Stap Klin Fulwan long Hem long Saed blong Spirit

Ten man we oli gat rabis sik blong skin oli singaot i go long Sevya, “Plis, yu sore long mifala.” Mo Jisas Kraes i mekem. Hem i talem long olgeta blong go pas long pris blong hem i luk olgeta, mo taem oli go, bodi blong olgeta i kam klin aot long sik.

Mo taem wan long olgeta i luk we bodi blong hem i kasem hiling, i stap singaot bigwan blong presem God. Hem i kambak long Sevya, i foldaon long leg blong Hem, mo i talem tangkyu.

Mo Sevya i talem long man ya we i talem tangkyu se, “Bilif blong yu i mekem yu yu gud finis.”

Jisas Kraes i bin hilim ten man we oli gat rabis sik blong skin. Be wan, we i kambak long Sevya, i kasem wan moa samting bakegen. Hem i kam klin fulwan.

Naen man we oli gat sik blong skin oli kasem hiling long saed blong bodi.

Wan i kasem hiling long saed blong bodi mo i kam klin fulwan long saed blong spirit.

Taem mi stap tingting hevi long stori ia, mi stap gat tingting ia se sapos toktok ia i tru. Sapos hiling mo kam klin fulwan i no semmak, ?wan man i save kam klin fulwan long saed blong spirit tru long Hem, be i no save kam gud fulwan long saed blong bodi mo tingting?

Masta blong Hilim Evri Man bae i hilim ol hadtaem blong yumi—long saed blong bodi mo long tingting—long taem blong Hem. ?Be long taem blong stap wet blong kasem hiling, i posibol blong wan i kam gud fulwan?

?Hem i stap minim wanem blong kam klin fulwan long saed blong spirit?

Yumi kam klin fulwan tru long Jisas Kraes taem yumi mekem joes blong yumi blong folem Hem tru long fet, givim hat blong yumi fulwan long Hem blong mekem se Hem i save jenisim ol hat, stap obei ol komanmen, mo mekem wan kavenan rilesensip wetem Hem, blong stap lanem samting aot long ol jalenj mo go tru ol jalenj wetem tingting we i stap daon kasem taem yumi gobak long ples blong Hem mo kam gud long evri samting. Mi save kam klin fulwan, taem mi stap wet blong kasem hiling, sapos mi komitim mi fulwan long rilesensip blong mi wetem Hem.

Fet long Jisas Kraes i givim hop. Mi faenem hop taem mi stap traehad blong kam klin fulwan—blong kam klin fulwan i kam tru long fet long Jisas Kraes. Fet long Hem i mekem hop blong mi i kam antap, blong kam klin, mo hop ia i mekem fet blong mi long Jisas Kraes i kam strong. Hem i wan proses we i gat paoa.

Lod i talem long Inos se fet blong hem i mekem hem i “kam klin.” Blong kam klin fulwan i kam nomo taem Inos i bin tingting hevi long ol toktok blong profet blong hem-papa Jekob, taem hem i hanggri blong andastanem janis ia blong laef we i no save finis, taem hem i bin prea long God wetem wan strongfala prea. Mo long situesen blong hem blong wantem save mo wetem tingting i stap daon, voes blong Lod i kam long hem, i talemaot se oli fogivim ol sin blong hem. Mo Inos i bin askem long Lod, “?Yu mekem samting ia olsem wanem?” Mo hem i bin talem long mi se, “From fet blong yu long Kraes, … fet blong yu i bin mekem yu klin.”

Tru long fet blong yumi long Jisas Kraes, yumi save lukaotem blong kam fulwan long saed blong spirit taem yumi stap wet mo hop blong kasem hiling long saed blong bodi mo long tingting.

From paoa blong atonmen mo sakrifaes blong Hem, mo taem yumi sakem sin wetem wan tru hat, Sevya bae i mekem yumi kam klin aot long sin, olsem we Hem i bin mekem wetem Inos. Mo tu, Atonmen blong Hem we i nogat en i helpem yumi long ol harem nogud blong yumi.

Be maet bae Hem i no save givim hiling from ol sik mo—soa long bodi we i stap longtaem, ol sik we i faet agensem bodi olsem sik blong bren, kansa, fraet, harem nogud, mo sam moa. Kaen hiling ia i folem taem blong Lod. Mo taem yumi stap wet, !yumi save jusum blong kam klin fulwan taem yumi soem fet blong yumi long Hem!

Blong kam klin fulwan i minim blong kam gud evriwan. Hem i semmak olsem ol faef waes yang gel we laet blong olgeta i fulap wetem oel taem mared man ia i kamtru, yumi save kam klin fulwan long Jisas Kraes taem yumi fulumap ol laet blong yumi wetem moa oel blong fasin blong jenisim laef i go long Hem. Long wei ia, yumi stap rere from lafet blong mared we i ripresentem Seken Kaming Blong Hem.

Long parabol ia, evriwan long ol ten yang gel ia oli stap long stret ples, mo stap wet long man blong mared . Olgeta evriwan oli kam wetem wan laet.

Be taem Hem i kam, long medel naet long aoa we oli no save, faef we oli no waes oli nogat inaf oel blong ol laet blong olgeta. Oli no tokbaot olgeta olsem ol man nogud, be olsem ol man we oli no waes. Olgeta we oli no waes oli no rere inaf blong kipim laet blong olgeta i stap laet wetem oel blong fasin blong jenisim laef.

Mo from hemia, blong ansa long rikwes blong olgeta blong kasem raet blong go insaed long lafet blong mared, man blong mared i ansa , “Tru mi talem long yufala, mi mi no save yufala.”

Hemia i soem se olgeta faef waes yang gel ia oli save long Hem. Olgeta i kam klin fulwan long Hem.

Ol laet blong olgeta oli fulap long ol oel blong fasin blong jenisim laef we praes blong hem i hae, we i letem ol waes yang gel ia blong go insaed long lafet blong mared, long raet han blong man blong mared.

Olsem we Sevya i tokbaot, “Taswe, yutufala i mas stap fetful, stap prea oltaem, stap klinim laet blong yutufala, mo stap mekem i laet, mo yutufala i mas gat oel wetem yutufala, blong yutufala i rere long taem we Man we Bae I Mared i kam.”

Faef Waes Yang Gel, i kam long Ben Hammond

Oli bin putum wan naesfala kaving we i soem ol faef yang gel we oli waes, long Tempol Skwea aotsaed long ol doa blong Rilif Sosaeti Bilding mo long sado blong Sol Lek Tempol.

Hem i wan ples we i stret mo i go wetem parabol ia. From se taem yumi mekem mo kipim ol kavenan, speseli hemia we i stap hapen insaed long haos blong Lod, yumi fulumap ol laet blong yumi wetem oel blong jenisim laef.

Nomata ol woman we oli ripresentem ol faef waes gel we oli no serem oel blong fasin blong jenisim laef blong olgeta, be, oli stap serem ol laet blong olgeta taem oli holem mo leftemap ol laet blong olgeta we i fulap long oel mo i stap saen gud. Be wanem we i moa impoten, hem i we oli soem fasin blong stap sapotem wanwan long olgeta—solda i go fas long solda, wan han i raonem narafala, mo stap lukluk olgeta.mo stap singaotem ol narafala blong kam long laet.

I tru, “[Yumi] olsem laet long ol man long wol ” Sevya i talem:

“Mi talem long yufala, mi givim long yufala blong stap olsem laet blong ol pipol. Wan bigtaon we i stap long wan hil i no save haed.

“…“?[Yumi stap] laetem wan kandel mo putum andanit long wan basket? No, putum antap long stik blong holem kandel, mo i givim laet [long olgeta] evriwan we oli stap insaed long haos;

“From hemia, letem laet blong yufala i saen olsem ia long fored blong ol pipol ia, blong oli save luk ol gudfala wok blong yufala mo leftemap nem blong Papa blong yufala we i stap long heven.”

Sevya i givim komanmen long yumi blong Serem laet blong Hem. Kipim laet blong yufala i fulap long oel blong fasin blong jenisim laef i go long Jisas Kraes, mo stap rere blong kipim laet blong yu i klin mo i gohed blong laet. Mo afta, mekem laet ia i saen. Taem yumi stap serem laet blong yumi, yumi karem help blong Jisas Kraes i go long ol narafala man, laef blong yumi i jenis moa dip i go long Hem mo yumi save kam klin fulwan iven taem yumi stap wet blong kasem hiling. Mo taem yumi letem laet blong yumi i saen gud, yumi save stap glad iven taem yumi stap wet.

Wan eksampol long skripja we yumi save yusum blong sapotem prinsipol ia, i we, iven long taem we yumi stap wet blong kasem hiling, yumi save kam klin fulwan taem yumi jenisim laef blong yumi i go long Jisas Kraes mo kasem paoa we i kam long Hem.

Aposol Pol i bin gat sam hadtaem—wanem we hem i tokbaot olsem wan “nil blong aranis,” we tri taem, hem i bin askem Lod blong karemaot. Mo Lod i talem long Pol, “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” From hemia Pol i talemaot:

“From samting ia, mi mi glad blong tok flas from ol samting we i soemaot we mi mi nogat paoa. Long fasin ia mi save we Kraes i stap lukaot long mi long paoa blong hem.”

“Nao from samting ya mi mi glad nomo, … taem mi stap long trabol from we mi man blong Kraes: from we long taem we mi mi no gat paoa, long taem ya nao, mi mi gat paoa.”

Eksampol blong Pol i soem se iven long ol taem we yumi no strong, Jisas Kraes i save mekem paoa we yumi kasem long Hem i kam stret evriwan—i minim se, i kam gud evriwan. Olgeta we oli stap fesem ol hadtaem blong wol ia, mo stap lukluk i go long God wetem fet olsem Pol, oli save kasem ol blesing blong kam kolosap long God.

Pol i no kasem hiling long ol hadtaem, be hem i kam klin fulwan long saed blong spirit tru long Jisas Kraes. Mo iven long ol hadtaem blong hem, eksampol blong hem mo paoa we i kam long Jisas Kraes i mekem hem i stap glad. Long leta blong hem i go long ol man Filipae, hem i talem, “Yufala we i joen long Masta blong yumi, oltaem yufala i mas glad long Lod: Mi mi talem bakegen, se yufala i mas glad.”

Ol sista mo brata, ansa hem i yes, yumi save kam klin fulwan long saed blong spirit, iven taem yumi stap wet blong kasem hiling long saed blong bodi mo long tingting. Blong kam klin i no minim blong kam gud long saed blong bodi mo spirit long laef ia. Blong kam klin fulwan i kam tru long fet long Jisas Kraes mo jenis long Jisas Kraes mo blong letem laet blong jenis ia i saen.

“Mi singaotem plante, be smol nomo oli [jusum blong] stap.”

Tru long Resureksen evriwan bae oli kam oraet long saed blong bodi mo long tingting . ?Be bae yu jusum naoia blong kam klin fulwan long Hem?

Mi talemaot wetem glad se mi bin jenisim i go long Lod Jisas Kraes. Mi stap traehad blong kam klin fulwan long Hem. Mi save se evri samting bae i kambak bakegen mo hiling bae i kam, long taem blong Hem, from se Hem i stap laef.

Meri Magdala i wan woman we Jisas Kraes i bin hilim hem. Mo hem i wan woman we i kam klin fulwan long Jisas Kraes. Olsem disaepol blong Hem, hem i bin folem Sevya truaot long Galili mo givhan long Hem.

Hem i bin wan witnes long ded blong Hem.long kros.

Hem i go long tumb blong Hem blong komplitim ol samting we oli rere long hem blong berem Hem mo i faenemaot se ston we i kavremap hol ia oli tekemaot, mo se bodi blong Lod i nomo stap. Meri i stap long tumb mo i stap krae taem ol enjel i.askem hem faswan mo afta Sevya tu i askem, ?“Woman, yu yu stap krae from wanem? ?yu stap lukaot hu?”

“Meri i talem se, “Olgeta oli tekemaot bodi blong Masta blong mi, nao mi mi no save weples oli putum.”

Mo wetem kaen fasin, Jisas i singaotem nem blong hem, “Meri.” Mo hem i luksave Hem mo wetem respek hem i ansa, “!Raboni! … Tija.”

Aesea i bin profesae abaot Sevya, se, “Hem bambae i mekem we ded bambae i go lus olgeta, Bambae hem i ravemaot wota blong ae blong yufala.”

Laef blong Hem bakegen long Ded i ravemaot ol wota long ae blong Meri. Mi save se Hem bambae i ravemaot ol wota blong ae blong yu tu.

Meri i bin faswan blong witnesem Sevya we i laef bakegen long ded Mo hem i faswan blong witnes long ol narafala wan abaot ol samting we hem i bin luk.

Wetem tingting we i stap daon, mi ademap testemoni blong mi long Meri. Hem i laef bakegen long ded. Jisas Kraes i laef. Long en, evriwan bae oli kasem hiling long Hem, long saed blong bodi mo tingting. Mo long taem blong stap wet blong kasem hiling ia, fet long Masta blong Hilim evri samting bae i mekem yumi kam klin fulwan long saed blong spirit. Long nem blong Jisas Kraes, amen.