Wan Strong Rilesensip blong Tras mo Respek
Fet i gro taem yumi trastem Jisas Kraes mo i givim blesing taem yumi stap fetful mo gat respek long Hem.
Taem mi bin gat 17, mi bin mekem wan agrimen wetem fren blong mi José Luis blong tijim hem olsem wanem blong swim. Wan moning mifala i disaed se i taem blong praktis. Taem lesen blong mifala i finis mo mi stap lego swimingpul, mi harem fren blong mi i singaot from help. Hem i stap draon long pat blong swimingpul we i dip.
Mi jiam i go long wota mo stap swim go from hem mo stap prea from help. Taem mi holem han blong hem blong pulum hem i kam antap, hem i hang long nek blong mi mo kam long baksaed blong mi mekem mi no save pulum win. Naoia mitufala tugeta i stap draon. Mi traem bes blong mi blong kamaot long wota, mi prea wetem evri paoa blong mi from wan merikel blong God. Afta, sloslo nomo paoa blong God i stat blong kam, mi filim wan han i gohed blong stap pusum mi i go kolosap long ples we i no dip mo karem mitufala go long ples we i sef.
Eksperiens ia i givim wan gudfala lesen we Presiden Russell M. Nelson i bin tijim long wan taem: “Taem yu askem paoa blong Lod long laef blong yu wetem semfala traehad we wan man we i stap draon i wantem, taem win i sot mo i stap traehad blong pulum win, paoa blong Jisas Kraes bae i kam long yu.”
Ol dia pikinini mo ol yangfala, tedei mi wantem blong tokbaot long yufala impoten prinsipol blong fet long Jisas Kraes.
Fet long Kraes I Minim blong Trastem Hem
?Wanem i minim blong gat fet long Kraes? ?Hemia i minim blong yumi bilif long Hem o gat wan testemoni se Hem i stap laef? Hemia i save stap olsem stat blong hem, be hem i moa long hemia. ?Yu bin stap tingting long fet olsem tras? Tingting long wan we yu trastem bigwan—maet wan famli memba o wan fren. ?From wanem yu trastem olgeta? Maet from yu stap luk olgeta mo ol lav mo blong olgeta oltaem.
Taem yumi gat fet long Kraes, yumi luksave ol blesing blong Hem mo developem wan rilesensip blong tras wetem Hem.
?Olsem Wanem Bae Yu Save Mekem Tras blong Yu long Kraes I Kam Antap?
Long divosen blong ol yut we i jes pas, oli bin invaetem yufala blong stap kwaet mo tingting hevi long wan taem long laef blong yu we yu bin kasem wan laet we i kam long heven. !Traem eksasaes ia!
Stat taem yu tingbaot Kraes mo glad we Atonmen blong Hem mo gospel i karem i kam long laef blong yu. Mo tu, raetem daon “ol memori long saed blong spirit” taem we God i bin stap helpem yu, olgeta we yu lavem, mo ol pipol insaed longol skripja. Nao, bae ol testemoni ia oli no karem paoa i kam long laef blong yufala be Spirit nao bae i mas raetem olgeta long “tingting” blong hat blong yufala. So tingting hevi mo raetemdaon evri plan we God i mekem i rere i stap blong ol merikel ia i hapen long stret taem blong hem.
Nekis step, yusum eksasaes ia olsem wan janis blong go kolosap long God. Prea long Papa blong yu long Heven olsem se hem i fastaem blong yu prea long Hem. Talemaot lav blong yu mo tangkyu blong yu from ol blesing blong Hem. Askem Hem olsem wanem Hem i filim abaot yu mo abaot weaples laef blong yu i stap go long hem.
Sapos yu stap tru mo yu gat tingting i stap daon, bae yu harem ansa blong Hem mo statem wan rilesensip blong yuwan wetem Papa long Heven mo Jisas Kraes we bae i stap blong oltaem. !I no hemia nomo, be ol Kristin fasin blong yu bae i gat moa mining! Eksampol, bae yu wantem prea oltaem, mekem stadi blong yuwan, wosip long tempol olsem ol janis blong kam blong save Tufala mo stap wetem Tufala.
Fet I Gro Gud Wetem Respek
Luksave se fet i gro taem yumi trastem Jisas Kraes mo i givim blesing taem yumi stap fetful mo gat respek long Hem. Sapos yu wantem wan tru rilesensip wetem Kraes, soem long Hem taem yu mekem ol kavenan mo respektem olgeta wetem fasin blong stap tru mo gat respek. Taem yumi stap mekem kavenan wetem Jisas Kraes i bildim hop. Blong respektem ol kavenan i bildim fet.
Bae mi yusum wan eksampol blong miwan: Taem mi bin wan pikinini yet, wan dei mi luk mama blong mi i stap krae hemwan. Taem mi askem hem from wanem, hem i talem, “mi nidim yu blong stap wan gudfala boe.” Nomata mi save se i no mi we mi mekem hem i krae, mi lavem mo trastem mama blong mi bigwan mo wantem blong mekem laef blong hem i kam moa isi. Wetem wota blong ae we i fulap mo evri paoa blong stap tru, we wan naen yia boe i save gat, mi mekem promes long hem long dei ia se bae mi stap oltaem olsem wan gudfala boe mo mekem hem i praod.
?Yu save tingting long paoa we promes ia i gat—mo i gohed blong gat—long mi?
Promes ia blong mi wetem hem bae i lidim laef blong mi. Bifo mi mekem ol desisen, bae mi tingbaot sapos ol aksen blong mi bae i mekem hem i glad. Rilesensip blong promes ia mo rilesensip wetem mama blong mi i stap olsem ol angka blong ol aksen blong mi truaot laef blong mi.
Plante yia afta, taem mi kam blong save gud moa Jisas Kraes, mi save finis olsem wanem blong putum fet blong mi long Hem. Mi bin mekem ol kavenan wetem Lod, mo taem mi traehad blong respektem olgeta, Hem i fogivim ol sin blong mi, mo i “fulumap mi wetem lav blong Hem” we i fulumap gud mi. Smosmol, Kraes i tijim mi wan lav we i dip, respek, mo fasin blong stap tru long Hem.
?Yu save from wanem fet i wan prinsipol blong aksen, mo “sapos man i no bilif strong long God, hem i no save mekem [God] i glad long hem”?
Taem yu traem blong mekem wanem Hem i glad long hem, bae yu talem olsem Josef long Ijip taem waef blong Potifa i temtem hem: “Hemia i nogud tumas, mo i wan sin long fes blong God?” Mo taem yu fesem fasin blong agens, bae yu talem olsem yangfala Profet Josef: “Mi save hemia mo mi save se God i save hemia, mo mi no save talem se i no tru … Mi bin save se sapos mi mekem samting ia, bae mi mekem God i harem nogud.”
Fet long Lod Jisas Kraes i wan strong rilesensip we i go wetem fasin blong stap tru. mo lav. Long ol nara toktok, blong talem tangkyu from bigfala lav blong God (hesed), yumi soem lav blong yumi we i stap tru oltaem (emunah) taem yumi kipim ol komanmen blong Hem.
Kraes i promes, “Man we i kasem gud ol tok blong mi, mo i stap obei long olgeta … Papa blong mi bambae i lavem hem. Mo mi bambae mi lavem hem, nao bambae mi save soemaot mi long hem, blong hem i save gud mi.” Sapos yu givim yu fulwan blong stap tru long hem, Hem bae i soemaot lav blong Hem from yu.
Fet long Fes blong Enemi
?Be olsem wanem nao yu save ansa ol had situesen we i nidim merikel blong Hem? Taem ol hadtaem oli kam mo samtaem i mekem yumi fraet, yumi no fraet mo wokbaot i go long Hem, olsem BYS 2025 i stap talem: “Lukluk long mi long evri tingting blong yufala; no gat tu tingting, no fraet.”
?Olsem Wanem Bae Yu No Fraet mo Wokbaot I Go long Hem?
Tingbaot, yu stap wokabaot long ples we yu no gat map blong hem. Blong winim ol hadtaem we i stap long fored, yu nidim wan samting we i givim laet. Fet blong yu long God mo koneksen blong yu oltaem wetem Hem i oel blong laet blong yu. Mekem se, taem yu fesem tudak mo ol situesen we oli nogud tumas, yu no wokbaot i go long tufala long tudak, be laetem laet blong yu we i fulap long oel blong fet long Kraes blong givim laet blong hop long trabol taem. Ol eksperiens blong yu long pas bae i leftemap hop blong yu se Lod bae i sapotem yu long wokbaot blong yu.
?Hamas Nao Bae Yu Lanem Wetem Hop mo Fet blong Yu long Kraes?
?Tingbaot stori blong mi long swimingpul? Long taem ia we i nomo gat hop, merikel i bin kam long wei we mi bin wantem, be God i no talem se bae i hapen oltaem long wei we yumi wantem. Fet blong yumi i mas stap long Kraes mo hop blong yumi long blesing blong Hem, taem Hem i jusum blong sendem ol blesing ia. “Tingting blong gat ol merikel,” be “letem God i win insaed long laef blong yumi.”
Promes blong God long Ol Fetful Pipol blong Hem
!Ol yang fren blong mi, mifala i lavem mo trastem yufala bigwan! Yu yu pat blong famli blong God mo ol pikinini blong kavenan. Bilivim mo trastem Jisas Kraes. Bae Hem i mekem yu yu kam ol tru disaepol blong Hem.
Mi invaetem yu blong stat tedei blong lukaotem gud rilesensip blong yu wetem Jisas Kraes. Mekem wan komitmen blong yu neva lego Hem.
Fasin blong yu blong stap tru, lav blong yu, mo tras blong yu long Kraes bae i jenisim fasin mo aedentiti blong yu olsem blong Hem. Bae yu gat strong tingting mo paoa blong winim ol atak blong Setan. Mo taem yu mekem ol mistek, bae yu wantem tumas blong kasem fogivnes blong Hem. Long en, hop blong yu long fiuja bae i saen strong. Hem bae i trastem yu wetem paoa blong Hem blong mekem eni samting we Hem i tingting long yu blong mekem, iven paoa blong go bak stap wetem Hem.
Mi testifae long yufala abaot glad we i kam taem mi singsing long “singsing blong lav blong pemaot man” mo “ol han blong lav blong hem oli raonem mi blong taem we i no save finis.” Long tabu nem blong Jisas Kraes, amen.