Atonmen blong Jisas Kraes I Givim Faenol Fridom

Atonmen blong Jisas Kraes i givim faenol fridom long ol hadtaem yumi fesem long laef ia. Presiden Russell M. Nelson i givim wok long mi blong dediketem Casper Waeoming Tempol kolosap long en blong las yia. Hem i bin wan filing mo wan eksperiens long saed blong spirit we i dip tumas. Eksperiens ia i givim wan klia lukluk long wok we ol tempol oli mekem blong givim fridom long ol pikinini blong God tru Atonmen blong Sevya.

Long distrik blong ol stek long Casper Wyoming Tempol Distrik, i gat long graon ia wan pat blong rod we Ol Lata-Dei Sent paeonia oli bin yusum bitwin 1847 mo 1868. Taem mi stap rere from tempol dedikesen, mi ridim bakegen sam histri blong rod ia we i folem Platte River kolosap long Casper mo i gohed i go long Sol Lek Siti. Rod ia i bin stap olsem wan pablik rod blong handred taosen pipol we oli bin travel i kam long wes. Lukluk blong mi we i moa Impoten, i we i gat moa bitim 60,000 Lata-dei Sent paeonia we oli bin wokbaot long rod ia.

Plante long ol paeonia blong yumi oli yusum wagun (kat we i kat haos) blong kam, be abaot 3,000 oli yusum hankat blong 10 kampani blong kam. Eit long ol hankat kampani ia oli mekem longfala mo strong wokbaot ia wetem sakses we i gat smol ded nomo. Willie mo Martin hankat kampani blong 1856 oli no bin folem rul.

Mi bin ridim bakegen stori blong Willie mo Martin hankat kampani stat long taem we rabis weta i bin stat. Kwiktaem, mi kam blong luksave ol jalenj oli fesem taem oli krosem Sweetwater River, Martin’s Cove, Rocky Ridge, mo Rock Creek Hollow.

Between Storms, i kam long Albania Veselka

Mi no bin go insaed long Casper Tempol bifo dedikesen. Taem mi go insaed long nomo, kwiktaem, ae blong mi i kasem peinting blong orijinol hankat we taetel blong hem i Between Storms. Peinting ia i soemaot klia se i no blong ripresentem ol hadtaem we i bin tekples. Taem mi stap lukluk gud long peinting ia, mi stap tingting, “Peinting ia i stret; bigfala namba blong ol hankat paeonia oli no bin fesem ol bigfala hadtaem.” Mi stap filim long miwan se pikja ia i semmak nomo long laef. Samtaem yumi stap bitwin ol strong win mo samtaem bitwin ol klaod mo sansaen.

Heaven’s Portal, i kam long Jim Wilcox

Taem mi tanem mi i go long orijinol peinting long nara wol, we taetel blong hem i Heaven’s Portal, mi kam blong save se naesfala peinting blong sama blong wanem oli bin singaotem “Devil’s Gate,” wetem Sweetwater River we i kwaet mo klia i stap ron tru long hem, i ripresentem naesfala kriesen blong Lod, be i no ol jalenj nomo we ol paeonia oli bin fesem long rabis winta sesen ia.

Afta mi lukluk i go fored, biaen long tebol blong rekomen, mo luk wan naesfala peinting blong Sevya. Hemia i tekem i kam kwiktaem long mi wan dip filing blong glad mo bigfala tank yu. Long wan wol we i gat plante naes samting, i gat plante jalenj tu. Taem yumi tanem yumi i go long Jisas Kraes, Sevya blong wol ia, Hem bae i karemaot yumi aot long ol strong win blong laef tru long Atonmen blong Hem we i folem plan blong Papa.

Long mi, yad long fored blong tempol i wan stret ples blong stap rere blong go long ol tempol odinens rum we yumi go blong kasem ol odinens ia blong kam olsem wan God, mekem ol tabu kavenan, mo blong akseptem fulwan mo eksperiensem ol blesing blong Atonmen blong Sevya. Plan blong hapines blong Papa i stanap long Atonmen blong Sevya we i mekem man i fri.

Eksperiens blong paeonia i givim wan histri blong kastom we i spesel mo wan storian we i gat paoa long ol Lata-dei Sent. Blong sam, i tekem plante yia blong muv i go mo bildimap ol niufala ples blong stap, afta oli fosem olgeta blong lego tugeta Misuri mo Nauvu. Ol narawan oli statem wokbaot blong olgeta taem Presiden Brigham Yang i anaonsem hankat plan, we i mekem wokbaot ia blong go long nara ples i moa gud. Praes blong ol hankat i no sas olsem ol wagun mo ol buluk.

Wan misinari long Inglan, Millen Atwood i talem se, taem we oli anaonsem hankat plan, “i olsem faea i bonem drae lif, mo hat blong ol pua Sent ia i jiamjiam wetem glad.” Plante oli bin “prea mo letem kakae dei afta dei, mo naet afta naet, se blong oli save gat janis ia blong joen wetem ol brata mo ol sista blong olgeta long ol maonten.”

Plante long ol Sent we oli pulum hankat oli eksperiensem hadtaem be oli no fesem ol taem we i nogud tumas. Be tu(2) hankat kampani, Willie Kampani mo Martin kampani, oli eksperiensem hanggri, kolkol weta i kilim olgeta, mo plante ded.

Plante long olgeta we oli stap travel ia oli long Liverpool, England, long Mei 1856 long tu(2) sip. Oli bin kam kasem Taon ia Iowa ples we oli stap mekem hankat long hem long Jun mo Julae. Nomata long ol woning, tugeta kampani oli aot tu i go long Sol Lek Vale let long sisen ia.

Fastaem we Presiden Brigham Young i save abaot rabis situesen blong ol kampani ia hem i long 4 Oktoba, 1856. Long nekis dei hem i stanap long fored blong ol Sent long Sol Lek Siti mo talem, “Plante long ol brata mo ol sista blong yumi oli stap kam long wei yet wetem ol hankat, … mo bae oli mas kam long ples ia; yumi mas sendem sapot i go long olgeta … bifo winta i stat.”

Hem i askem ol bisop blong oli givim 60 tim blong hos, 12 o moa wagun, mo 12 tan (10,886 kilo) blong flaoa mo talem, “Go mo karem ol pipol ia we oli stap kam naoia long longfala rod ia i kam.”

Namba blong ol paeonia long Willie mo Martin hankat kampani i kam kolosap 1,100. Sam long ol 200 gudfala Sent ia oli ded long longfala rod ia. Sapos i no bin gat man blong go helpem olgeta, bae plante moa i lusum laef.

Strong win blong winta i bin stat kolosap tu(2) wik afta ol man blong help oli aot long Sol Lek Siti. Ol stori blong ol memba blong Willie mo Martin kampani i talem ol rabis hadtaem afta we ol strong win i stat. Ol stori ia oli talem tu ol bigfala glad taem ol man blong help oli kam kasem olgeta.

Blong tokbaot taem ol man ia oli kam kamaot long olgeta, Mary Hurren i talem, “Wota blong ae i ron daon long fes blong ol man, mo pikinini oli danis from oli glad. Afta we ol pipol i save kontrolem filing blong olgeta, evriwan oli nildaon long sno mo givim tangkyu i go long God.”

Tu(2) dei afta, Willie kampani i mas travel long pat blong rod we i moa had, oli wokbaot long rod we i fulap long ston, long strong win blong sno. Las wan long olgeta i bin kasem kamp long 5:00 klok long nekis moning. Tetin pipol oli bin ded mo oli berem olgeta long wan ples nomo.

Long 7 Novemba, Willie kampani i kam kolosap finis long Sol Lek Vale, be long moning ia, i go hed blong gat tri(3) ded. Tu(2) dei afta, Willie kampani i kasem Sol Lek, long ples ia oli kasem wan naesfala welkam long ol haos blong ol Sent.

Long semmak dei ia, Martin kampani i stap 523 kilo mita biaen yet long rod, mo oli gohed blong safa from kolkol mo kaekae we i no inaf. Sam dei bifo, oli bin krosem Sweetwater River blong go kasem ples we oli singaotem naoia Martin Cove, ples we oli hop blong kasem proteksen long ol samting. Wan long ol paeonia i talem, “Hemia wan wos reva blong krosem long wokbaot ia.” Sam long ol man blong help ia—olsem papa blong bubu man blong mi, David Patten Kimball, we i bin gat 17 yia nomo, wetem ol yang fren blong hem, “George W. Grant, Allen Huntington, Stephen Taylor, mo Ira Nebeker—oli spendem plante aoa insaed long aes wota,” olsem ol hiro blong helpem kampani i krosem Sweetwater.

Taem mi lanem moa abaot situesen blong olgeta, mi kam blong save se evriwan long olgeta oli stap folem profet mo oli plei ol impoten pat blong sevem ol Sent we oli nidim help. Evri man blong help ia oli olsem ol hiro, mo tu olgeta we oli stap wokbaot long rod.

Stap stadi long stori blong olgeta, mi glad tumas long ol naesfala rilesensip mo lukluk ia blong taem we i no save finis we oli paeonia ia oli gat. John mo Maria Linford mo tri boe blong tufala oli memba blong Willie kampani. Jon i bin ded bifo ol fas man blong help oli kam kasem olgeta. Hem i bin talem long Maria se hem i glad se oli bin mekem wokbaot ia. “Bambae mi mi no save kasem Sot Lek,” hem i talem, “be yu wetem ol boe bae i kasem, mo mi no harem nogud from evri samting we yumi bin go tru long hem blong mekem se ol boe blong yumitu oli save groap mo lukaotem ol famli blong olgeta long Saeon.”

Presiden Jemes E. Faost i givim sot naesfala toktok ia se: “Long hadwok blong ol hiro paeonia ia, yumi lanem wan bigfala trutok. Evriwan i mas pas tru long faea blong kamaot klin, mo ol samting we oli no impoten long laef olsem toti bae oli lus long faea mo bae i mekem fet blong yumi i saen, i fulwan mo i strong. I luk olsem evriwan i gat bigfala harem nogud, sore, mo hat we i brok, mo olgeta tu we oli stap traehad blong mekem gud mo stap fetful. Yet hemia i pat blong kam moa klin mo kam blong save huia hem i God.”

Tru long Atonmen mo Resureksen blong Hem we i no save finis, Sevya i brekem ol rop blong ded, from hem i win ova long ded” blong evriwan. Blong olgeta we oli sakem ol sin, Hem i “tekem long hemwan ol rabis fasin mo ol fasin blong brekem loa blong olgeta, hem i pemaot olgeta, mo i stretem wanem we jastis i askem.”

Sapos i no gat Atonmen, yumi no save sevem yumiwan aot long sin mo ded. Nomata we sin i save mekem yumi fesem hadtaem, ol hadtaem blong laef oli kam, tru long ol mistek, ol nogud desisen, ol rabis fasin we ol narawan oli mekem, mo ol nara samting we oli aotsaed long kontrol blong yumi.

Prijim Gospel blong Mi i tijim: “Taem yumi stap dipen long Jisas Kraes mo Atonmen blong Hem, Hem i save helpem yumi blong stanap strong agensem ol hadtaem blong yumi, ol siknes mo harem nogud blong yumi. Yumi save gat fulap glad, pis, mo kamfot. Evri samting we i no stret tumas abaot laef, i save kam stret tru long Atonmen blong Jisas Kraes.”

Long ista sisen ia, lukluk blong yumi i stap long Sevya mo long sakrifaes blong Atonmen blong Hem. Atonmen i givim hop mo laet long wan taem we plante oli luk se i tudak mo i no gat laef. Presiden Gordon B. Hinckley i talem se, “Taem oli lukluk gud long evri histri, … i no gat wan samting i naes moa gud, o i moa naes, o i moa bigwan olsem fasin blong gladhat ia.”

Mi serem tri(3) tingting we mi ting se oli gud blong dei we yumi stap long hem.

Faswan, no tingting nating long hamas i impoten blong save mekem wanem yumi save mekem blong help tekemaot ol narawan long ol hadtaem blong bodi mo speseli long saed blong spirit.

Namba tu, akseptem Atonmen blong Sevya wetem glad. Yumi mas traehad blong putumaot glad mo hapines nomata we yumi fesem ol hadtaem long laef. Gol blong yumi i blong gat hop ia oltaem blong stap laef long gudfala saed blong laef. Mi stap luk gudfala kompanion blong mi, Mary, mekem hemia long ful laef blong hem. Mi bin glad tumas long naesfala fasin we i gat blong stap leftemap tingting nomata taem mitufala i fesem ol problem truaot long ol yia.

Namba tri kaonsel blong mi i blong evri taem putum long saed taem blong tingting hevi wetem fet long Atonmen blong Sevya. I gat plante wei blong mekem hemia long wanwan fasin blong yumi folem relijin blong yumi. Be taem yumi atendem sakramen miting mo tekem sakramen i impoten tumas.

Hem i impoten semmak tu taem yumi atendem tempol oltaem. Tempol i mekem yumi stap gohed blong tingbaot Atonmen blong Sevya mo wanem nao hem i winim. Mo, wanem we i moa impoten, i we tempol atendens i letem yumi givim wan help long saed blong spirit blong karemaot ol lav wan blong yumi we oli ded finis mo oli stap longtaem tumas.

Presiden Russell M. Nelson, long las konfrens, i talemaot gud prinsipol ia mo i ademap, “Ol blesing blong [tempol] … i help blong mekem rere wan pipol we bae oli help blong mekem rere wol ia blong seken kaming blong Lod!”

Yumi no mas neva fogetem ol sakrifaes mo ol eksampol blong ol jeneresen we oli finis, be respek blong yumi, mo wosip blong yumi i mas stap nomo long Sevya blong wol mo sakrifaes blong Atonmen blong Hem. Mi testifae se ki blong plan blong hapines blong Papa hem i Atonmen we Sevya, Jisas Kraes i bin mekem. Hem i laef mo i lidim Jos blong Hem. Atonmen blong Jisas Kraes i givim faenol fridom long ol hadtaem yumi fesem long laef ia. Long nem blong Jisas Kraes, amen.