Elda Steven C. Barlow

Wan long ol impoten eksperiens we Elda Steven C. Barlow i bin gat wetem Tabu Spirit hem i “filing ia we hem i no save tanem baksaed long hem, we i kam long heven se [hem] i nidim blong maredem Christina Evans.” Tufala i mared long Sol Lek Tempol long 1991 mo tufala i gat faef pikinini.

Elda mo Sista Barlow i givim seves olsem ol misin lida long Ecuador stat long 2017 kasem 2020, we i tekem tu stat blong wol sik blong KOVID- 19. Long taem ia, plante misinari oli bin gobak, mo oli jenisim asaenmen blong sam misinari i kam long misin blong Barlow. Elda mo Sista Barlow oli witnesem han blong Lod we i stap lidim wok blong ol misinari ia.

“Mifala i putum tras blong mifala long Lod,” Elda Barlow i tingbaot. “I gat ol taem we mifala i no save wanem bae i hapen long nekis dei. Mifala i redi nomo blong mekem eni samting. Mifala i bin prea oltaem, mo evri samting i bin wok gud.”

Eksperiens ia i bin pruvum ol lesen we oli bin tijim longtaem bifo se Lod nao i stap daerektem ol samting mo we oltaem yumi save trastem Hem.

Elda Brown i kasem wan digri long edukesen long saed blong helt long Yunivesiti blong Utah long 1993. Hem i bin wok olsem wan eksekutiv blong stadi long ol data mo mekem kwaliti blong helt kea i kam antap. Long taem we hem i bin kasem koling blong ia, Elda Barlow i stap givim seves olsem wan Eria Seventi long Yuta Eria.

Steven Chad Barlow i bon i kam long wol long Bountiful, Utah, long 1 Jenuware, 1969. Papa mo mama blong hem i, Jon Kay Barlow mo Becky Christensen Barlow. Hem i “groap wetem wan naes mo fetful papa mo mama” we oli bin tijim gospel long hem taem hem i smol nomo.