tagane me ratou vakarautaka na iteitei me ratou teivaka.

Yalododonu, 1:126–27

Ia ena dua na siga, a veisautaka nona vakasama o Leman me baleta na nona qele. A sega ni vinakata me ra tiko tale e kea na Yalododonu. A tukuna vei iratou na Knights kei ira kece me ra sa biubiu.

Yalododonu, 1:127

Era sa lomaleqa na Yalododonu. Sa sega na vanua me ra tiko kina. Era tarogi Josefa na Parofita se cava me ra cakava.

Vunau kei na Veiyalayalati 54; Yalododonu, 1:127

E kaya na Turaga ni dodonu mera lako ki Misuri na Yalododonu oqo ka tarai Saioni. O Saioni ena dua na koro ka rawa ni ra soqoni vata kina na tamata ni Turaga. Mai Saioni, era na tara e dua na valetabu mera cakava kina na veiyalayalati, se yalayala vata kei na Kalou. Ena vakalougatataki ira o Koya kevaka era maroroya na veiyalayalati oqo. Eratou sa nanamaki tiko na Knights me ratou lako.

Vunau kei na Veiyalayalati 29:1–8; 42:30–36; 45:59–66; 54:6–9; 57:1–2; Yalododonu, 1:128

Ni ratou lako tiko na Knight ki Misuri, a tauvimate sara vakalevu o Polly. Eratou lomaleqataka na watina, o Josefa, kei iratou na luvena tagane ni na sega ni bula balavu. Ia a tukuna o Polly vei ratou na nona matavuvale ni vinakata me tiko mai Saioni ni bera ni mate. E vinakata vakalevu cake mai na veika kecega!

Yalododonu, 1:128

Ni oti e dua na ilakolako balavu, eratou yaco yani na Knights ki Misuri. A vakavinavinaka vakalevu o Polly vua na Turaga ni a bula me raica. Eratou nanuma na Knights ni totoka na vanua. E tu vei ira na vakabauta ni rawa ni ratou muria na ivakaro ni Turaga me ratou tarai Saioni mai kea.

Yalododonu, 1:132

Era a cavuta na Yalododonu e dua na masu ka vakatoka na vanua o Saioni, na vanua era na lako mai kina na tamata ni Turaga. A biuta na Parofita o Josefa e dua na vatu me vakatakilakilataka na vanua ena tiko kina na tutu ni valetabu. Ni oti e vica na siga, a mate o Polly. A yalataka na Turaga ni o ira na Yalododonu era lako mai ki Saioni ka mate era na vakacegu mai lomalagi.

Vunau kei na Veiyalayalati 59:1–2, Yalododonu, 1:132–33