“Faitogalaau,” Autu ma Fesili (2023)
Vaaiga Aoao
Faitogalaau
“O le ola tutoatasi o le tumutumuga lea o a tatou galuega, ma e faavae ai isi galuega uma faaleuelefea. O se elemene taua i lo tatou soifua manuia faaleagaga faapea foi ma le faaletino.”
O le totoina o se togalaau, e oo lava i se togalaau laitiiti, e mafai ai ona maua se tikeri sili atu o le ola tutoatasi. Faatasi ai ma faamatalaga sa’o ma sina faiga itiiti, e mafai ai e tagata taitoatasi ma aiga atoa ona olioli i le tele o aogā o le totoina ma le tausia o se togalaau.
O loo tuuina mai faamatalaga nei e fesoasoani ia te oe e saunia ai lau togalaau.
Fuafuaina se togalaau
A o amata ona e fuafua ma sauniuni mo se togalaau, o ni nai faamanatu lautele nei:
-
E manaomia e fualaau faisua ia le itiiti ifo ma le ono itula le susulu o le la i le aso.
-
E tatau ona laugatasi lelei le nofoaga o le togalaau. Afai e i ai se tifato, ia faia ni laina o laau faalalava ina ia taofia ai le tafiesea.
-
O se manatu lelei le faafefiloi o le eleele i le loloto o le 12 i le 14 inisi. O le faaopoopoina o mea faalelei eleele natura e pei o otaota o manu, limu pala, po o laulaau o le a aogā i le eleele.
-
Ia faaeteete i faalelei eleele. O faalelei eleele uma lava e i ai se numera faailo e tolu fuainumera. Mo togalaau fualaau faisua, vaavaai mo le 8-8-8 po o le 16-16-16.
-
O le auala sili ona faigofie e aveesea ai meaola faalafua o laau, o le aveesea lea o iniseti, anufe, po o fua i lima. O nisi o pauta e lulu po o vai e faapasī i manu ninii e saogalemu lava e faaaoga.
-
O le loloto talafeagai mo le totoina o fatu e tusa ma le faafa le loloto i le mafiafia o le fatu.
Togalaau i Koneteina
Afai e leai sau togalaau masani, e mafai ona e totoina fualaau faisua ma laau-afu i koneteina e ofi i auala taavale, poletito, taualuga, ma e oo lava i faamalama. O lenei gaoioiga e mafai ona manaia ma faafiafia loto mo tagata matutua ma tamaiti.