Na Kaulotu nei Pali ki Kenada

Ni oti ga vakalailai na kena vakatabui na Valetabu e Katiladi, era a lako ki kaulotu e vuqa na iliuliu ni Lotu me ra vunautaka na kosipeli.

Vunau kei na Veiyalayalati 88:81; 109:22–23; 112:28–29; Yalododonu, 1:249

E dau taleitaka o Parley Pratt na wasea na kosipeli. Ia e nanuma ni dodonu me tiko ga e vale baleta ni tauvimate tiko na watina na yacana o Thankful. E sega talega ni levu na nodrau ilavo.

Yalododonu, 1:249

A lako mai o Heber Kimball, na itokani nei Parley kei na dua vei ira na iApositolo, me mai veisiko. A solia vei Parley e dua na veivakalougatataki ka kaya ni dodonu me vunautaka na kosipeli i Kenada. Ena veivakalougatataki, a yalataka o Heber ni na vinaka cake o Thankful A yalataka ni na dua na luvena tagane ka na vukei Parley na Turaga me rawata na ilavo e gadreva.

Yalododonu, 1:249–50

Sa tini na yabaki na nodrau veiwatini o Thankful kei Parley. E sega ni dua na luvedrau. Ia erau vakabauta na yalayala ni Turaga. E dina ga ni na dredre ni tu yawa sara mai vei Thankful mai Kenada, a biubiu o Parley me laki wasea na kosipeli.

Yalododonu, 1:250

Mai Kenada, a vaqara o Parley na vanua e rawa ni vakavulici ira kina na tamata. A kerea kevaka e rawa ni veivakavulici ena veivalenilotu kei na veivale tale eso. Era kaya na tamata kecega, sega.

Yalododonu, 1:252–53

Sa qai sotavi John kei Leonora Taylor o Parley. Erau lomani Jisu Karisito kei na iVolatabu. A tarogi Parley o John ke duidui na ka e vakavulica mai na iVolatabu.

Yalododonu, 1:252–53

E kaya o Parley ni a vakavulica na veika baleti Jisu, parofita, papitaiso, kei na Yalo Tabu. Na veika kece oqori e tiko ena iVolatabu. Taroga o John, “Vakacava o Josefa Simici kei na iVola i Momani?” A kaya vei John o Parley ni kila ni dina na iVola i Momani, me vaka ga na iVolatabu, ka parofita ni Kalou o Josefa Simici.

Yalododonu, 1:253

A vakabauta o John na ka e tukuna o Parley. A wilika na iVola i Momani ka kila ni dina. Rau sureti ira na nodrau itokani o John kei Leonora o Joseph, Mercy, kei Mary Fielding kei ira tale eso me ra lako mai ka rogoca na veivakavulici nei Parley. E vuqa na tamata era a papitaiso ka lewena na Lotu.

Yalododonu, 1:254–55

A marau o Parley, ia a vinakata me lesu i vale vei Thankful i Kirtland. A vakamoce vei ira na nona itokani vou mai Kenada. Ni lululu vei ira, era solia vua na ilavo me vukei koya me qarava na nona matavuvale.

Yalododonu, 1:255–56

Ni yaco yani i vale o Parley, a raica ni sa vinaka cake sara o Thankful. A rawata o Parley e levu cake na ilavelave ni iVola i Momani ka lesu tale ki Kenada me wasea tikoga na kosipeli. Ena gauna oqo, a lako vata kei koya o Thankful.

Yalododonu, 1:256

Sega ni dede rau sa qai kila o Parley kei Thankful ni rau na vakaluveni. Erau nanuma na veivakalougatataki a solia o Heber vei Parley. Erau vakila ni sa yaco dina na veika kece a yalataka na Turaga ena veivakalougatataki o ya.

Yalododonu, 1:256