Fesootaiga

O soo moni o Iesu Keriso e saili e mulimuli i Lana faataitaiga i auala latou te fesootai atu ai. O a latou fesootaiga, i upu ma faatinoga (e le o ni upu), e ao ona agalelei, agaalofa, ma fesoasoani, e atagia ai se alofa mo fanau a le Tama Faalelagi ma se malamalamaaga faapea o tagata uma o uso ma tuafafine.

Na aoao mai Elder L. Lionel Kendrick o le Au Fitugafulu:

“O fesootaiga faaKeriso e faaalia i siuleo o le alofa ae le o le leotele. E faamoemoe ina ia avea ma fesoasoani ae le o le faatiga. E faamoemoe e noatia faatasi ai i tatou ae le o le faafeeseesea’i. E faamoemoe e fausia ai ae le o le faamaina.

“O fesootaiga faaKeriso o ni faailoga o le alofa ae le o le ita, upumoni ae le o le talafatu, agaalofa ae le o le fefinaua‘i, faaaloalo ae le o le tauemuina, fautuaga ae le o faitioga, faasa‘oga ae le o le ta‘usalaina. E tautalagia ma le manino ae le o le fenumia‘i. Atonu latou te malu pe faigata foi, ae e tatau lava ona agamalu i taimi uma.

“O le luitau moni o loo tatou feagai i a tatou fesootaiga ma isi o le tuu atu lea o o tatou loto ia maua lagona faaKeriso mo fanau uma a le Tama Faalelagi. A tatou atiina ae lenei popolega mo tulaga o isi, ona tatou fesootai lea ma i latou e pei ona faia e le Faaola. Ona tatou faamafanafanaina lea o loto o i latou atonu o loo puapuagatia i le le leoa. A o tatou feiloai i tagata e i ai manaoga faapitoa i le ala o le olaga, ona mafai lea ona tatou faasusulu atili atu la latou malaga i mea tatou te tautatala ai.

“O fesootaiga faaKeriso o le a fesoasoani ia i tatou e atiina ae ai sootaga amiotonu ma iu ai ina toe foi saogalemu atu i lo tatou aiga faalelagi. Tau ina ia tatou faatauaina le meaalofa paia o fesootaiga, ma tau ina ia tatou faaaogaina ma le poto e fausia ma fesoasoani ai i isi i luga o lenei malaga ofoofogia e ala atu i le olaga faitino.”