“Samuel Smith Wasea na iVola i Momani,” Vunau kei na iTalanoa ni Veiyalayalati (2024)
“Samuel Smith Wasea na iVola i Momani,” iTalanoa ni Vunau kei na Veiyalayalati
1830–1832
Wasea o Samuel Smith na iVola i Momani
E dua na ivola e vakalougatataka e vuqa na bula
A kacivi Samuela Simici na Turaga, na taci Josefa gone, ena dua na kaulotu me wasea na kosipeli. A sotavi John kei Rhoda Greene o Samuela ka tukuna vei rau na veika me baleta na iVola i Momani. A dauvunau tiko o John ena dua tale na lotu. E kaya ni na taura e dua na ilavelave ni ivola ka raica kevaka e dua ena nona lotu e via wilika.
Yalododonu, 1:99
Ni oti e vica na vula, a lesu mai o Samuela. E kaya o Rhoda ni sega ni kunea rawa o watina e dua e vinakata me wilika na iVola i Momani. A solia lesu vei Samuela.
Yalododonu, 1:99
A rarawa o Samuela. A vuki me biubiu, ia a tarovi koya o Rhoda. E kaya ni sa wilika oti na iVola i Momani, ka taleitaka.
Yalododonu, 1:99
A tukuna na Yalo Tabu vei Samuela me solia lesu na ivola vei Rhoda. “Kerea vua na Kalou me solia vei iko e dua na ivakadinadina,” a kaya vua o Samuela. A vakavulici Rhoda me baleta na Yalo Tabu kei na sala ena kila kina o koya ni dina na iVola i Momani.
Moronai 10:3–5; Yalododonu, 1:99–100
A lesu tale i vale o Samuela mai na nona kaulotu. A sega ni papitaisotaka e dua, ka vica wale ga na tamata era taleitaka na iVola i Momani.
Erau masu o Rhoda kei John, ka tukuna vei rau na Yalo Tabu ni dina na iVola i Momani. Sa qai wasea o Rhoda na ivola vei tacina o Brigham Young.
Yalododonu, 1:100
Erau a vakasaqara tiko o Brigham kei na nona itokani, o Heber Kimball, na Lotu dina i Jisu. Erau wilika na iVola i Momani. Erau a vulica ka masulaka na kosipeli i Jisu Karisito me voleka ni rua na yabaki.
Ena gauna oqo, erau a lako o Brigham kei Heber ki na soqoni ni Lotu vata kei na nodrau matavuvale. Ena dua vei ira na soqoni oqo, a rogoca kina o Brigham e dua na daukaulotu ni wasea na nona ivakadinadina. E sega ni vosa cecere na daukaulotu, ia a vakila o Brigham na Yalo Tabu ni vosa tiko. E kila o Brigham ni tukuna tiko na ka dina.
Eratou a papitaiso o Brigham, Heber, kei na watidrau, o Miriam kei Vilate. Era lomana na iVakabula kei na Nona kosipeli. Ni oti e vica na yabaki, a kacivi Brigham kei Heber na Turaga me rau Nona iApositolo ka laki kaulotu. Baleta ni a wasea o Samuela na iVola i Momani, e vuqa na tamata era lewena na Lotu ni iVakabula.
Vunau kei na Veiyalayalati 124:127–29; 126; Yalododonu, 1:215–16