Elda Brian J. Holmes

Elda Brian J. Holmes i talem se hem mo waef blong hem i ol witnes blong Lod abaot promes blong Lod insaed long Doktrin mo Ol Kavenan 84:88 se Hem “bambae [i] go long fored blong [yumi].”

“Hemia i wanem we Hem i bin mekem long ful laef blong mifala,” Elda Holmes i talem. “Taem yumi givim laef blong yumi i go long Lod, bae Hem i save mekem laef blong yumi i gat moa mining bitim we yumi yumi save mekem yumiwan.”

Long niufala wok blong hem olsem wan Jeneral Atoriti Seventi, Elda Holmes i hop se bae hem i gat ol janis blong testifae abaot wok blong Jisas Kraes we i stamba insaed long plan blong Papa long Heven.

“Hem i Sevya mo Ridima blong evri pikinini blong Papa blong yumi long Heven,” hem i talem.

Brian J. Holmes i bon i kam long wol long 5 Disemba, 1977, long Sol Lek Siti, Yuta. Hem i wan long ol twelef pikinini blong Michael H. Holmes mo Marian R. Holmes. Olsem wan yangfala man, hem i bin givim seves long wan misin long Munich, Germany. Afta, hem i bin maredem Maggie Wilson long Sol Lek Tempol long 29 Maj, 1999. Elda mo Sista Holmes oli papa mo mama blong sikis pikinini mo oli stap laef long Queen Creek, Arizona, taem hem i bin kasem koling blong hem olsem wan Seventi.

Elda Holmes i bin kasem wan digri long politik saens mo i kasem wan juris dokta digri long Arizona State Yunivesiti. Hem i wok olsem wan vaes presiden blong Holmes Homes long Arizona, hem i stanemap Holmes Law, PLC, mo i no longtaem i pas, hem i wok olsem wan jeneral kaonsel blong Charter One, LLC.

Bifo long koling blong hem olsem wan Jeneral Atoriti, Elda Holmes i bin stap givim seves olsem wan Eria Seventi long North America Southwest Eria. Mo tu, hem i givim seves olsem wan stek presiden, hae kaonsela, mo bisop.