Elda John D. Amos

Long 2020, Elda John D. Amos i bin kasem wan koling we i bin jenisim laef blong hem, blong kam olsem wan misin presiden blong Baton Rouge Louisiana Misin. Plante samting long laef blong hem i nidim blong jenis from koling ia, be Elda mo Sista Amos i bin akseptem asaenmen ia wetem glad mo fet.

“Desisen mo komitmen ia, mitufala i bin mekem longtaem finis,” Elda Amos i talem. “Taem Lod i singaot, yumi ansa nomo long hem.”

John D. Amos i bon i kam long wol long 2 Novemba, 1961, long Lafayette, Louisiana. Papa mo mama blong hem i John N. Amos Sr. mo Dorothy Victorian Amos. Hem i bin faenem fiuja waef blong hem, Michelle Evette Wright, tru long ol klas we tufala i bin stap tekem tugeta long kolej, we tufala i stap skul from lektrik enjinia.

Michelle, we i wan memba blong Jos finis, i bin invaetem John i go long wan danis blong jos blong fas taem we tufala i deit. Afta long hemia, hem i stat blong lanem moa abaot Jos mo wok blong Sevya we i stamba insaed long gospel we i bin kambak long wol.

“Evri samting hem i abaot Jisas Kraes,” hem i talem. “Hem i stamba blong evri samting.”

Elda Amos mo Michelle i bin mared long 9 Jun, 1990, long Atlanta Jojia Tempol. Tufala i gat 3 pikinini mo sikis apupikinini.

Elda Amos i bin winim ol digri long saed blong lektrik mo nuklia enjinia. Long taem blong wok blong hem, hem i bin wok long United States Navy, long Siemens Energy Inc., mo hem i bin stap tij long Yunivesiti blong Central Florida.

Long pas hem i bin mekem ol koling ia olsem Eria Seventi (North America Southeast Eria), misin presiden, stek presidensi kaonsela, bisop, kaonsela long bisoprik, wod Sandei Skul presiden, wok eksekutiv sekretari, grup lida blong ol hae pris, mo neseri lida.