Akseptem Presen blong Hem

Fasin blong stap givim presen i wan sosol kastom we i stap finis long evri kalja mo histri blong man. Truaot long taem, ol pipol oli bin stap givim presen long wanwan long olgeta blong mekem ol rilesensip i kam strong, soem lav mo tangkyu, mo makem ol impoten taem olsem ol mared, betdei mo holidei. !Mo ol man oli no olgeta nomo we God i krietem blong oli stap givim presen long wanwan long olgeta! Long ol nara eksampol, yumi save luk tu we ol penkwin oli stap givim ol saensaen ston long patna blong olgeta, mo ol bonobo (ol kasen blong jimpansi mangki) oli stap givim ol frut blong mekem frensip blong olgeta i go moa bigwan.

?Wanem sam presen we yu bin givim? Tingting long wan taem we yu bin faenem—o mekem—presen ia we i stret gud blong wan we yu lavem. Yu bin save gud se presen ia i stret samting we hem we yu lavem i wantem tumas mo bae i spesel long hem. ?Presen ia i bin wanem? ?I bin blong mama blong yu? wan fren? wan pikinini? wan tija? apu man blong yu? ?Yu bin filim olsem wanem taem yu faenem presen ia? ?Yu filim olsem wanem taem yu tingting long hem we yu lavem long taem we bae hem i stap openem presen ia? Long semmak fasin, ?wetaem wan i bin presen long yu long presen ia we i stret gud? ?mo i bin filim olsem wanem blong kasem presen ia?

Taem mi gat samples seven yia mo mi stap wetem papa mo mama blong mi long Arabia, i bin gat wan muvi blong ol pikinini we oli singaotem Chitty Chitty Bang Bang we i jes kamaot. Muvi ia hem i abaot wan majik trak we i save draev hemwan, flot long wota, !mo flae tu! Mi save se long homples long Inglan, oli bin mekem ol pleplei trak semmak olsem Chitty Chitty Bang Bang, mo !o mi bin wantem tumas blong gat wan! Yu save pulum wan smol stik long pleplei ia mo !bae wing blong trak ia i open! Papa blong mi i bin go long wan bisnis trip long Inglan mo askem sapos mi wantem blong hem i karem wan samting blong mi i kambak, mo mi talem long hem hamas mi wantem tumas blong gat wan long ol Chitty Chitty Bang Bang trak ia.

Hem i kambak long trip blong hem, be i no gat wan trak. Mi bin harem nogud tumas mo tingting se maet hem i bin fogetem. Be samples 10 dei afta, bae hem i betdei blong mi, mo wan smol paket we oli kavremap gud, i stap wet long mi. Mi no save wet nating, mo mi no wantem hop bigwan tumas, taem mi openem presen blong mi mo mi faenem trak blong mi. Mi hapi tumas mekem se mi krae. Mi pulum smol stik ia mo ol wing oli open, !semmak nomo long trak long muvi! Mi talem tangkyu tumas long papa blong mi from presen ia we i spesel tumas long mi. Mi bin pleplei wetem trak ia blong plante yia mo mi kipim i stap blong plante moa yia. Mi ting se papa blong mi i bin hapi tumas blong givim trak ia long mi semmak olsem we mi bin hapi tumas blong kasem presen ia.

Yumi save tingting long fasin blong givim presen se hem i gat tri pat blong hem:

1. Blong stap givim presen, taem hem we i givim presen i jusum, mekem o rere long presen mo afta i givim long hem we hem i lavem. Hemia i tekem tu ol tru tingting blong hem we i givim presen, blong i givim wan samting we i gat mining.

2. Fasin blong stap kasem mo stap openem presen, i taem hem we i kasem presen i karem presen long hem we i givim, mo i stap glad mo sapraes from bifo hem i openem presen, taem hem i karem presen pepa mo faenemaot se wanem presen blong hem.

3. Mo afta hem i pat ia nao we maet i moa impoten pat blong stap akseptem presen ia. Blong akseptem wan presen we oli givim wetem truhat, hem i moa bitim blong stap kasem mo afta stap openem. Hem i bitim tu blong luksave valiu blong presen ia mo stap talem tangkyu long hem we i givim presen. Blong akseptem wan presen wetem truhat, yumi tekem i spesel tumas long yumiwan yumi yusum fulwan long laef blong yumi, mo afta yumi tingbaot wetem tangkyu i go long hem we i givim presen.

Blong karem wan presen, i no wan aksen nating nomo olsem, be hem i gat mining we i kam long hat we i moa bitim blong stap openem wan presen nomo. Blong akseptem hem i blong talem tangkyu mo andastanem presen mo hat blong hem we i givim presen, long wan wei we i mekem rilesensip blong tufala i strong. Taem mi stap tingbaot pleplei trak ia, mi tingbaot plante gudfala memori, taem mi filim bakegen bigfala lav mo kea blong papa blong mi long mi, we presen ia i ripresentem mo plante nara gudfala samting hem i mekem.

Papa blong yumi long Heven i gat plante presen tumas blong laet mo trutok we hem i rere long hem i stap blong givim long yumi, ol pikinini blong Hem we yumi spesel tumas long Hem. Oli kapkapsaet i kamaot long Hem We I Gat Fulap Samting olsem wan springwota long drae ples, mo i kamaot long kaen hat blong Hem. “Evri samting we oli gud mo evri presen we oli nambawan we yumi kasem, oli kamaot long heven, [aot long God we i mekem ol laet].” Long kavenan rilesensip blong yumi wetem Papa, oltaem Hem i Givim mo yumi yumi kasem wetem tingting i stap daon.

Be yumi no save akseptem wan samting sapos yumi no akseptem presen blong Papa we i moa hae, we i Pikinini blong Hem we Hem i lavem tumas, Jisas Kraes. Evri nara presen blong Papa oli kamaot mo oli wok tru long hat blong Sevya we i givim Hemwan long Getsemane mo long kros, mo Resureksen blong Hem we i win. Jisas Kraes, Ridima blong yumi we i gat fulap sore, i hae presen ia we i kam long Papa blong yumi we i mekem ol laet. “Tru long presen we i Pikinini blong hem, God i bin mekem rere wan rod we i moa gud yet [blong yumi].”

Mi wantem tokbaot wan presen blong trutok we i no save finis we i kavremap evri nara samting,we i mekem se yumi save gat paoa blong akseptem evri nara samting we Papa blong yumi i wantem blong givim long yumi—wan impoten presen blong save, we taem oli kasem fulwan mo akseptem dip long sol hem i mekem yumi andastanem ol glad mo hadtaem blong laef, mo ol kwestin blong yumi we i nogat ansa yet: Hem i we i tru se yumi ol pikinini blong God. !Trutok ia naes tumas! !I gud tumas! Mo hem i no wan parabol.

!Tekem se hemia hem i fas taem blong yu harem trutok ia! Yu yu tru pikinini gel blong Hem we Hem i lavem tumas. Yu yu tru pikinini boe blong Hem we Hem i lavem tumas. Mo rod we yu stap long hem i plan blong Hem blong stap glad. Wetem lav blong Hem we i save evri samting, Hem i save stret huia yu bifo yu kam long wol, mo wanem yu bin eksperiensem kasem naoia long laef blong yu, mo Hem i bin mekem plan blong evri tumoro blong yu wetem sore. O Hem i wantem tumas blong yu gobak long Hem wan dei, blong akseptem stamba tingting blong evri naesfala presen blong Hem we i laef we i no save finis wetem Hem.

Kwestin hem i no sapos presen blong trutok i tru. Be hem i ?bae yumi faenemaot mo akseptem? Papa i givim presen ia finis long yumi. Sevya i pem finis praes blong stamba tingting blong presen ia. Be sapos blong plante yia finis oli bin talem, tijim yu, mo singsing abaot trutok ia long yu, maet naes filing blong trutok ia i bin lus sloslo longtaem mo yu nomo filim paoa mo pis blong hem.

Sapos presen blong andastaning ia we i spesel tumas—mo evri gud fasin, pis, mo hop we i kam long hem—i stap nomo mo no kasem, no openem, mo no akseptem, !bae hem i wan bigfala lus blong yumi! !Wan bigfala harem nogud blong Hem we i givim presen! “From, ?wanem nao i gud long wan man, sapos oli givim wan presen long hem, mo hem i no [akseptem] presen ia? Luk, hem i no stap glad long wanem we oli givim long hem, mo hem i no glad tu long man ia we i givim presen ia.”

Mi invaetem yu blong akseptem bakegen se yu yu wan tru pikinini blong God we Hem i lavem. Akseptem olsem i fas taem, o blong akseptem moa bitim bifo. Yu mas karemaot riben, karemaot presen pepa, openem bokis, mo gohed blong akseptem stamba trutok ia wetem tangkyu mo tingting we i stap daon, mo wan tru mo klin andastaning. Tabu Spirit i save witnes long hat blong yu se yu yu wan tru pikinini blong God We I Hae.

Taem yu akseptem hae trutok ia insaed long sol blong yu mo filim kamfot mo glad ia from, !bae yu luk yuwan yu defren long wol ia! Yu save filim lav blong Hem, harem voes blong Hem, mo luksave han blong Hem, nomata wanem i stap hapen o no hapen long laef blong yu. Yu save lukluk yuwan mo ol narawan long wan defren wei. Kavenan rilesensip blong yu wetem Sevya i kam moa strong, mo tru long ae blong naesfala presen ia, laef bae i naes mo saen moa wetem hop.

Plis, ?bae yu save prea blong andastanem sapos yu stap akseptem tru, save ia we i save jenisim yu, dip long sol blong yu? Plis, ?yu save akseptem presen ia? ?Yu save mekem long wan fasin we i moa dip, moa fri, mo akseptem moa bitim bifo—mo taem yu mekem hemia, bae yu kasem evri nara presen we i kam wetem?

Maet bae yu stap askem se, “?Wanem nao mi mas mekem blong akseptem presen ia long God?” Yu no nid blong mekem eni samting. Hem i wan presen we i kam long God. Hem i simpol, hem i wan trutok. Akseptem insaed long yu. Yu yu pikinini blong Hem. Hem i lavem yu tumas. No mekem i had. No blokem yuwan blong stap akseptem presen ia wetem ol tingting se yu yu no gud inaf. Tru samting i we, nogat wan long yumi i “gud inaf”—evri presen blong Papa yumi kasem nomo tru long ol wok, sore, mo gladhat blong Tabu Mesaea, be bigfala hat blong Hem i wantem tumas blong wanwan pikinini blong Hem i kasem olgeta! Mo taem niu andastaning o andastaning blong yu i kam niu bakegen, stap glad blong talem tangkyu long Hem we I Givim presen ia.

Taem mi kam blong faenem fet blong mi taem mi gat twante samting yia, mi kam blong luksave mo save se mi mi wan tru boe blong God. Taem mi akseptem presen ia long hat blong mi, mi kam blong save moa fulwan huia mi mo olsem wanem oli lavem mi fulwan. Sam samting we oli bin helpem mi blong andastanem moa, hem i ol toktok blong skripja, petriakel blesing blong mi, tempol wosip, givim seves long ol narawan, stap talem tangkyu, mo tabu prea wetem Papa blong mi. Mi sapraes long hamas ol harem nogud mo soa we mi bin filim fastaem long laef blong mi, oli save jenis mo kam moa gud sapos mi bin save naesfala trutok ia.

Moronae i askem strong long yumi “no tanem baksaed long ol presen blong God,” be blong yumi “kam long Kraes, mo holemtaet evri gudfala presen.” Yu save kam long Kraes wetem tras long lav mo kaen fasin blong Hem mo kasem evri presen blong glad, pis, hop, laef, trutok, revelesen, save, mo waes—wetem tras long yuwan mo ol han blong yu we oli open mo rere blong akseptem ol presen ia. Mo yu save kasem ol presen ia from se yu sef mo stanap strong long save ia se yu yu wan gel mo boe blong God we Hem i lavem tumas, mo Hem i presen long yu long Pikinini blong Hem we i tabu mo stret evriwan, blong i pemaot yu, stanap from yu, mo mekem yu tabu.

Yu yu wan pikinini blong God. Hemia i no wan naes singsing nomo we yumi stap singsing long hem. Plis, ?bae yu save kasem, openem, mo akseptem presen blong save mo andastaning we i kam long Hem? ?Bae yu save lukaotgud long hem olsem spesel presen ia? Akseptem presen ia bakegen, o ating yu akseptem tru blong fas taem, mo letem i jenisim evri pat blong laef blong yu. Hemia i rod we God i bin mekem rere blong yu, we i moa gud; tru long presen ia we i Pikinini blong Hem. !I tru yu yu stap, blong yu save gat glad! Long nem blong Jisas Kraes, amen.