Qarava na Turaga o Telii

E dua na marama na yacana o Telii a vakaitikotiko ena dua na yanuyanu lailai ka vakatokai o Tubuai. Eso na gauna era dau veisiko yani ki Tubuai na daukaulotu mai na veimatalotu duidui, ia e sega soti ni dau dede na nodra tiko kina. Ena dua na siga ena 1844, a marautaka o Telii ni rogoca ni ra sa yaco yani ki Tubuai na daukaulotu mai na Lotu i Jisu Karisito ni Yalododonu Edaidai.

Vunau kei na Veiyalayalati 1:1; 133:8

Erau a gole tiko na daukaulotu ki na so na yanuyanu lelevu cake. Ia era a vinakata na tamata e Tubuai me rau tiko ga ka vakavulica na kosipeli. Erau a kaya o Telii kei na watina, o Nabota, ni rawa ni rau tiko ena nodrau vale na daukaulotu. A vakadonuya kina e dua vei rau na daukaulotu, o Addison Pratt.

Yalododonu, 1:573–74

Rau a wasea o Telii kei Nabota vei Addison na veika kece e tu vei rau. Erau vakavulici koya me vosataka na nodra vosa. A vakavulici rau o Addison me baleti Jisu Karisito.

A tukuna na Yalo Tabu vei Telii kei Nabota ni sa dina na kosipeli ni iVakabula. Sai rau na isevu ni tamata e Tubuai me papitaiso.

Yalododonu, 1:573–74

Eratou a yaco me veitokani vinaka sara o Telii, Nabota, kei Addison. Eratou a lako vata ka vakavulica na kosipeli e Tubuai kei na veiyanuyanu tale eso. Ni ra tovolea na tamata me ra tukuna vei ira na Yalododonu e Tubuai ni a sega ni dodonu me ra lewena na Lotu, a vakavulica vei ira o Telii mai na ivolanikalou ni dina na Lotu.

Yalododonu, 2:27, 45

A vinakata o Telii me vukea e vuqa na tamata e Tubuai me ra vulica na kosipeli i Jisu Karisito. E dau tuva na ivolanikalou ki na ivakatagi ka sureti ira na ilawalawa levu me ra lagasere vata kei koya ena veiyakavi. Na nodra lagata na sere nei Telii a vukea e vuqa na tamata me ra vuli mai na ivolanikalou ka dau nanuma tiko na veika era a vulica.

Vunau kei na Veiyalayalati 25:12

Ena vica na yabaki e muri, era a lako mai ki Tubuai e vuqa tale na daukaulotu, oka kina na matavuvale nei Addison. A kidavaki ira o Telii ki na nona vale. A cakacaka vata kei na wati Addison, o Louisa, me qaravi ira na marama ni Tubuai.

Yalododonu, 2:133–34

Ni oti e dua na gauna, era a vakasaurarataki na daukaulotu me ra biuti Tubuai kei na veiyanuyanu tale eso. Ia a vakavulici ira ka liutaki ira tikoga na Yalododonu o Telii. Ena vuku ni ivakaraitaki kei na veiqaravi nei Telii, a tudei tu ga kina na Lotu e Tubuai.

Yalododonu, 2:150–51