“Kambak Naoia long Mi … Mekem Se Mi Save Mekem Yu I Kam Oraet”

Mifala i bin stap long wan haos we ol naes tri i raonem. Narasaed long get i gat wan naes wilo tri. Long wan naet blong harem nogud, wan strong win i blo, mo wilo tri ia i foldaon. I silip nomo long graon wetem ol rus blong hem we i kamaot mo i no luk gud nomo.

Mi rere blong go karem jenso mo katem tri ia blong mekem faea wud long hem, taem neba blong mi i ron i kam blong stopem mi. Hem i tok long mi from mi wantem givap long tri ia mo wetem sore hem i askem mifala blong no karemaot tri ia. Hem i poen i go long wan rus blong tri ia we i stap yet long graon mo talem se sapos mifala i pusum tri ia kam antap, mo katemaot ol branj blong hem, mo lukaotem gud, bae ol rus blong hem bae i strong bakegen.

Mi stap gat tu tingting long tri ia, we yu luksave nomo se i foldaon, mo i stap long trabol, olsem wanem nao bae i laef mo bae i kam bak long laef. Mi traem blong talem long hem se sapos bae hem i stat blong gro bakegen, sapos wan nara strong win i kam bae hem i no save stanap nomo long strong win ia. Be mi save se neba blong mi i gat wan strong tingting long tri ia se bae hem i gat wan fiuja, mekem se mifala i folem plan blong hem.

?Mo risal blong hem? Afta sam taem, mifala i luk ol saen blong laef long tri ia, taem hem i stat blong sakem ol rus blong hem. Naoia, 12 yia i pas, tri ia i naes mo i laef nomo i stap wetem ol rus we i strong mo wan moa taem bakegen, i mekem ples i naes.

Taem mi stap mitim ol Sent raon long wol, mi stap tingbaot wilo tri ia mo olsem wanem i gat hop taem yu ting se evri samting i lus. Sam oli gat testemoni blong gospel we i strong mo naes olsem wilo tri ia. Afta, from sam risen blong olgetawan, ol testemoni ia oli slak, i lidim i go long fet we i lus. Narafala oli hang long ol smolsmol rus blong gospel

Yet bakegen mo bakegen, mi laekem plante long ol stori blong olgeta we oli jusum blong kambak long Sevya mo kambak long Jos. Oli ansa long singaot long saed blong spirit mo wetem ol invitesen we oli givim wetem lav blong kambak long jos, be no oli lego fet mo bilif blong olgeta olsem faea wud ia we i nogat mining long hem.

Mi bin go long wan stek konfrens long Korea we wan memba we i stap kambak long jos i serem: “Mi wantem talem tangkyu i go long ol brata we oli akseptem fet blong mi we i no strong, blong givhan long mi, mo tu long ol memba we oltaem oli kaen long mi. Mi gat plante fren raonem mi we oli no kam longtaem long jos. I fani, be oltaem oli talem long wanwan long olgeta blong gobak long Jos mo karembak fet blong olgeta. Mi ting se olgeta evri wan oli wantem tumas blong gat fet.”

I go long olgeta we oli wantem tumas blong gat fet, mifala i invaetem yu blong kambak. Mi promes long yufala se bae fet blong yufala i kam strong taem yufala wosip bakegen wetem ol Sent.

Wan foma misinari blong Afrika i bin raet i go long wan senia lida blong Jos, i talem sore mo askem fogivnes from hem i harem nogud long ol tijing blong hem abaot wan kalja tradisen, we i lid i go blong hem i lego Jos. Wetem tingting i stap daon hem i talem: “Sore nomo, mi tekem harem nogud ia blong 15 yia, mo mi bin pem wan hevi praes. Mi bin lusum plante—plante moa long wanem mi save go tru long hem. Mi bin sem tumas long ol rabis samting we mi bin mekem, be antap long evri samting ia, mi glad tumas from mi faenem rod blong mi blong kambak.”

I go long yufala evriwan we i luk save wanem yu bin lusum, mifala i invaetem yu blong kambak mekem se yu save bakegen, kakae frut blong glad blong gospel.

Olsem wan sista long Yunaeted Stet i aot long Jos blong plante yia. Stori blong hem blong kambak i gat ol lesen we i gat paoa blong ol papa mo mama mo ol famli memba we oli stap kros long olgeta we oli lavem we oli aot long Jos. Hem i bin raetem:

“Mi save tokbaot plante defren kaen risen from wanem mi aot long Jos, long gospel mo long wan wei, long famli blong mi. Be hem i nomata. Mi no bin mekem wan bigfala joes blong lego Jos—ating mi bin mekem taosen joes. Be wan samting we mi save oltaem hem i we mama mo papa blong mi, i bin mekem wan bigfala desisen, mo tufala i fas long hem i stap. We tufala i disaed blong lavem mi.

“Mi no save hamas wota blong ae i ron, plante naet we oli no silip, o hamas ol toktok blong prea blong krae we i kam long hat we oli talem long bihaf blong mi. Oli no talem nogud mi long ol sin blong mi, be oli helpem mi wetem lav long ol sin blong mi Oli mekem mi fil welkam long haos blong olgeta, mo long ol kam tugeta blong famli, eni long ol filing ia i blong mi nomo. Be, oli gohed blong mekem mi fil welkam. Oli luk laet ia i stap lus long mi. Be oli save se mi blong bifo, i wan sado nomo long huia bae mi kam olsem.

“Olsem rod blong mi aot long Jos i fasfas smol, i semmak long rod blong mi blong kambak long Jos. Be wan samting we i no had abaot blong kambak, i filing ia we blong kambak hom long ples we mi stap long hem.”

Mesej blong mi blong tedei hem i speseli blong olgeta we long wan taem oli bin filim Spirit, be oli gat kwestin se sapos i gat wan rod blong kambak o wan ples blong yu insaed long Jos Ia blong Jisas Kraes we i kambak. Hem i blong olgeta we tingting i slak o olgeta we oli gat tingting ia blong lego Jos.

Mesej ia i no wan jalenj, mo hem i no blong putum yu daon. Be hem i wan invitesen, we oli givim wetem lav mo wan hat we i wantem tumas blong mekem yufala i fil welkam long hom blong yufala long saed blong spirit.

Mi prea se bae yu filim witnes blong Tabu Spirit taem yu stap naoia harem invitesen ia wetem lav mo naesfala promes we i kam long Sevya blong yumi, Jisas Kraes.

?Bae yufala i no kambak naoia long mi, mo sakem ol sin blong yufala, mo jenisim laef blong yufala, blong mekem se mi save mekem yufala i kam oraet?”

Evri wik, plante oli stap ansa long invitesen blong Sevya blong kambak long Sevya mo long Jos, wetem kwaet mo tingting i stap daon blong lukaotem hiling promes blong Jisas. Mo long narasaed stori we samtaem i stap go raon, ol rekod namba blong ol yang pipol blong yumi oli stap jusum blong stap strong mo gro long fet blong olgeta long Jisas Kraes.

Taem sam long ol man we oli stap folem Jisas long Kapaneam i faenem se ol tijing blong Hem i had tumas mo oli mekem joes ia blong aot, Hem i tanem Hem i go long ol Aposol blong Hem mo askem, “Yufala tu wantem gowe long mi?””

Hemia i kwestin we wanwan long yumi i mas ansa long hem taem yumi stap fesem ol wanwan hadtaem blong yumi. Ansa blong Pita i go long Jisas i gat bigfala valiu long hem “?Bambae mifala i save go long hu? Yu nomo yu gat ol tok blong laef ia we i no save finis.”

Taem yu stap tingting long invitesen blong Sevya blong gobak long Hem, ?wanem nao yu lanem aot long stori blong wilo tri ia?

1. Rod blong gobak bae hem i no isi o bae i givim kamfot, be bae i gud long en. Taem wilo tri blong mifala i stanap bakegen, oli katemaot evri branj blong hem. Hem i no naes. Bae yumi filim se yumi no strong taem yumi stap putum biaen ol olfala fasin mo karemaot hae tingting. Stap lukluk nomo fet blong yu long Jisas Kraes mo gospel blong Hem—stamba mo rus—bae i givim yu hop mo strong paoa long tingting blong tekem fas step ia blong kambak.

2. I tekem plante yia blong wilo tri blong mifala i gro i gobak long naes mo strong tri ia. Naoia hem i moa strong mo i moa naes bitim bifo. Gat fasin blong wet longtaem taem fet mo testemoni blong yu i stap gro tu. Hemia i minim se blong tekem ol komen we bae i mekem yu harem nogud, ol komen olsem “?yu stap wea long ol yia we i pas ia?

3. Wilo tri ia bae i no save laef sapos oli no lukaotem gud mo givim kakae long hem. Bae yu givim kakae long fet mo testemoni blong yu taem yu stap kakae long sakramen tebol evri wik mo taem yu stap wosip long haos blong Lod.

4. Olsem we wilo tri i nidim san blong ol branj mo lif blong gro bakegen, mekem se testemoni blong yu bae i gro taem yu stap lisin gud long ol filing mo witnes blong Spirit Lanem samting aot long Amulek, we i tokbaot taem we hem i stap olsem wan les aktiv memba mo talem “Oli bin singaotem mi plante taem mo bae mi no harem.”

5. Neba blong mi i save se bae wilo tri ia bae i kam gud bakegen. Lod tu i save tabu paoa blong yu blong kam olsem Hem mo wanem fet mo testemoni blong yu i save kam olsem. Bae Hem i neva givap long yu. Tru long Atonmen blong Jisas Kraes, evri samting we i brok oli save kam gud bakegen.

Mi witnes se heven i stap glad long olgeta we oli stap kambak. Oli nidim yu, mo oli lavem yu. Mi testifae se Jisas Kraes i Sevya blong yumi mo Hem bae i blesem evriwan we oli kambak long Hem wetem bigfala pis mo glad. Hem i no folem han blong Hem blong sore be i open mo i open i kam long yu. Hem i no let blong yu kambak. Wetem lav insaed long hat blong mifala, mifala i welkamem yu i kambak hom. Long nem blong Jisas Kraes, amen.