Dua na Siga ni Veivakabulai

Vakalougatataki ira na tauvimate ena kaukauwa ni Kalou

Vosa tiko vei Josefa Simici e dua na yadra ni valeniveivesu.

Na gauna ratou vesu tu kina mai Misuri o Josefa Simici kei ira na iliuliu tale eso ni Lotu, era kauti ira eso na yadra kina dua tale na valeniveivesu. Era yalovinaka na yadra vei ira na kaivesu. Ena dua na bogi, a tukuna na iliuliu ni yadra vei Josefa ni sa na moce, kevaka e via dro o Josefa kei ira na nona itokani, ena sega ni tarovi ira.

Yalododonu, 1:392–93

Kidavaki ratou na nona matavuvale o Josefa.

Eratou a dro o Josefa kei ira na vo ni iliuliu ni Lotu. Era kunea na nodra matavuvale nira sa vakaitikotiko ena dua na tauni na yacana o Quincy.

Yalododonu, 1:395–96

O ira na tamata era solia na kakana kei na vale vei ira na Yalododonu.

Era a yalovinaka vei ira na Yalododonu na tamata mai Quincy. Era solia vei ira na Yalododonu na kakana kei na isulu kei na dua na vanua me ra tiko kina.

Yalododonu, 1:377

Era sa tekivu tarai Nauvoo cake na Yalododonu.

Era vakavinavinakataka na Yalododonu na nodra yalovinaka na tamata mai Quincy. Ia e kila o Josefa nira na gadreva ga na nodra vanua mera vakaitikotiko kina. Era volia na iliuliu ni Lotu eso na qele ka sega tale ni dua e vinakata, ka ra sa tekivu toki kina na Yalododonu.

Yalododonu, 1:399–400

E dua na marama e qarava e dua tale na marama tauvi malaria.

E volekata e dua na uciwai levu na vanua oya. E suasua ka soso ka sinai ena namu. Era tauvimate bibi e vuqa na Yalododonu ena dua na mate na malaria. Eso vei ira era mate.

Yalododonu, 1:402

Rau solia o Josefa Simici kei Wilford Woodruff e dua na veivakalougatataki ni matabete vua e dua na gone tagane tauvimate.

Ni raica o Josefa nira sa tauvimate e vuqa na tamata, a vakasoqoni ira vata eso na iliuliu ni Lotu ka kerei ira mera lako vata kei koya. Ena mataka taucoko, era lako mai na dua na matavuvale kina dua tale na matavuvale, ka sikovi ira na tauvimate ka vakalougatataki ira. Era vakayagataka na kaukauwa i Jisu Karisito me vakabulai ira mai na nodra tauvimate.

Yalododonu, 1:402

Veivosaki tiko o Josefa kei Elijah Fordham.

E dua na tamata rau a sikova o Elijah Fordham. A tauvimate sara vakalevu, ka nanuma o watina ni na mate ena dua na gauna lekaleka mai oqo. A tarogi Elijah o Josefa ke tiko vua na vakabauta me vakabulai kina.

Yalododonu, 1:402

A tukuna vei Josefa o Elijah ni sa tu vua na vakabauta me vakabulai.

A kaya o Elijah, “Au rerevaka ni sa bera.” A tarogi Elijah o Josefa kevaka e vakabauti Jisu Karisito. “E vakakina, Baraca Josefa,” a sauma mai.

Yalododonu, 1:402

A tucake o Elijah ni oti na nona ciqoma na veivakalougatataki ni matabete.

A vakalougatataki koya o Josefa e na yaca i Jisu Karisito. A tucake o Elijah. Sa vakabulai koya o Jisu! A qai muri Josefa o Elijah kina vale ka tarava ka vukei koya me vakalougatataki ira eso tale era tauvimate.

Yalododonu, 1:402–3