Elda Pedro X. Larreal

Long namba fo manis blong Elda Pedro X. Larreal olsem wan fultaem misinari, Presiden Gordon B. Hinckley (1910–2008) i bin visitim Venezuela Caracas Misin.

Elda Larreal i tingbaot se, “Hem i bin givim wan gudfala invitesen long mifala abaot konsekresen: ‘Sapos yu fokas 100 pesen, mi promes se bae fiuja famli blong yu i kasem ol blesing.’”

Afta long hemia, Elda Larreal i bin raetem wan leta blong hem i finis wetem gelfren blong hem we i stap long hom ples blong hem. “Mi nidim blong putum evri samting long olta from se mi nidim blong fokas moa.”

Taem hem i stap lukluk i gobak, hem i luksave plante blesing—edukesen we i moa gud, wok we i gat sakses—evri samting ia i kamaot long tras we hem i gat long promes blong aposol ia.

“Taem yumi folem daereksen blong wan profet, sia, mo reveleta, bae yumi kasem ol blesing long laef blong yumi,” hem i talem. “Mi promesem.”

Pedro Xavier Larreal Noguera i bon i kam long wol long 6 Julae, 1976, long Valencia, Venezuela. Papa mo mama blong hem i, Duilio Antonio Larreal Romero mo Haydee Maria Noguera De Larreal. Hem i maredem Sariah Alvarez Campos long Karakas Venesuela Tempol long 25 Ogis, 2001. Tufala i papa mo mama blong tri pikinini.

Elda Larreal i winim wan digri long saed blong maneja long Simón Rodríguez Yunivesiti, wan masta digri long saens long edukesen long Santa Maria Yunivesiti, mo wan masta digri long bisnis administresen long Brigham Yang Yunivesiti. Hem i wok olsem wan kodineta long Ol Seminari mo Institiut blong Relijin, mo hem i bin wok blong Nature Sunshine Products Inc. olsem wan jeneral maneja mo rejinol daerekta blong Mexico, Central America, mo Dominican Republic.

Bifo oli singaotem hem olsem wan Jeneral Atoriti Seventi, Elda Larreal i bin stap givim seves olsem presiden blong Texas McAllen Misin. Hem i bin givim seves olsem wan Eria Seventi long tu eria, hem i bin wan stek presiden, wan kaonsela long stek presidensi, hae kaonsela, stek eksekutiv sekretari, mo bisop.