Mea Tau Tupe a le Ekalesia—Pisinisi Tau Tupe

E umia e le Ekalesia mea e fiafia i ai i pisinisi ia e muamua lava o se taunuuga o pisinisi ia na amata ina ua tuueseeseina le Ekalesia i Sisifo. O pisinisi tau tupe e umia e le Ekalesia e fesoasoani e auauna atu i manaoga o le Ekalesia i le faataunuuina o lana misiona. O tupe na maua mai nei pisinisi tau tupe e laitiiti lava; o le tele o punaoa tautupe i le Ekalesia e sau mai sefuluai ma taulaga a tagata o le Ekalesia.

Na faamatalaina e Peresitene Gordon B. Hinckley: “O le mea moni lava, o aseta faapisinisi ua i ai i le Ekalesia i aso nei o se taunuuga o pisinisi na amataina i le vaitau o paionia o lo tatou talafaasolopito ina ua vavaeeseina i tatou i vanu o mauga o Amerika i sisifo. Mo se faataitaiga, sa manaomia se nusipepa e tausisia ai le fautuaina o tagata i mea sa tutupu i le fale ma fafo atu. O le taunuuga o le Deseret News, lea ua lolomiina nei mo le 135 tausaga. I le 1920, sa uunaia ai e taitai o le malo ia nusipepa e faatulaga ni alaleo o leitio. O le tau amataina lena o le pisinisi faasalalau. O se tasi o alaleo leitio faapena sa faatuina e le Deseret News iinei i le Aai o Sate Leki. Mai lena mea ua tuputupu ae, e ala i le faagasologa masani o le atinaega, o loo i ai ni vaega o meatotino mo faasalalauga.

“E pei ona silafia e outou uma, o le tomai ma fale ma fanua e fesootai ai o nisi ia o o tatou manaoga maoae ma faifai pea. O le anaina o nei meatotino, o nusipepa ma fale faasalalau, a o faagaoioia o ni faalapotopotoga faapisinisi, e fesoasoani tuusao ma lē tuusao mai ia i tatou i lo tatou tiutetauave e fesootai atu la tatou savali ma la tatou vaaiga.

“O le Ekalesia o se paionia i le pisinisi gaosi suka e fesoasoani ai i a tatou faifaatoaga o e sa manaomia se laau mo tupe. O se tasi o a tatou meatotino i le taimi nei o se taunuuga o lena mea.

“Sa fauina se faletalimalo matagofie e lata ane i le Lotoa o le Malumalu i le fitusefulu-lima tausaga talu ai ina ia maua ai se talimalo manaia mo tagata asiasi mai i lenei aai.

“O mea e fiafia i ai tau faafetauaiga o se taunuuga o le gaoioiga tuufaatasi lea sa i ai i o tatou tagata i taimi o paionia. O loo faatumauina pea e le Ekalesia ni meatotino patino e umia, aemaise lava i latou e latalata i le Lotoa o le Malumalu, e fesoasoani e faasaoina le matagofie ma le faamaoni a’ia’i o le totonugalemu o le aai. O nei meatotino uma faapisinisi o ni itutino e totogi ai lafoga.

“… O tupe maua tuufaatasi mai nei pisinisi uma e fiafia i ai, e matua laitiiti lava ma o le a le taofia ai le faia o le galuega mo se taimi umi atu nai lo se taimi puupuu lava.”