iQaqi nei Hawn

A yabaki 11 o Willard Smith. A vakaitikotiko na nona matavuvale ena iQaqi nei Hawn, Misuri, vata kei ira tale eso na Yalododonu. Era a vinakata me ra soqoni vata ena dua na gauna totolo kei ira na Yalododonu ena Mua i Ra.

Vunau kei na Veiyalayalati 115:7–8; Yalododonu, 1:347–48

Ena dua na siga, a tiko voli o Willard kei tamana kei rau na tacina, o Sardius kei Alma. Vakasauri ga, eratou a rogoca na vanavana kei na qoqolou. Era a lako mai na tamata mera valuti ira na Yalododonu.

Yalododonu, 1:348–49

Era cici kece yani me ra laki taqomaki. E vuqa na tagane kei na gone era a vuni ena sitoa ni buli kaukamea. Eratou a curu talega yani o tamai Willard kei iratou na tacina, ia a tawase tani mai vei iratou o Willard. A vunitaki koya ena daku ni dua na ibinibini kau. A rogoca o koya na vanavana wavoliti koya.

Yalododonu, 1:349, 353

A cici o Willard mai na dua na vanua ki na dua tale me laki vuni. E muri, a qai mudu na vanavana. Era a biuta na iQaqi nei Hawn o ira na dauravuravu.

Yalododonu, 1:353

A lako mai o Willard ki na sitoa ni buli kaukamea me vakasaqara na nona matavuvale. Erau a vakamatei o tamana kei Sardius. Ia o Alama na taci Willard lailai a se bula tiko.

Yalododonu, 1:353

A lauvana e tolona o Alama. A mavoa sara vakaca. A laveti Alama mai o Willard ka kauti koya ki na nodratou valelaca vakamatavuvale.

Yalododonu, 1:353–54

O tinai Willard, o Amanda, a sega ni kila me qarava vakacava na toloi Alma. Ia a kila o koya ni kila tu na Kalou. A masu, ka rogoca e dua na domo ni tukuna vua na ka sara ga me cakava.

Yalododonu, 1:354

A savata o Amanda na mavoa nei Alama ena dravusa. Oti sa qai tukia eso na waka ni vunikau ka biuta ena nona mavoa. Qai viviga na tolona ena isulu. “Davo koto ga vaka oqori, ka kakua ni yavala,” a kaya koya, “ena cakava vei iko na Turaga e dua tale na tolomu.”

Yalododonu, 1:354–55

E muri, a qai kaya na kovana e Misuri ni dodonu me ra biuta na yasana o ya na Yalododonu de ra na vakamatei. Ia a se bera tikoga ni vinaka cake na toloi Alama. A masu o Amanda ka kerea na veivuke ni Turaga. A tukuna vua e dua na domo ni na sega vakadua ni biuta na nona matavuvale o Jisu. A vakila o Amanda ni sega ni dua na ka ena rawa ni vakaleqai koya.

Vunau kei na Veiyalayalati 88:83; Yalododonu, 1:372, 378–79

Ni oti ga na nona masu, a rogoca o Amanda ni ratou kaikaila na luvena. A cici yani me raici iratou, ia ni sa yaco yani, sa cici wavoki voli o Alma. “Au sa bula vinaka, Na, au sa bula vinaka!” a kaya mai o koya. Sa vakabulai na tolona! Oqo e a dua na cakamana mai vua na Turaga. Eratou a biuti Misuri o Amanda kei iratou na luvena me ratou laki vaqara e dua na vanua taqomaki vata kei ira na vo ni Yalododonu.

Yalododonu, 1:379