میزوری میں مُشکلات

بُہت سے مُقدّسِین اِنڈیپنڈنس، میزوری میں رہنے کے لیے آئے۔ خُداوند چاہتا تھا کہ وہ وہاں صِیُّہون کا شہر تعمیر کریں۔ مگر مُقدّسِین اور اِنڈیپنڈنس میں پہلے سے رہنے والے لوگوں کی آپس میں نہ بن سکی۔ وہ بُہت سے مُعاملات پر مُتفق نہیں تھے۔ شہر کے بعض لوگ ناراض تھے اور مُقدّسِین کو وہاں سے نِکالنا چاہتے تھے۔

عقائد اور عہُود 57:‏1–3؛ مُقدّسِین، 1:‏171–74

ایڈورڈ پارٹریج اِنڈیپنڈنس میں بِشپ تھا۔ وہ شہر کے راہ نُماؤں کے ساتھ ایک میٹنگ میں شریک ہُوا۔ اُنھوں نے کہا کہ مُقدّسِین کو اِنڈیپنڈنس چھوڑنا ہو گا۔ بِشپ پارٹریج جانتا تھا کہ خُدا چاہتا ہے کہ مُقدّسِین اِنڈیپنڈنس میں صِیہون تعمیر کریں۔ اُس نے کہا کہ مُقدّسِین نہیں جا سکتے۔

مُقدّسِین، 1‏:176

مُشتعل آدمیوں نے وہ گھر اور عِمارتیں گِرانا شُروع کر دِیں جو مُقدّسِین نے تعمیر کی تھیں۔

مُقدّسِین، 1‏:177–78، 182

آدمی بِشپ پارٹریج اور چارلس ایلن نامی ایک اور شخص کو اُن کے گھروں سے زبردستی لے گئے۔ وہ اُن دونوں کو گھسیٹ کر شہر کے مرکز میں لے گئے۔

مُقدّسِین، 1:‏179

بِشپ پارٹریج نے کہا، ”اگر مُجھے اپنے مذہب کے لیے تکلیف اُٹھانی پڑے، تو یہ کوئی نئی بات نہیں مُجھ سے پہلے بھی بُہت سے لوگ یہ سہہ چُکے ہیں۔“ آدمیوں نے بِشپ پارٹریج اور چارلس کو زمین پر گِرا دِیا۔ اُنھوں نے اُن کے جسموں پر گرم تارکول ڈال دِیا اور اُنھیں پَروں سے ڈھانپ دِیا۔

مُقدّسِین، 1‏:179–80

اِنڈیپنڈنس میں کلِیسیا کے رُکن، ولیم میک لِیلن، کو معلُوم ہُوا کہ مُشتعل لوگ کیا کر رہے ہیں۔ وہ ڈر گیا اور چھپنے کے لیے جنگل کی طرف بھاگ گیا۔

مُقدّسِین، 1:‏182

ولیم سوچنے لگا کہ اگر مُشتعل اَفراد نے اُسے ڈھُونڈ لِیا تو کیا ہو گا۔ کیا وہ اَب بھی یہی کہے گا کہ مورمن کی کِتاب سچّی ہے، چاہے وہ اُسے اِس کی خاطِر قتل کرنے کی کوشِش کریں؟

مُقدّسِین، 1:‏182–83

ولیم کے دوستوں اولیور کاؤڈری اور ڈیوڈ وِٹمر نے اُسے جنگل میں پایا۔ ولیم جانتا تھا کہ اولیور اور ڈیوڈ مورمن کی کِتاب پر اِیمان رکھتے ہیں۔ فرشتے نے اُنھیں سونے کے اَوراق دِکھائے تھے۔ ”مُجھے بتائیں کہ،“ ولیم نے اُن سے پُوچھا ”کیا مورمن کی کِتاب سچّی ہے؟“

مُقدّسِین، 1:‏183

اولیور اور ڈیوڈ نے ولیم سے کہا کہ مورمن کی کِتاب سچّی ہے۔ اُنھوں نے کہا کہ چاہے مُشتعل آدمی اُنھیں قتل کرنے کی کوشِش کریں، وہ کبھی بھی لوگوں کو اپنی گواہی دینا بند نہیں کریں گے۔ ولیم نے کہا، ”مَیں آپ پر اِیمان رکھتا ہُوں۔“

عقائد اور عہُود 17:‏3–6؛ مُقدّسِین، 1:‏183