Library
Faamanuiaga Faaleperisitua

“Faamanuiaga Faaleperisitua,” Autu ma Fesili (2023)

teineitiiti o loo mauaina se faamanuiaga faaleperisitua

Taiala mo le Suesueina o le Talalelei

Faamanuiaga Faaleperisitua

Valaauliaina o le mana o le Atua i o tatou olaga

E tusa lava po o le a lo tatou matua po o tulaga o le olaga, o le a lagona e i tatou taitoatasi se manaoga faanatinati i nisi taimi ina ia faamanatu atu le alofa o le Atua ma maua le taitaiga faalelagi. E faasoa mai e lo tatou Tama Faalelagi Lona alofa, poto, ma le mana ia i tatou e ala mai i punaoa taua. O nisi o auala e mafai ona tatou maua ai le taitaiga patino ma le fesoasoani mai le Atua e mafai ona aofia ai tusitusiga paia, upu a perofeta soifua, o tatou faamanuiaga faapeteriaka, ma le mafutaga a le Agaga Paia.

O le isi auala e mafai ona tatou lagona ai auaunaga a le Atua i o tatou manaoga o le mauaina lea o se faamanuiaga faaleperisitua. E mafai ona tatou talosagaina se faamanuiaga faapitoa faaleperisitua i soo se taimi tatou te oo ai i le le mautonu po o le ma’i po o soo se taimi lava tatou te mananao ai i se fesoasoani faaopoopo faaleagaga. Na aoao mai Peresitene Henry B. Eyring, “O le mafuaaga mo lo tatou mauaina o le perisitua o le, ina ia mafai ona tatou faamanuia i tagata mo le Alii, e faia lea i Lona suafa. O le tuuina atu o faamanuiaga e ala i le faae’e o lima ua avea ma se mamanu na mulimuli ai i latou o loo umia le Perisitua Mekisateko i le talafaasolopito atoa (tagai i le Kenese 48:14–15; Galuega 8:14–17; Alema 6:1).

O Le A Le Faamanuiaga Faaleperisitua?

O se faamanuiaga faaleperisitua o se sauniga lea e tuu ai e se tasi ua faauuina o loo umia le Perisitua Mekisateko ona lima i luga o le ulu o se tagata (tagai i le Numera 27:18; Eperu 6:1–2; Mamona 9:24) ma faaleoina upu o fautuaga, faamafanafanaga, po o faamalologa e pei ona faatonuina ai e le Agaga. O le faataunuuga o nei faamanuiaga e oo mai e tusa ai ma le finagalo o le Atua ma le faatuatua o le tagata ia Iesu Keriso. O se faamanuiaga faaleperisitua e masani lava ona ofoina atu e se tagata o le aiga, uso o auaunaga, po o se taitai o le Ekalesia i le lotoifale, ae e mafai ona ofoina atu e soo se tasi ua faauuina o loo umia le Perisitua Mekisateko. O se faamanuiaga faaleperisitua e tuuina atu e ala i le faaee atu o lima o se auala taua lea e faasafua mai ai e le Atua Ana musumusuga, faamafanafanaga, ma e oo lava i le mana faamalolo i o tatou olaga.

Vaaiga aoao o le autu: Faaee o Lima, Faamanuiaga Faaleperisitua

Taiala e faatatau i le suesueina o le talalelei: Perisitua Mekisateko, Feagaiga ma Sauniga, Vavega

Vaega 1

E Mulimuli e Umia le Perisitua i le Faataitaiga a Iesu Keriso pe a Latou Faamanuia i Isi

faamaloloina o le tagata tauaso

Sa auauna atu Iesu Keriso ia i latou sa manaomia le fesoasoani i le mana faalelagi ofoofogia (tagai, mo se faataitaiga, i le Mataio 4:23–24; 3 Nifae 17:6–9). I taimi o le Feagaiga Fou, sa Ia faamanuiaina isi i le faamagaloga (tagai i le Luka 7:47–50), filemu ma le puipuiga (tagai i le Mareko 4:38–39), ma le faamalologa (tagai i le Ioane 9:1–7). Ma ona sa Ia silafia o le a le umi se taimi e faatasi ai o Ia ma tagata, sa Ia tuuina atu ai foi i Ona soo e toasefululua le pule e faamanuia ai isi (tagai i le Mataio 10:1, 8; Moronae 2:1–3).

I aso nei, o e agavaa o loo umia le Perisitua Mekisateko e faaaogaina le pule lava lea e tasi e faamanuia ai isi. E ala i le faaee atu o lima, e tuuina atu ai e i latou e umia le perisitua se faamanuiaga e tusa ai ma lagona ma musumusuga latou te maua mai le Agaga (tagai i le 2 Nifae 4:12). E masani ona tuuina atu se faamanuiaga faaleperisitua pe a talosagaina e se tagata e manaomia le fesoasoani. E mafai ona tuuina atu faamanuiaga e tuuina atu ai le filemu, faamafanafanaga, faamalologa, po o fautuaga. O nisi taimi e mafai ona o faatasi faamanuiaga faaleperisitua ma se sauniga o le perisitua, e pei o le taimi o le faaigoaina ma le faamanuiaina o fanau, faamauga e maua ai le meaalofa o le Agaga Paia, po o le faauuga i le perisitua.

O i latou e umia le Perisitua Mekisateko o e tuuina atu faamanuiaga e ala i le faaee o lima e tutu o ni sui o Iesu Keriso i le auauna atu i isi. Ua folafola mai le mana o le perisitua ia i latou o e ola i mataupu faavae o le amiotonu ma faalatalata atu i le Atua e ala i le salamo ma le usiusitai i Ana poloaiga (tagai i le Mataupu Faavae ma Feagaiga 121:36).

Mea e mafaufau i ai

  • Pe a tuuina atu e se tasi o umia le Perisitua Mekisateko se faamanuiaga i se isi, e galue o ia i le suafa o le Alii ma Lona mana. Faitau le Mataupu Faavae ma Feagaiga 36:2, ma gauai atu i le uiga o upu a le Faaola i lenei fuaiupu. Ona faitau lea o le saunoaga lenei mai ia Peresitene Harold B. Lee:

    “O loo fetalai mai le Alii iinei [i leMataupu Faavae ma Feagaiga 36:2] e faapea, a tuu e se tasi o ana auauna ua faatagaina ona lima e ala i le pule i luga o le ulu o se tasi ina ia faamanuiaina, e pei lava o loo tuuina atu e ia lava lona lima faatasi ma i latou e faatino lena sauniga. O lea la ua amata ona tatou vaai i le auala na te faaalia ai lona mana i tagata e ala i ana auauna o e ua Ia tuuina atu i ai ki o le pule.”

    E faapefea ona uunaia e lenei mau lau vaaiga e uiga i faamanuiaga faaleperisitua? O a ni aafiaga na e mauaina faatasi ma le Agaga a o e mauaina pe tuuina atu se faamanuiaga faaleperisitua?

Gaoioiga mo le aoao faatasi ma isi

  • E ui atonu tatou te matele i le faafesootaia o faamanuiaga faaleperisitua i tagata o e tuuina atu—o alii o e umia le Perisitua Mekisateko—e taua le manatua o le mana o le perisitua e na o Iesu Keriso lava e oo mai ai. Faitau faatasi o se vaega le Mataupu Faavae ma Feagaiga 121:36–37, 41–46 . O le a se mea ua e aoaoina mai nei fuaiupu e uiga i mea o loo faamoemoeina e le Atua mai soo se tasi e manao i se mana faaleagaga sili atu? E mafai faapefea e i tatou taitoatasi ona atiina ae lelei nei uiga i o tatou olaga?

  • Matamata le vitio “Faapaia Outou Lava” (4:37) o se vaega. Ae e te lei amataina le vitio, valaaulia tagata o le vaega e vaai faalemafaufau ia i latou lava i le tulaga o loo faaalia a o latou matamata. A uma ona matamata le vitio, valaaulia tagata o le vaega e faasoa mai o latou manatu. Aisea e taua ai le saili ia mama mo soo se tagata e manaomia le mana o le lagi?

Aoao atili

Vaega 2

Faamanuiaga Faaleperisitua mo le Faamalologa o Ma’i

tamaitiiti ma’i o loo mauaina se faamanuiaga faaleperisitua

Sa auauna atu Iesu Keriso i fanau a le Atua i le tele o auala anoa a o soifua o Ia i le lalolagi. Sa Ia faaalia le alofa atoatoa a o Ia faamāmāina mafatiaga o e mama’i ma puapuagatia e ala i le faamaloloina o i latou (tagai i le Mataio 8:16–17; Mosaea 3:5–6). Sa Ia faatonuina Ona soo e o atu ma faamalolo i e mama’i (tagai i le Mataio 10:1). Ua faaalia i le Feagaiga Fou o lenei mamanu o le faaee atu o lima i e mama’i e faamalolo ai i latou sa mulimuli i ai le Ekalesia anamua a Iesu Keriso (tagai i le Galuega 3:1–8; 9:12, 17; 28:8; Iakopo 5:14–15). Ua mulimuli foi e ua umia le Perisitua Mekisateko i ona po nei i lenei lava mamanu pe a latou faauuina e mama’i i le suauu ua faapaiaina ma faamanuia i latou e ala i le faaee o lima (tagai i le Mataupu Faavae ma Feagaiga 42:43–44; 66:9).

Ua faamanatu mai e Peresitene Dallin H. Oaks ia i tatou: “A o tatou faaaogaina le mana e le masalomia o le perisitua a le Atua, ma a o tatou teufatuina Ana folafolaga o le a faafofoga ma tali mai o Ia i tatalo faatuatua, e ao ona tatou manatua i taimi uma, o le faatuatua ma le mana faamalolo o le perisitua, e le mafai ona aumaia ai se taunuuga e ese mai ma le finagalo o Le, ana le perisitua. O lenei mataupu faavae ua aoaoina mai i le faaaliga lea na faatonuina ai toeaina o le Ekalesia e tuu atu o latou lima i luga o e mama’i. O le folafolaga a le Alii e faapea ‘o le ua faatuatua mai ia te au, ma ua le tofia e oti, o le a faamaloloina’ (MF&F 42:48; faaopoopo le faamamafa).”

Mea e mafaufau i ai

  • E mafai faapefea ona e saunia faaleagaga oe lava pe a sailia se faamanuiaga faamalolo mo oe lava ia po o isi? A o e mafaufau i lenei fesili, faitau le Iakopo 5:15; Iakopo 3:1; Alema 15:10–11; ma le Eteru 12:12. O le a le uiga o le fuaitau “tatalo o le faatuatua” ia te oe? O a isi mataupu faavae taua o loo maua i nei fuaitau?

  • O le naunau e faatuatuaina le finagalo o le Atua o se vaega taua lea o soo se tatalo po o se faamanuiaga faaleperisitua. Faitau le Mosaea 4:9. E mafai faapefea e le mataupu faavae na aoaoina e le Tupu o Peniamina i lenei fuaitau ona fesoasoani ia te oe e lagona ai le saunia lelei e talia le finagalo o le Atua?

Gaoioiga mo le aoao faatasi ma isi

  • Pe a ma’i se tasi, e masani lava ona tatou mananao e faia mea uma tatou te mafaia e fesoasoani ai ma faamāmā ona mafatiaga. E taua uma faamanuiaga faaleperisitua ma le tausiga faafomai. Valaaulia tagata o le vaega e faitau le saunoaga lenei a Peresitene Dallin H. Oaks:

    “Ou te fia talanoa atu … e uiga i le faamaloloina o e mama’i—e ala i saienisi faafomai, e ala i tatalo o le faatuatua, ma e ala i faamanuiaga faaleperisitua. … Ioe, tatou te le faatali seia oo ina le aoga isi auala uma ona faatoa tatou tatalo lea ma le faatuatua pe tuu atu faamanuiaga faaleperisitua mo le faamalologa. I tulaga faafuasei, o tatalo ma faamanuiaga e muamua mai lava. O le tele o taimi tatou te faia ai i le taimi e tasi ia taumafaiga uma.”

    Aisea e taua ai le tuufaatasia o a tatou tatalo o le faatuatua ma faamanuiaga faaleperisitua ma le sailia o se fesoasoani faafomai?

Aoao atili

O Isi Punaoa e uiga i Faamanuiaga Faaleperisitua