Rod We I Kam long Heven blong Lidim Yumi
Taem yumi putum Jisas Kraes i kam stamba blong laef blong yumi, bae yumi faenem rod blong yumi go bak hom, stanap strong mo stap glad kasem en.
Jisas Kraes i bin jenisim laef blong mi taem mi bin baptaes long 26 yia blong mi long Frutillar, Chile. Long taem ia, wok blong mi i bin tekem mi krosem solwota, ol reva, mo ol wota blong naesfala Patagonia blong Chile. Afta long baptaes blong mi, mi luk wok mo laef blong mi long wan niu mo defren wei, mi kam blong save se i tru “evri samting i soem se i gat wan God.”
Folem laef blong fis ia saman, oli bon long ae blong ol reva. Long sam poen long laef blong olgeta, oli nidim blong swim go daon long reva kasem solwota, long ples ia oli faenem ol kaekae blong kakae mo ol samting we oli nidim blong mekem olgeta oli gro.
Be solwota i wan ples we i gat denja long hem tu, i ples we i gat ol animol we oli save kaekae olgeta mo ol fisaman oli save kasem olgeta wetem ol kalakala huk we i luk olsem kaekae be i no save fitim olgeta. Sapos ol saman i save laef tru long ol hadtaem ia, oli save rere blong yusum sistem blong olgeta we i gat paoa blong lidim olgeta i folem reva i go bak long sem ples we oli bon long hem, fesem ol niu mo sam long ol jalenj we oli save long hem finis. Ol saentis oli bin stadi long ol laef stael blong olgeta blong plante yia mo oli kam blong faenemaot se oli bin yusum wan map we i olsem GPS, blong lidim olgeta i go kasem stret ples we oli wantem go long hem.
Wan dei yumi evriwan i save go bak long ples we yumi kam long hem, hom blong yumi long heven. Mo olsem fis ia saman, yumi gat map blong yumiwan—o “Laet blong Kraes”—blong lidim yumi kasem ples ia. Jisas i tijim ol disaepol blong Hem, “Mi nao rod ia, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam.”
Taem yumi putum Jisas Kraes i kam stamba blong laef blong yumi, bae yumi faenem rod blong yumi go bak hom, stanap strong mo stap glad kasem en. Presiden Russell M. Nelson i bin tijim se “glad we yumi filim i wan smol pat nomo blong ol situesen blong laef blong yumi mo evri samting we yumi stap mekem long laef blong yumi i lukluk i go long hem.”
Tabu Fasin mo Raet blong Yumi blong Kasem Laef We I No Save Finis
Yumi ridim long famli wan ofisol toktok se “wanwan long olgeta hem i wan spirit pikinini boe o spirit pikinini gel blong papa wetem mama long heven we oli laekem olgeta tumas, wanwan long olgeta i gat gudfala fasin mo oli gat bigfala janis blong save kam olsem God. Long laef bifo laef long wol ia, ol spirit pikinini boe mo ol spirit pikinini gel oli bin save God mo oli bin stap wosipim Hem olsem Papa blong olgeta We I no Save Finis. Oli agri wetem glad hat long plan blong Hem, we i talem se ol pikinini blong Hem oli mas gat wan bodi blong mit mo bun, mo kasem eksperiens long wol ia blong save kam stret, mo long en, bae oli gat raet blong kasem laef ia we i no save finis.”
Bifo Jisas Kraes i bon i kam long wol ia, Hem i kam kamaot long Moses mo toktok long hem long bihaf blong Papa. Hem i talem long Moses, Hem i gat wan bigfala wok blong hem i mekem. Long taem blong miting ia, Lod i singaotem hem plante taem “boe blong mi”.
Afta long eksperiens ia, Setan i bin kam, i stap temtem hem, i talem, Moses, pikinini blong man, yu wosipim mi.”
Moses i tingbaot se hem i pikinini blong God nao i ansarem Setan: “?Huia yu? From yu luk, mi mi wan pikinini blong God.” Trutok i mekem Moses i go fri long wan atak we i kam long enemi.
Ol brata mo sista, ol huk blong laef ia oli ril. Oltaem oli stap blong pulum tingting, be oli gat wan gol nomo: blong pulumaot yumi long rod we i lid i go long Papa mo laef we i no save finis.
Mi save olsem wanem ol huk blong laef ia i ril. Wan Sandei, olsem wan niu konvet, mi bin stap tijim wan prishud klas mo bin gat smol toktok. Mi bin faenem i had smol blong endem lesen blong mi. Mi bin harem nogud mo filim se mi nao mi mekem samting ia i hapen. Mi no talem wan toktok, mi stap wokbaot blong go aotsaed, wetem tingting ia se bae mi nomo kambak long jos blong wan smol taem.
Stret long taem ia wan prishud holda we i wari i stanap long fored blong mi. Wetem lav hem i invaetem mi blong mi lukluk nomo long Kraes be i no long situesen we mifala i gat eksperiens long hem long taem blong klas. Taem mi lukluk bak long wanem i hapen wetem hem, hem i serem wetem mi se hem i harem wan voes i talem long hem se, “Go from hem; hem i impoten long mi.”
Ol dia fren blong mi, yumi evriwan i impoten long Hem. Presiden Nelson i bin tijim se “from kavenan we yumi mekem wetem God, Hem bae i neva taed long ol traehad blong Hem blong helpem yumi, mo bae yumi neva stopem ol sore mo longfala tingting blong Hem we hem i gat long yumi.” Tabu fasin blong yumi mo kavenan rilesensip blong yumi wetem God i givim raet long yumi blong kasem help blong God.
Nid blong Kakae Gud
Semmak long fis ia saman we i nid blong kakae gud long solwota blong gro, yumi tu yumi nid blong kakae gud ol kaekae blong spirit blong yumi no save ded long saed blong spirit. Prea, ol skripja, ol tempol, mo atendem ol Sandei miting oltaem i impoten long kaekae blong yumi long saed blong spirit.
Long Novemba 1956, Ricardo García i bin go insaed long ol wota blong baptaes long Chile, mo i kam fas memba blong Jos long kantri blong mi. Wan dei bifo hem i ded, Hem i talemaot long famli mo ol fren blong hem, “Plante yia i pas ol misinari oli bin invaetem mi blong mi stap hapi wetem famli blong mi. Mi mi wan hapi man. Talem long evriwan long Chile se gospel i hapines.”
Afta we oli kakae gud long gospel blong Jisas Kraes, Ricardo i givim ful laef blong hem blong givim seves long God mo neba blong hem wetem lav. Eksampol blong hem olsem wan disaepol i bin blesem plante jeneresen mo mi. Profet Josef Smit i bin tijim se “wan man we i fulap long lav blong God, i no glad nomo blong blesem famli blong hem, be i go raon long ful wol, i wantem tumas blong blesem ful famli blong man.”
Gobak long Hom blong Yumi long Heven
Dip insaed long wanwan long yumi i gat strong tingting blong gobak long hom blong yumi long heven, mo Jisas Kraes i rod ia blong heven we bae i lidim yumi. Hem nao i rod. Sakrifaes blong Atonmen blong Hem i mekem se yumi save mekem kavenan wetem God. Taem yumi mekem ol kavenan ia finis, bae yumi faenem se yumi stap fesem ol hadtaem. Denja, harem nogud, temtesen, mo ol harem nogud ia bae oli testem fet mo paoa blong spirit blong yumi. Askem help. Jisas Kraes i andastanem mo i wantem oltaem blong yumi serem wetem Hem ol hadtaem blong yumi.
Tingbaot se oli save long Hem olsem “wan man we i harem nogud plante taem, mo i savegud olgeta samting we i stap mekem man i harem nogud.” Sevya i bin tijim, “Long wol ya, bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ya finis.” Sakrifaes blong Atonmen blong Hem i mekem oli fogivim ol sin blong yumi kasem long poen se Hem i nomo tingbaot olgeta.
No fogetem ol sin blong yumi i save stap olsem pat blong laef ia, mo i helpem yumi blong nomo ripitim olgeta bakegen. Be, bae yumi tingbaot Hem taem yumi tekem sakramen long jos evri Sandei. Odinens ia i wan impoten pat blong wosip mo divelopmen long saed blong spirit. Yumi glad taem yumi save se Sandei i no wan dei olbaot nomo. “Sabat dei oli putum blong i givhan long man,” wetem tingting ia blong mekem yumi spel long wok blong wol mo mekem bodi mo spirit i kam niu bakegen.
Yumi tingbaot Hem tu taem yumi go insaed long tempol—haos blong Lod. Ol tempol oli givim wan dip save abaot Jisas Kraes olsem stret man blong kavenan we i lidim yumi i go long laef we i no save finis, “presen we i bigwan long ol presen blong God.”
Taem mi stap go long tempol i givim mi bigfala hop blong laef we i no save finis. Mi bin gat eksperiens blong save gat koneksen ia wetem ol pipol blong heven long tugeta saed blong vel. Mi bin luk ol merikel blong hiling long laef blong ol yangfala pikinini blong mi, we tu long olgeta i stap laef wetem ol siknes we i nid blong lukaotem tufala evri dei long laef ia.
Famli blong mifala i glad taem mifala i tokabaot plan blong stap glad. Fes blong ol pikinini blong mi i glad taem oli harem se tru long Jisas Kraes, ol “hadtaem blong olgeta oli blong smol taem nomo.” Mifala i lavem ol pikinini blong mifala tumas, mo save se sam dei, olsem we Presiden Jeffrey R. Holland i bin tijim, bae oli stanap long fored blong yumi wetem bigfala glori, mo bodi mo maen blong olgeta bae i stret gud evriwan.” Ol kavenan blong yumi i karem yumi go moa kolosap long God blong mekem wanem i no save hapen i hapen, fulumap evri spes blong tudak mo tu tingting wetem laet mo pis.
From Jisas Kraes, i gat hop mo ol gudfala risen blong stap gohed blong lavem, prea from, mo sapotem olgeta we yumi kea abaot olgeta.
Mi save se hem i laef. Hem i save yumi mo i lavem yumi. Hem i rod, trutok, mo laef blong wol.
Mi invaetem evriwan long yumi tedei blong putum laef blong yumi i lukluk nomo long Jisas Kraes mo tijing blong Hem. Mekem olsem bae i helpem yumi blong yumi no save foldaon long temtesen, harem nogud, mo stap tingdaon long yumiwan. Bae yumi stanap olsem ol tempol—we i tabu, mo stap strong oltaem. Bae yumi stanap strong agensem ol strong win blong laef, bae yumi faenem rod blong yumi gobak hom, stanap strong kasem en mo stap glad kasem en. Long nem blong Jisas Kraes, amen.