Elda James E. Evanson

Elda James E. Evanson i groap long wan suga bit fam long smol vilej blong Barnwell, long is blong Lethbridge, Alberta, Kanada.

Hem i wan bubu blong wan fetful paeonia, mo Elda Evanson i bin groap long wan hom we “oli tijim gospel long hem mo oli laef folem gospel.”

Taem hem i gat 10 ia, hem i bin ridim evri 16 koleksen blong buk we famli blong hem i gat abaot ol pikja droing buk blong Buk blong Momon mo ol stori blong histri blong Jos, mo hem i bin disaed blong folem eksampol blong Josef Smit. Hem tu i bin go long wan smol bus long wan rod narasaed long haos blong hem, mo hem i bin nildaon mo prea, mo hem i kasem konfemesen long Tabu Spirit se Jisas Kraes hem i Sevya blong hem, mo we Josef Smit i wan tru profet, mo Buk blong Momon i tru.

Strong biliv ia i bin mekem hem i gat wan laeftaem blong givim hem fulwan long seves blong Jos, we i tekem tu blong stap olsem wan Eria Seventi, stek presiden, mo presiden blong Utah Orem Misin. Long taem we hem i bin kasem koling blong hem, Elda Evanson i bin stap givim seves olsem wan Valien aktiviti lida long wod blong hem long Lethbridge.

James Eugene Evanson i bon i kam long wol long Taber, Alberta, long 16 Ogis, 1968. Hem i wan long ol eit pikinini blong Dale Eugene mo Phyllis Tanner Evanson.

Afta we hem i bin givim seves long wan fultaem misin long Tempe, Arizona, Elda Evanson i bin maredem Jody Karil Zobell long 20 Disemba, 1989, long Sol Lek Tempol. Tufala i papa mo mama blong faef pikinini, mo tufala i gat 11 apupikinini.

Elda Evanson i bin winim wan digri mo wan dokta blong sejeri digri long saed blong dentis long Yunivesiti blong Alberta, mo hem i wok olsem wan praevet dentis blong 26 yia.