Tabu Atoriti, Ol Naesfala Yang Man

Tangkyu Elda Andersen long naesfala toktok ia abaot prishud paoa mo paoa blong Atonmen blong Sevya.

Long wan Sandei moning long Jenuware ia, taem mi stap sidaon long sakramen miting blong mi, ova long twelef yang man oli sastenem olgeta blong oli odenem olgeta i go long Aronik Prishud. Bodi blong mi i save filim wol i jenis.

Mi kam blong luksave se raon long wol, wan taem folem narawan, long ol sakramen miting semmak olsem hemia, oli stap sastenem mo odenem ten blong ol taosen blong dikon, tija, mo pris—olsem fren blong Presiden Holland long moning ia—i go long prishud seves blong laeftaem, we bae i hapen raon long ful wol.

Evri Jenuware, oli stap putum han antap long hed blong samples 100,000 yang man, mo stap joenem olgeta tru long wan odinens we i laen blong atoriti blong hem i gobak biaen olgeta kasem taem blong Restoresen; i go long Josef mo Oliva—i go long Jon Baptaes mo long Jisas Kraes.

Nao, jos blong yumi i no stap mekem samting i laod tumas blong evriwan i luk. Yumi stap mekem samting i kwaet nomo.

Be yet, taem mi luk olgeta we oli jes odenem olgeta wetem prishud oli wokbaot raon long wol, mi stap tingting se—long wan gudfala fasin blong “stap glad” sapos yumi save singaot bigwan from olgeta wetem glad. “Tedei,” mi tingting se, “i sud gat ol trampet mo dram mo ol naes faea. !Yumi sud maj!”

Wetem save we yumi gat abaot tru paoa blong God olsem we i stap, bae yumi luk olsem wanem fasin blong wol ia bae i seksek taem atoriti ia blong God i stap go olbaot long wol.

Ol odinesen ia oli rere long ol yang man ia from wan seves blong laeftaem, taem oli stap long ol impoten taem mo ples we bae oli nidim olgeta mo ol prea blong olgeta, mo ol paoa blong prishud blong God we oli holem we bae i impoten tumas.

Ol taem ia we i stap hapen tugeta raon long wol, i bin stat wetem wan givhan enjel we God i sendem. Jon Baptaes blong bifo we i bin laef bakegen long ded, i bin kamkamaot long Josef mo Oliva mo putum han antap long hed blong tufala mo talem: “Antap long hed blong yutufala, ol wokman we yumi wok tugeta, long nem blong Mesaea, mi givim Prishud blong Aron, we i holem olgeta ki blong ol seves blong ol enjel, mo blong gospel blong fasin blong sakem sin, mo blong baptaes andanit long wota blong kam klin aot long ol sin” (Doktrin mo Ol Kavenan 13:1

Jon i singaotem atoriti ia “Prishud blong Aron,” folem nem blong brata blong Moses mo prishud kompanion blong hem. Long bifo, olgeta we oli holem prishud blong Aron, oli mas tij mo help wetem ol odinens—ol odinens we i lukluk moa blong stap olsem ol disaepol blong fiuja Mesaea, we i Lod Jisas Kraes (luk long Dutronome 33:10).

Buk blong Namba i asaenem gud mo givim wok long olgeta we oli holem prishud blong Aron, abaot olsem wanem blong handelem ol samting blong ol odinens. “Bambae yu mas putumap hem wetem tufala pikinini ya blong hem … wok blong olgeta ya i blong lukaot long … tebol … mo Kaliko we i blokem Rum ya we i Tabu we i Tabu” (Namba 3:10, 31).

Odinens blong OlTesteman blong stap sakrifaesem animol, i bin kam tru mo laef mo Atonmen blong Sevya i bin tekem ples blong sakrifaes ia. Naoia odinens we yumi singaotem sakramen blong Kakae blong Lod, i tekem ples blong odinens ia blong bonem sakrifaes.

Lod i givim wok ia tedei long olgeta we holem prishud blong Aron tedei, blong mekem semmak samting we oli stap mekem long taem bifo finis: blong tijim mo mekem ol odinens—evri samting ia blong rimaenem yumi abaot Atonmen blong Hem.

Taem ol dikon, tija, mo pris oli help wetem sakramen, oli kasem ol blesing blong hem semmak nomo olsem evri narawan: taem oli kipim ol kavenan we oli mekem mo taem olgeta wanwan oli tekpat long sakramen. Be taem oli mekem ol tabu wok ia, oli lanem moa tu abaot ol prishud wok mo responsabiliti blong olgeta.

Oli singaotem Aronik Prishud olsem prishud blong stap rere, from se ol odinens blong hem i letem ol yang man ia blong eksperiensem responsabiliti mo glad blong stap mekem ol wok blong Lod, mo oli stap rere blong givim prishud seves long fiuja, long ol taem we maet oli singaotem olgeta blong givim seves long ol wei we oli no tingting long hem—olsem blong talemaot ol blesing blong insperesen long ol taem we ol hop mo drim i save foldaon mo iven long taem blong laef mo ded.

Ol series situesen olsem i nidim blong wan i rere from long wan series fasin.

Doktrin mo Ol Kavenan i eksplenem se ol dikon mo ol tija oli blong “givim woning, eksplenem, askem strong mo tij, mo invaetem evriwan blong kam long Kraes” (Doktrin mo Ol Kavenan 20:59). Antap long ol janis ia, ol pris oli mas “prij … mo baptaesem man” (Doktrin mo Ol Kavenan 20:50).

Evri samting ia i saon olsem plante samting, be long wol tedei, ol samting ia oli nomol nomo mo stap hapen raon long wol.

Wan bisop i bin tijim ol wok ia long niu dikon kworom presidensi blong hem. Yangfala presidensi ia i stat blong tokbaot olsem wanem bae oli mekem hemia long kworom mo long wod blong olgeta. Oli disaed se bae oli stap visitim ol memba blong wod we oli olfala mo luk wanem ol nid blong olgeta mo help.

Aot long olgeta we oli givim seves long olgeta, i gat Alan. Hem i wan neba we i no kaen tumas. Waef blong Alan, Wanda i bin kam wan memba blong Jos, be Alan, olsem bae yumi talem se, hem i wan hadwok lelebet.

Ol dikon oli gohed blong wok nomo mo stap mekem fani oltaem long ol strong toktok blong Alan taem oli stap digimaot sno mo toti blong olgeta. Ol dikon ia oli stap hapi nomo mo long en, Alan i stat blong laekem olgeta. Long wan taem, oli bin invaetem hem i kam long jos.

Hem i ansa se: “mi no laekem jos.”

Ol boe ia oli se: “be yu laekem mifala.” “Yu kam wetem mifala. Yu save kam long kworom miting blong mifala nomo, sapos yu wantem.”

Mo taem bisop i apruvum, Alan i kam—mo hem i gohed blong stap kam.

Ol dikon ia oli kam ol tija, mo taem oli gohed blong givim seves long hem, hem i bin tijim olgeta olsem wanem blong wok long ol trak mo bildim ol samting. Long taem we ol dikon ia oli kam ol tija, mo naoia oli kam ol pris, Alan i stap singaotem olgeta “ol boe blong mi.”

Naoia oli wantem blong stap rere gud blong go long ol misin mo oli askem hem sapos oli save praktisim ol misinari lesen wetem hem. Hem i talem se bae hem i neva lisin mo neva biliv, be bae oli save praktis long haos blong hem.

Mo afta Alan i sik. Fasin blong hem i nomo strong tumas.

Mo wan dei, long wan kworom miting, wetem wan kaen fasin hem i askem long olgeta blong oli prea from hem blong hem i stop smok, mo oli bin mekem. Be afta oli folem hem i go long haos mo karemaot evri sigaret long hom blong hem.

Taem helt blong Alan i stap kam moa nogud mo i putum hem long ol hospital mo senta blong sikman, “ol boe blong hem” oli givim seves long hem, mo stap soem ol paoa blong prishud long wan kwaet fasin we i soem tru lav. (luk long Doktrin mo Ol Kavenan 121:41).

Merikel ia i gohed blong hapen taem Alan i askem blong kasem baptaes be afta hem i ded bifo we hem i save baptaes. Folem rikwes blong hem, ol dikon blong hem we naoia oli ol pris, oli karem kofin blong hem mo toktok long fenerol blong hem, Long ples ia—oli mekem gud blong givim—woning, eksplenem, askem strong mo tij, mo invaetem evriwan i kam long Kraes.

Mo afta, insaed long tempol, wan long “ol boe blong Alan” i bin baptaesem foma presiden blong kworom blong ol dikon ia, long bihaf blong Alan.

Evri samting we Jon Baptaes i bin askem blong mekem, oli mekem. Oli bin mekem wanem ol dikon, tija, mo pris, oli stap mekem raon long wol long Jos ia.

Wan long ol samting we olgeta we oli holem prishud blong Aron, oli mas mekem, hem i blong tekpat long odinens blong sakramen.

Las yia, mi bin mitim wan bisop we i gat insperesen wetem waef blong hem. Long wan Satedei moning we i bin pas i no longtaem, taem oli stap draev blong go long baptaes blong boe blong tufala, tufala i bin lusum gel blong tufala we i gat tu yia, Tess.

Long nekis moning blong hem, ol memba blong wod oli kam tugeta long sakramen miting, wetem fulap mo oli stap harem nogud tu from ded blong smol naesfala gel ia. Nogat wan i tingting se bae famli blong bisop i kam long jos long moning ia, be afta long sam minit bifo miting miting i stat, famli blong bisop i kam sloslo insaed mo sidaon.

Bisop i go antap long fored mo i wokbaot bitim ples we hem i stap sidaon long hem oltaem wetem ol kaonsela blong hem, mo i go sidaon wetem ol pris blong hem long tebol blong sakramen.

Long naet bifo taem hem i stap harem nogud mo stap lukaotem blong faenem andastaning mo pis, hem i kasem wan strong filing se wanem we famli blong hem i nidim moa—mo wanem we wod blong hem i nidim moa. Hem i blong harem voes blong bisop blong olgeta, wod Aronik Prishud presiden blong olgeta, mo papa we i stap harem nogud, blong i talemaot ol promes blong kavenan blong sakramen.

Mekem se long taem blong sakramen, hem i nildaon wetem ol pris ia mo toktok long Papa blong hem. Wetem bigfala harem nogud blong taem ia, hem i talemaot sam toktok we i gat fulap paoa, we sam nomo oli gat raet blong talemaot laod, long laef ia.

Ol toktok we ol risal blong hem i no save finis.

Ol toktok blong odinens.

Ol toktok blong kavenan.

Instraksen we i joenem yumi long ol stamba tingting blong laef ia—mo long ol naesfala risal blong plan blong Papa blong yumi we i gat blong yumi.

?Yu save pikjarem wanem we kongregesen i harem long japel ia long dei ia?—?wanem oli bin filim long ol toktok we yumi stap harem evri Sandei insaed long ol japel blong yumi?

“O God, yu yu Papa we I No Save Finis, mifala i askem yu, long nem blong Pikinini blong yu, Jisas Kraes, blong blesem mo mekem tabu hemia bred, long sol blong olgeta evriwan we oli tekem mo kakae bred ia; blong oli tekem mo kakae blong tingbaot bodi blong Pikinini blong yu, mo testifae long yu, O God, yu yu Papa we I No Save Finis, se oli rere gud blong tekem long olgeta, nem blong Pikinini blong yu, mo oltaem tingbaot hem, mo stap obei long ol komanmen blong hem we hem i bin givim long olgeta, mekem se oltaem, oli gat Spirit blong hem i stap wetem olgeta Amen” (Doktrin mo Ol Kavenan 20:77).

Mo afta: “O God, yu yu Papa we I No Save Finis, mifala i askem yu, long nem blong Pikinini blong yu, Jisas Kraes, blong blesem mo mekem tabu hemia wota, long sol blong olgeta evriwan we oli dring wota ia, blong oli mekem samting ia blong tingbaot blad blong Pikinini blong yu, we i bin ron from olgeta; blong oli testifae long yu, O God, yu yu Papa we I No Save Finis, se oltaem oli tingbaot hem, blong oli gat Spirit blong hem i stap wetem olgeta. Amen” (Doktrin mo Ol Kavenan 20:79).

Gudfala papa mo mama ia i testifae se promes ia i bin kam tru. Oli bin faenem kamfot we i no save finis, blong “gat Spirit blong Hem i stap wetem olgeta.”

Bae mi oltaem talem tangkyu se olgeta we oli holem Aronik Prishud, wetem ol paoa, ol odinens, mo ol wok; oli stap blesem yumi evriwan tru long ol ki blong “ol seves blong ol enjel, mo blong gospel blong fasin blong sakem sin, mo blong baptaes andanit long wota blong kam klin aot long ol sin” (Doktrin mo Ol Kavenan 13:1). Long nem blong Jisas Kraes, amen.