Jihadharini na Jaribu la Pili

Miaka kadhaa iliyopita, nilipofikisha umri wa miaka 12, nilialikwa kuhudhuria kambi yangu ya kwanza ya Ukuhani wa Haruni kwa usiku mmoja. Huu ulikuwa mwaliko uliosubiriwa kwa muda mrefu kwani baba yangu alikuwa kiongozi wa akidi na mara nyingi alienda kupiga kambi na wavulana wa kata, wakati nilipokuwa nimeachwa nyumbani.

Siku ilipofika, nilifurahi. Na lazima nikiri kwamba nilitaka sana kuwa sehemu ya wavulana wakubwa. Nilikuwa nimedhamiria kujithibitisha. Katika juhudi hiyo haikuchukua muda mrefu kabla ya kujaribiwa ili kuona kama nitakubalika na kuwa sehemu ya kundi.

Kazi niliyopewa ilikuwa kupata funguo za gari la baba yangu ili mzaha uweze kuletwa kwa viongozi. Sikumbuki kile hasa nilichosema ili kumshawishi baba yangu, lakini punde nilikimbia kwenye kikundi cha wavulana nikiwa na funguo mkononi, nikijivunia mafanikio yangu.

Kisha likaja jukumu linalofuata. Nilipaswa kufungua mlango wa gari na kuweka fimbo kati ya kiti cha dereva na honi ya gari. Na nilipaswa kufunga mlango ili honi ilie jioni bila njia yoyote ya kulifikia gari ili kuondoa kifaa ghafi.

Sasa, hapa ndipo hadithi inageuka kuwa chungu na ya aibu kwangu. Mara tu nilipoweka fimbo mahali pake, nilifunga mlango na kukimbia haraka iwezekanavyo kujificha kwenye shamba karibu na vichaka. Nilipoinama chini, nilihisi maumivu makali. Katika giza na kwa haraka yangu, nilikuwa nimekaa juu ya miiba ya dungusi kakati.

Mayowe yangu ya maumivu yalimezwa na honi iliyolia, na sikuwa na njia nyingine isipokuwa kurudi kwenye gari, kukiri “dhambi” zangu, na kutafuta matibabu ya kawaida na ya aibu.

Usiku uliobakia wa usiku huo, nililala kifudifudi kwenye hema wakati baba, kwa kutumia pakari, aliondoa miiba ya dungusi kutoka kwenye … unajua, wacha niseme tu kwamba sikuweza kukaa vizuri kwa siku kadhaa baadaye.

Nimetafakari juu ya uzoefu huo mara nyingi. Sasa ninaweza kucheka upumbavu wa ujana wangu hata wakati kanuni zingine za msingi zimekuwa wazi kwangu.

Mifumo mingi katika tabia ya mwanadamu inaonekana kuwa ya kawaida kwa mwanadamu wa tabia ya asili—hamu ya kukubalika, hamu ya kujithibitisha, hofu ya kukosa, na hitaji la kulazimisha la kujificha ili tuepuke matokeo. Ni tabia hii ya mwisho ambayo nitaizingatia leo—kujificha baada ya kufanya kitu ambacho hatupaswi kukifanya.

Sasa, silinganishi mzaha wangu wa kitoto na dhambi kubwa, lakini tunaweza kuchora ulinganifu ambao unaweza kuwa muhimu tunapojaribiwa katika maisha yetu ya kufa.

Katika bustani ya Edeni, Adamu na Hawa walikuwa na hali nzuri—chakula kingi, uzuri usio na kifani wa bustani—sio tu bustani ya uzuri bali bustani isiyo na magugu wala miiba ya kuchoma.

Hata hivyo, tunajua pia kwamba maisha ya bustanini yalipunguza maendeleo yao yanayohitajika. Bustani haikuwa kituo cha mwisho bali mtihani, wa kwanza kati ya mingi ambayo ingethibitisha, kuwaandaa, na kuwaruhusu kuendelea hadi kituo chao cha mwisho cha kurudi kwenye uwepo wa Baba na Mwana.

Utakumbuka kuwa kulikuwa na upinzani katika bustani. Lusiferi aliruhusiwa kuwajaribu Adamu na Hawa. Kwanza alimjaribu Adamu kula tunda la mti wa ujuzi wa mema na mabaya. Akikumbuka amri ya kutokula hilo tunda, Adamu alikataa. Kisha akaja Hawa aliyebarikiwa, ambaye alichagua kula tunda hilo, akimshawishi Adamu afanye vivyo hivyo.

Baadaye, Adamu na Hawa walitangaza kwamba uamuzi huu ulikuwa muhimu ili kutimiza mpango wa Baba wa Mbinguni. Lakini kwa kula tunda hilo, walikuwa wamevunja sheria—sheria waliyopewa moja kwa moja kutoka kwa Baba. Matokeo na uzito wa uelewa wa mema na mabaya lazima uliwaacha katika uchungu waliposikia sauti ya Baba ikitangaza kurudi kwake kwenye bustani. Walitambua walikuwa uchi, kwani walikuwa kwa kweli bila mavazi, wakiwa wameishi katika hali ya kutokuwa na hatia. Lakini pengine uchungu zaidi kuliko kuwa kwao bila nguo kwa wakati huo, sasa walikuwa wamefunuliwa kwa kosa lao. Hawakuwa na ulinzi na walikuwa hatarini. Walikuwa uchi kwa kila maana ya neno.

Daima mwenye fursa, Lusiferi, akijua hali yao ya wazi na dhaifu, aliwajaribu tena—wakati huu wajifiche kutoka kwa Mungu.

Jaribu hili—nitaliita “jaribu la pili”—ni jaribu ambalo linaweza kuleta matokeo makubwa ikiwa litatushinda. Hakika, kuepuka majaribu yote ya kwanza ya kuvunja sheria ya Mungu ni bora, lakini tunajua kwamba wote tutashindwa na aina mbalimbali za majaribu ya kwanza hapa duniani. Tunapoendelea katika ukomavu na ufahamu wetu, tunatumaini kwamba nguvu zetu za kuepuka majaribu ya kwanza zitaendelea kuboreshwa kadiri tunavyojitahidi kuwa zaidi kama Mwokozi wetu, Yesu Kristo.

Wengine wanaweza kujaribu kujificha kutoka kwa Mungu kwa sababu hawataki kugunduliwa au kuwekwa wazi, na wanahisi aibu au hatia. Hata hivyo, maandiko mengi yanatufundisha kwamba kujificha kutoka kwa Mungu haiwezekani. Nitashiriki machache.

Bwana anamfundisha Yeremia kupitia maswali yafuatayo: “Je, kuna mtu yeyote anayeweza kujificha mahali pa siri hata nisimwone? asema Bwana. Je! Mbingu na nchi hazikujawa nami?”

Na Ayubu alifundisha:

“Kwani macho yake ya juu ya njia za mtu, naye huiona mienendo yake yote.

“Hakuna weusi, wala giza la kifo, wawezapo kujificha watendao udhalimu.”

Mtunga Zaburi Daudi kwa ushairi zaidi anashangaa:

“Ee Bwana, umenichunguza, na kunijua.

“Wewe wajua kuketi kwangu na kuondoka kwangu, umelifahamu wazo langu tokea mbali. …

“Kwa maana hakuna neno ulimini mwangu, lakini, tazama, Ee Bwana, unalijua kabisa. …

“Niende wapi nijiepushe na roho yako? au niende wapi niukimbie uso wako?

“Kama ningepanda mbinguni, wewe uko: Ningefanya kuzimu kitanda changu, wewe uko.”

Waongofu Wapya

Kwa wale ambao hivi karibuni wamejiunga na Kanisa la Yesu Kristo la Watakatifu wa Siku za Mwisho, jaribu la pili linaweza kuonekana kuwa na changamoto sana. Kupitia ubatizo wako umefanya agano la kujichukulia juu yako jina la Yesu Kristo, ambalo kwa wengi inajumuisha mabadiliko yanayohitajika ya mtindo wa maisha. Kubadilisha mtindo wa maisha wa mtu si rahisi. Mara nyingi inakuhitaji kubadili tabia na mazoea na hata washirika ili kusonga mbele kuelekea kwa Baba yako wa Mbinguni mwenye upendo.

Adui anajua kuwa unaweza kuwa hatarini kwa mashambulizi yake ya hila. Atafanya maisha yako ya zamani, ambayo yalikuacha bila kuridhika kwa njia nyingi, sasa yaonekane yenye mvuto usio halisi. Mshitaki, kama anavyoitwa katika kitabu cha Ufunuo, atakujaribu kwa mawazo ambayo yanasikika kama hivi: “Huna nguvu za kutosha kubadilisha maisha yako; huwezi kufanya hivi; wewe si wa watu hawa; hawatakukubali kamwe; wewe ni dhaifu sana.”

Ikiwa mawazo haya yanaonekana kuwa kweli kwenu ambao mmepandwa hivi karibuni kwenye njia ya agano, tunakusihi usisikilize sauti ya mshtaki. Tunakupenda; Unaweza; tunakukubali; na pamoja Naye, utakuwa na nguvu ya kufanya yote. Wakati ambapo unahitaji upendo na msaada wetu zaidi, usidanganywe kufikiria kwamba tutakukataa ikiwa utarudi nyuma katika maisha yako ya awali. Kupitia nguvu isiyo na kifani ya Upatanisho wa Yesu Kristo, unaweza kufanywa mzima tena. Lakini ikiwa unajificha kutoka Kwake na kujitenga na jumuiya yako mpya ya imani, unajitenga na chanzo ambacho kinaweza na kitakupa nguvu ya kushinda.

Rafiki yangu mpendwa, mwongofu wa hivi karibuni, alishiriki jinsi ilivyo vigumu kudumisha imani kwa kutengwa. Kuna nguvu kubwa katika kuwa na kubaki sehemu ya jumuiya inayounga mkono—wote wakijikwaa lakini wakiendelea huku wakibarikiwa na upendo wa Yesu Kristo.

Rais Russell M. Nelson amefundisha kwamba “kuushinda ulimwengu siyo tukio ambalo hutokea katika siku moja au mbili. Linatokea maisha yote tunaporudia rudia kuyakumbatia mafundisho ya Kristo. Tunapanda imani katika Yesu Kristo kwa kutubu kila siku na kushika maagano ambayo hutuvisha nguvu. Tunabaki kwenye njia ya agano na tunabarikiwa kwa kuwa na nguvu ya kiroho, ufunuo binafsi, ongezeko la imani, na kuhudumiwa na malaika.”

Ikiwa utapata jeraha la kimwili, hali yako itazorota na inaweza kuhatarisha maisha ikiwa hutatafuta matibabu sahihi. Hiyo ni kweli kwa majeraha ya kiroho pia. Ni majeraha tu, ya kiroho ambayo hayajatibiwa ndiyo yanaweza kutishia wokovu wako wa milele. Usijifiche kutoka kwa wale ambao watakupenda na kukuunga mkono; badala yake, wakimbilie. Maaskofu, marais wa matawi, na viongozi wazuri wanaweza kukusaidia kupata nguvu kamili za Upatanisho wa Yesu Kristo.

Kwa wale ambao wanaweza kuwa mafichoni, tunawasihi mrudi. Unahitaji kile ambacho injili na Upatanisho wa Yesu Kristo hutoa, na tunahitaji kile unachotoa. Mungu anajua dhambi zako; huwezi kujificha kutoka kwake. Jipatanishe mbele Zake.

Kama Watakatifu Wake, kila mmoja wetu lazima akuze utamaduni wa kuwa katika Kanisa ambao lina upendo, linakubali, na kuwatia moyo wote wanaotamani kuendelea katika njia Yake.

Jihadharini na Jaribu hili la Pili! Fuata ushauri wa manabii wa zamani na wa sasa na ujue kwamba huwezi kujificha kutoka kwa Baba mpendwa.

Badala yake, jipatie nguvu ya uponyaji ya kimiujiza ya Dhabihu ya Kulipia Dhambi ya Yesu Kristo. Hili ndilo kusudi hasa la kuwepo kwetu—kupata mwili dhaifu na wa kufa ambao “uko chini ya kila aina ya udhaifu” na ambao utashindwa, kwa masikitiko, majaribu mengi ya kwanza; kusonga mbele hata pale tunapoanguka kwenye majaribu haya; na kutafuta msaada wa kimungu baada ya kufanya hivyo, ili tuweze kuwa kama Mwokozi wetu na Baba yetu wa Mbinguni. Ni njia Yake. Ndiyo njia pekee. Juu ya kweli hizi ninashuhudia katika jina la Yesu Kristo, amina.